Ang Nakasentro sa Pamilya nga Ebanghelyo ni Jesukristo

Ang doktrina sa Ang Simbahan ni Jesukristo sa mga Santos sa Ulahing mga Adlaw nakasentro sa pamilya. Mahinungdanon sa atong doktrina sa pamilya mao ang templo. Ang mga ordinansa nga nadawat didto makapahimo kanato nga makabalik isip mahangtoron nga mga pamilya ngadto sa presensiya sa atong Langitnong Amahan.

Sa Abril 2025 nga kinatibuk-ang komperensiya, si Presidente Russell M. Nelson mipahibalo sa konstruksiyon sa 200 ka bag-ong mga templo. Ganahan siya sa pagpahibalo sa bag-ong mga templo sa pagtapos sa matag kinatibuk-ang komperensiya, ug kitang tanan nagmaya uban kaniya. Apan, uban sa dakong gidaghanon sa mga templo karon nga anaa sa labing sayo nga mga bahin sa pagplano ug konstruksiyon, tukma lang nga hinayan nato ang pagpahibalo sa bag-o nga mga templo. Busa, uban sa pagtugot sa Korum sa Napulog Duha ka Apostoles, dili kami mopahibalo og bisan unsang bag-o nga mga templo niini nga komperensiya. Kita karon mopadayon sa paghatag sa mga ordinansa sa templo ngadto sa mga miyembro sa Simbahan sa tibuok kalibotan, lakip sa kanus-a ug asa ipahibalo ang konstruksiyon sa bag-o nga mga templo.

Kana nga bahin sa akong pakigpulong nga bag-ohay lang nako gihatag nasulat human sa kamatayon sa atong minahal nga Presidente Russell M. Nelson. Unsay mosunod karon nasulat ug naaprobahan mga semana kaniadto, apan kini nagrepresentar gihapon sa akong mga pagtulun-an, dinasig sa Ginoo.

Ang pamahayag sa pamilya, nga gipahibalo 30 ka tuig nang milabay, nagpahayag nga “ang pamilya gi-orden sa Dios” ug “mahinungdanon sa plano sa Tiglalang alang sa walay kataposan nga destinasyon sa Iyang mga anak.” Namahayag usab kini “nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.” Ug “kami sa dugang mopahayag nga ang Dios misugo nga ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.” Si kanhing‑Elder Russell M. Nelson mitudlo sa mga nanambong sa Brigham Young University, nga ang pamilya “importante sa plano sa Dios. … Gani, ang katuyoan sa plano mao ang paghimaya sa pamilya.”

Ang Simbahan ni Jesukristo usahay mailhan isip simbahan nga nakasentro sa pamilya. Tinuod kini! Ang atong relasyon sa Dios ug ang katuyoan sa mortal nga kinabuhi mapasabot kon maghisgot og pamilya. Ang ebanghelyo ni Jesukristo mao ang plano sa atong Langitnong Amahan alang sa kaayohan sa Iyang espiritung mga anak. Makasulti kita sa tinuoray nga ang plano sa ebanghelyo unang gitudlo ngari nato didto sa konseho sa usa ka mahangturon nga pamilya, giimplementar kini pinaagi sa atong mortal nga mga pamilya, ug ang katuyoan niini mao ang pagkahimaya sa mga anak sa Dios diha sa mahangturon nga mga pamilya.

Bisan pa og anaa kanang doktrinal nga konteksto, adunay oposisyon. Sa Estados Unidos nag-antos kita gikan sa pagkaguba sa kaminyoon ug sa proseso sa pagpanganak. Dul-an sa gatosan ka tuig ang proporsiyon sa mga pamilya nga gipangulohan og kasado nga magtiayon mius-os, ug mao usab ang gidaghanon sa pagpanganak. Ang mga kaminyoon ug ang pagpanganak sa atong mga miyembro sa Simbahan positibo kaayo, apan dako usab ang pag-us-os niini. Mahinungdanon nga ang mga Santos sa Ulahing mga Adlaw dili mawagtangan sa ilang pagsabot sa katuyoan sa kaminyoon ug sa bili sa mga anak. Mao kana ang kaugmaon nga atong gipaningkamotan. “Ang kahimayaan usa ka kalihokan sa pamilya,” si Presidente Nelson mitudlo kanato. “Pinaagi lamang sa makaluwas nga mga ordinansa sa ebanghelyo ni Jesukristo nga ang mga pamilya mahimaya.”

Ang nasudnon nga pag-us-os sa kaminyoon ug pagpanganak masabtan ra sa makasaysayanon nga mga rason, apan ang mga mithi sa mga Santos sa Ulahing adlaw ug ang mga buhat kinahanglan nga molambo—dili mosunod—sa mga uso.

Sa batan-on pa ko mga 80 ka tuig nang milabay, nagpuyo ko sa umahan sa akong mga apohan diha sa usa ka kahimtang diin hapit tanang panghitabo atol sa adlaw ubos sa direksiyon sa pamilya. Walay telebisyon o uban pang mga elektronik nga mobalda sa mga kalihokan sa pamilya. Sa sukwahi, sa siyudadnon nga katilingban karon, diyotay rang mga miyembro ang nagsinati og kanunayng nakasentro sa pamilya nga mga kalihokan. Ang pagpuyo sa siyudad ug modernong transportasyon, organisadong kalingawan, ug labihan ka paspas nga komunikasyon nagpasayon sa mga batan-on sa pagtagad sa ilang mga panimalay nga ingon og mga boardinghouse, diin sila matulog ug panagsa rang mokaon apan menos kaayo ang direksiyon gikan sa mga ginikanan sa ilang mga kalihokan.

Ang mga impluwensya sa mga ginikanan nagka-ubos na usab tungod sa paagi sa panginabuhi sa kadaghanang bag-o nga mga miyembro sa Simbahan. Sa mga nangagi, usa sa talagsaong mga impluwensya nga mihiusa sa mga pamilya mao ang kasinatian sa tinabangay nga panlimbasog sa pagkab-ot sa komon nga tumong—sama sa pag-atiman sa kasagbotan o pagpanarbaho. Ang pamilya usa ka organisado ug unang dapit diin ang pamilya moani sa kaugalingong produkto. Karon, kadaghanan sa mga pamilya manarbaho na lang ug ang kinitaan ipamalit para konsumo, nga wala nagkinahanglan og taas nga ang-ang sa organisasyon ug pagtinabangay sa pamilya.

Samtang nagkaubos ang impluwensiya sa pagkaginikanan, ang mga Santos sa Ulahing mga Adlaw sa gihapon adunay hinatag sa Dios nga responsibilidad sa pagtudlo sa ilang mga anak sa pag-andam sa atong pamilya sa destinasyon sa kahangtoran (tan-awa sa Doktrina ug mga Pakigsaad 68:25). Daghan kanato kinahanglang mohimo niini kon dili tradisyonal ang atong mga pamilya. Diborsiyo, kamatayon, ug panagbulag mao ang mga reyalidad. Nasinati ko kana sa pamilya diin ako nagdako.

Namatay ang akong papa sa siyete anyos pa ko, mao nga ang manghod nakong lalaki ug babaye ug ako gipadako sa biyuda nga inahan. Sa labing lisod nga mga sitwasyon, nagpadayon siya. Nag-inusara siya ug naglisod, apan uban sa tabang sa Ginoo, ang iyang puno sa gahom nga pagtudlo sa doktrina sa gipahiuli nga Simbahan migiya kanamo. Nag-ampo gayod siya alang sa langitnong tabang sa pagpadako sa iyang mga anak, ug napanalanginan siya! Napadako kami sa malipayong panimalay diin kanunay nga usa ka reyalidad ang among papa nga patay na. Gitudloan niya kami nga duna kami amahan ug siya dunay bana ug kami sa kanunay magkauban nga pamilya tungod sa ilang pagminyo sa templo. Ang among papa temporaryo nga nalayo kay ang Ginoo mitawag kaniya sa lahi nga buluhaton.

Nasayod ko nga daghang uban pang pamilya dili kaayo malipayon, apan ang tanang nag-inusara nga inahan makatudlo sa gugma sa Langitnong Amahan ug ang kinatas-an nga mga panalangin sa pagkaminyo sa templo. Mahimo sab nimo kini! Ang plano sa Langitnong Amahan magseguro niini nga posibilidad alang sa tanan. Tanan kami mapasalamaton sa kaminyoon sa templo ug sa umaabot nga mga panalangin sa pagkaselyo isip mahangturon nga pamilya. Sama sa akong inahan, ganahan kaming mokutlo sa saad ni Lehi sa iyang anak nga si Jacob nga ang Dios “[mopahinungod sa] imong mga kasakit alang sa imong kaayohan” (2 Nephi 2:2). Magamit kana sa matag Santos sa Ulahing Adlaw nga pamilya, kompleto o kasamtangang dili kompleto. Kita usa ka pamilya nga simbahan.

Ang atong doktrina ug ang atong gituohan nga mahangturon nga mga pamilya naglig-on ug nagbugkos kanato. Dili gayod ako makalimot sa saad sa akong Lolo Harris sa habig sa akong inahan, dihang kaming mga anak nagpuyo sa iyang umahan duol sa Payson, Utah. Gihatagan niya kami og subo kaayong balita nga ang akong papa namatay sa layo kaayo sa Denver, Colorado. Midagan ko sa kwarto ug miluhod kilid sa higdaanan, mihilak pag-ayo. Gisundan ko ni Lolo ug miluhod siya tupad nako ug miingon, “ako ang mahimo nimong amahan.” Kana nga malumo nga saad usa ka gamhanang ehemplo kon unsay mahimo sa mga apohan aron mahulipan ang mga kakulang kon ang pamilya mawad-an o mamatyan og usa ka sakop.

Ang mga ginikanan, dili minyo o minyo—ug ang uban, sama sa mga apohan, kinsa mohulip niana nga tahas alang sa mga anak—mao ang hanas nga mga magtutudlo. Ang labing epektibo nilang pagtudlo mao ang pinaagi sa ehemplo. Ang pamilya mao ang ideyal nga dapit sa pagpakita ug pagkat-on sa mahangtorong mga kamatuoran sama sa kaimportante sa kaminyoon ug mga anak, sa katuyoan sa kinabuhi, ug sa tinuod nga tinubdan sa kalipay. Kini usab ang labing maayong dapit sa pagkat-on og ubang mahinundanong mga leksiyon sa kinabuhi, sama sa kamabination, pagpasaylo, pagkontrol sa kaugalingon, ug sa bili sa edukasyon ug matinuoron nga buhat.

Siyempre, daghang miyembro sa Simbahan dunay hinigugmang mga sakop sa pamilya nga wala mohangop sa mga kamatuoran ug mga ekpektasyon sa ebanghelyo. Kini nga mga miyembro nagkinahanglan sa atong gugma ug pailob. Sa paghisgot sa usag usa, angay natong hinumdoman nga ang pagkahingpit nga atong gitinguha dili limitado sa makaluya nga mga kahimtang sa mortalidad. Ang talagsaong pagtulun-an sa Doktrina ug mga Pakigsaad 138:57–59 nagseguro kanato nga ang paghinulsol ug espiritwal nga paglambo mapadayon didto sa kalibotan sa mga espiritu human sa mortalidad. Ang mas importante, samtang ang mga pamilya maghiusa sa paglig-on sa usag usa, tanan kita angay mahinumdom nga ang mga sala ug ang dili kalikayan nga mga pagkasayop nga masinati natong tanan sa mortalidad mapasaylo pinaagi sa paghinulsol tungod sa mahimayaon ug makaluwas nga Pag-ula ni Jesukristo.

Ang atong Manluluwas, nga si Jesukristo, mao ang atong labing maayo nga modelo. Mapanalanginan kita kon atong imodelo ang atong kinabuhi subay sa Iyang mga pagtulun-an ug kaugalingong sakripisyo. Ang pagsunod kang Kristo ug pagtugyan sa atong kaugalingon sa pagserbisyo sa usag usa maoy labing maayo nga sulbad sa kahakog ug sa pag-inusara nga karon ingon og komon na kaayo.

Ang mga ginikanan usab adunay katungdanan sa pagtudlo sa ilang mga anak sa praktikal nga kahibalo gawas sa mga baroganan sa ebanghelyo. Mahiusa ang pamilya kon magtinabangay sila sa paghimo og makahuloganong mga butang. Ang paghimo og mga garden sa pamilya maglig-on sa mga relasyon sa pamilya. Ang malipayong mga kasinatian sa pamilya molig-on sa mga relasyon sa pamilya. Kamping, mga sport, ug ubang lingawlingaw maoy bililhong bugkos sa mga pamilya. Ang mga pamilya kinahanglan nga mag-organisa og mga family reunion sa paghinumdom sa mga katigulangan, nga mohatod ngadto sa templo.

Ang mga ginikanan kinahanglang mo-edukar sa mga anak sa sukaranang mga kahanas sa pagpakabuhi, lakip ang pagtrabaho sa nataran ug sa panimalay. Ang pagkat-on og mga pinulongan usa ka mapuslanong pag-andam alang sa misyonaryo nga pagserbisyo ug sa modernong kinabuhi. Ang mga magtutudlo niini nga mga hilisgotan pwede ang mga ginikanan o mga apohan o mga kaliwat sa pamilya. Molambo ang pamilya kon magkat-on sila isip usa ka grupo ug magtinambagay sa tanang butang mahitungod sa pamilya ug sa mga sakop niini.

Ang uban tingali moingon, “Apan wala kami oras sa paghimo bisan unsa niana.” Aron makakita og panahon sa pagbuhat sa unsay tinuod nga bililhon, daghang ginakanan makakita nga ilang ma-on ang ilang pamilya kon ilang i-off ang ilang teknolohiya. Ug mga ginikanan, hinumdomi, ang gikinahanglan gayod niana nga mga anak sa tingpanihapon mao ang oras uban kaninyo.

Talagsaong mga panalangin moabot sa mga pamilya kon dungan sila nga mag-ampo, mangluhod sa gabii ug sa buntag sa pagpasalamat sa mga panalangin ug i-ampo ang komon nga mga problema. Ang mga pamilya mapanalanginan usab kon dungan sila nga mosimba sa mga tulumanon sa Simbahan ug sa ubang pang-debosyon nga mga kahimtang. Ang mga relasyon sa pamilya malig-on usab pinaagi sa mga istorya sa pamilya, paghimo og mga tradisyon sa pamilya, ug pagpakigbahin og sagradong mga kasinatian. Si Presidente Spencer W. Kimball mipahinumdom nato nga ang “mga istorya nga makadasig gikan sa atong kaugalingong kinabuhi ug sa atong mga katigulangan … maoy gamhanang mga himan nga pagtulun-an.” Sa kasagaran mao kana ang labing maayong mga tinubdan sa inspirasyon alang nato ug sa atong kaliwatan.

Ako mopamatuod bahin ni Ginoong Jesukristo, nga mao ang Bugtong Anak sa Dios, atong Mahangtoron nga Amahan. Siya nagdapit kanato sa pagsunod sa dalan sa pakigsaad nga mosangpot ngadto sa panagtigom sa langitnong pamilya. Ang makaselyo nga mga gahom sa pagkapari, nga gidumala pinaagi sa gipahiuling mga yawe didto sa Kirtland Temple, magdala sa pamilya nga magkauban sa kahangtoran (tan-awa sa Doktrina ug mga Pakigsaad 110:13–16). Sa kasamtangan kini gigamit sa nagtubo nga gidaghanon nga mga templo sa Ginoo sa tibuok kalibotan. Tinuod kini. Atong himoon nga mahimo kitang kabahin niini, akong pag-ampo, sa ngalan ni Jesukristo, amen.