Hibaloi Kon Kinsa Gayod Ikaw
Bisan asa pa man kita sa atong dalan sa pagkadisipulo, ang atong kinabuhi mausab gayod kon mas makasabot kita kon kinsa gayod kita.
Pipila ka tuig ang milabay ang among anak nga babaye adunay mahinungdanon nga kasinatian sa iyang misyon. Uban sa iyang pagtugot, ipakigbahin nako ang usa ka kinutlo sa unsay iyang gisulat kanamo nianang semanaha:
“Gahapon usa ka mibalik nga miyembro mihangyo kanamo nga moadto sa ilaha sa labing daling panahon. Sa among pag-abot, nakit-an namo siya sa salog, grabe nga nagbakho. Samtang naghilak, among nahibaloan nga siya nawad-an sa iyang trabaho, mapahawa gikan sa iyang apartment, ug sa makausa pa mahimong walay puy-anan.”
Ang among anak nga babaye mipadayon: “Nagsugod ko nga natarantang nangita sa akong mga kasulatan, naningkamot nga makakaplag og usa ka butang—bisan unsa—nga makatabang kaniya. Samtang nangita ko sa tukma nga bersikulo, nakahunahuna ko, ‘Nag-unsa man ko? Dili kini mao ang buhaton ni Kristo. Dili kini usa ka problema nga akong masulbad, apan kini literal nga anak nga babaye sa Dios nga nanginahanglan sa akong tabang.’ Busa akong gisirad-an ang akong mga kasulatan, miluhod tupad kaniya, ug migakos kaniya samtang kami magkaubang naghilak, hangtod nga siya andam na sa pagbarog ug pag-atubang niini nga pagsulay.”
Human nga nahupay kini nga babaye, ang among anak nga babaye migamit dayon sa mga kasulatan aron sa pagsulay ug pagtabang kaniya nga makasabot sa katinuod sa iyang balaang bili ug sa pagtudlo kaniya sa usa sa labing mahinungdanong mga kamatuoran sa atong kinabuhi—nga kita hinigugma nga mga anak nga lalaki ug mga anak nga babaye sa Dios, usa ka Dios nga mobati og hingpit nga kaluoy kanato kon kita mag-antos ug andam sa pagtabang kanato samtang kita mohimo og aksiyon sa pagbuntog sa lisod nga mga kahimtang.
Makahuloganon nga ang unang punto sa doktrina nga gitudlo sa atong mga misyonaryo mao nga ang Dios mao ang atong mahigugmaon nga Langitnong Amahan. Ang matag mosunod nga kamatuoran nagtukod sa sukaranang panabot kon kinsa gayod kita.
Si Sister Susan H. Porter, Kinatibuk-ang Presidente sa Primary, mitudlo: “Kon kamo masayod ug makasabot unsa ka hingpit kamo nga gihigugma isip usa ka anak sa Dios, kini makausab sa tanan. Makausab kini unsay inyong gibati sa inyong kaugalingon kon kamo makahimo og mga sayop. Makausab kini unsay inyong bation kon mahitabo ang malisod nga mga butang. Makausab kini sa inyong pagsabot sa mga sugo sa Dios. Makausab kini sa inyong pagtan-aw sa uban ug sa inyong kapasidad sa paghimo og kalainan.”
Kini nga kausaban gihulagway samtang atong mabasa ang mahitungod sa kasinatian ni Moises dihang nakigsulti sa Dios nawong sa nawong. Atol niana nga panag-istoryahanay, ang Dios balik-balik nga mitudlo ni Moises sa iyang balaanong panulondon, nag-ingon “Moises, … ikaw mao ang akong anak.” Ang Dios mipasabot nga si Moises anaa sa pagkasusama sa Iyang Bugtong Anak. Si Moises klaro nga nakasabot kon kinsa siya, nga siya adunay buluhaton nga himoon, ug nga siya adunay usa ka mahigugmaong Langitnong Amahan.
Human niini nga kasinatian, ang kaaway miabot sa pagtental kaniya ug mitawag kaniya pinaagi sa pag-ingon, “Moises, anak sa tawo.” Kini mao ang usa ka komon ug delikado nga paagi nga gamiton sa kaaway sa pagtental kanato. Samtang ang atong Langitnong Amahan makanunayon ug mahigugmaong mopahinumdom kanato nga kita Iyang mga anak, ang kaaway kanunay nga mosulay sa pagmarka kanato pinaagi sa atong mga kahuyang. Apan si Moises nakakat-on na nga siya labaw pa sa usa ka “anak sa tawo.” Siya mipahayag ngadto kang Satanas: “Kinsa man ka? Kay tan-awa, ako mao ang anak sa Dios.” Sa samang paagi, kon kita nag-atubang sa mga hagit sa mortalidad o kon kita mobati nga dunay mosulay sa pagmarka kanato pinaagi sa atong mga kahuyang, kita kinahanglang mobarog nga lig-on diha sa kahibalo kon si kinsa gayod kita. Kita kinahanglan gayod nga magtinguha sa pag-ila sa atong bili gikan sa Dios ug dili sa uban. Ug sa atong pagbuhat niini, kita usab maisogon nga makapahayag, “Ako anak sa Dios.”
Diha sa tibuok kalibotan nga debosyonal alang sa mga young adult, ang atong minahal nga Presidente Russell M. Nelson mitudlo: “Mao nga kinsa man kamo? Una ug labing importante, kamo anak sa Dios, anak sa pakigsaad, ug disipulo ni Jesukristo. Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya.”
Dili kini sulagma nga sa lagmit nga labing gibalik-balik nga kasulatan, ang Dios nagpahinumdom kanato sa atong relasyon ngadto Kaniya. Sa tanang ngalan nga Siya mahimong mailhan diha sa pag-ampo sa sakramento, Siya mihangyo nga tawgon nga “Dios, ang Amahan sa Kahangtoran.”
Samtang kita makaila gayod kon kinsa kita, mas kusganon kitang motuo nga ang atong mahigugmaong Langitnong Amahan naghatag og plano alang kanato nga makabalik sa pagpuyo uban Kaniya pag-usab. Si Elder Patrick Kearon mitudlo: “Ang matahom nga plano sa atong Amahan, gani ang Iyang ‘talagsaon’ kaayo nga plano, gidisenyo sa pagdala kaninyo balik sa panimalay, dili ang pagpahilayo kaninyo. … Ang Dios walay hunong sa pagtinguha kaninyo.” Hunahunaa kana sa makadiyot—ang atong labing gamhanan, mahigugmaong Amahan “walay hunong sa pagtinguha kaninyo.”
Bisan asa pa man kita sa atong dalan sa pagkadisipulo, ang atong kinabuhi mausab gayod kon mas makasabot kita kon kinsa gayod kita. Mosugyot ako og duha ka paagi diin kita makapalawom niini nga pagsabot.
Una, Pag-ampo
Samtang ang Manluluwas nagsugod sa Iyang mortal nga pangalagad, siya gigiyahan ngadto sa kamingawan aron “makig-uban sa Dios.” Tingali kinahanglan natong usbon ang atong panghunahuna gikan sa yano nga pagsulti sa atong mga pag-ampo ngadto sa paggahin og igong panahon nga tinuod nga makigsulti ug “makig-uban sa Dios” matag adlaw.
Akong nahibaloan nga ang kalidad sa akong mga pag-ampo molambo samtang mogahin ko og pipila ka minuto nga mangandam sa pakig-istorya sa akong Amahan. Ang mga kasulatan nagpakita kanato nga kini usa ka sumbanan nga epektibo. Bisan kon kini mao si Joseph Smith; si Nephi, ang anak nga lalaki ni Helaman; o si Enos, ang tanan adunay gamayng matang sa pagpamalandong ug paghinuklog sa wala pa ang ilang natala nga komunikasyon uban sa Dios. Si Enos miingon nga ang iyang kalag gigutom samtang ang mga pulong sa iyang amahan mituhop pag-ayo ngadto sa iyang kasingkasing. Ang matag usa niini nga mga ehemplo nagtudlo kanato sa panginahanglan sa espirituhanong pagpangandam alang sa atong panahon sa matag adlaw nga “makig-uban sa Dios.”
Ngadto sa mga Nephita, ang Manluluwas mitudlo, “Kon kamo mag-ampo, sulod sa inyong lawak, ug kon nasira na ninyo ang inyong pultahan, pag-ampo ngadto sa inyong Amahan.”
Diha man kini sa usa ka lawak o sa usa ka kwarto, ang baroganan mao ang pagpangita og usa ka dapit diin kamo mahimong mag-inusara sa pag-ampo, sa pagtugot sa inyong kalag nga magmalinawon, ug mobati sa mga pag-aghat sa “hinay nga hinagawhaw nga tingog.” Makaandam kita pinaagi sa pagpamalandong sa mga butang nga kita mapasalamaton ug sa mga pangutana o mga kabalaka nga gusto natong dad-on ngadto sa atong Amahan. Kinahanglang maningkamot kita nga dili magbaton og sinag-ulo nga paagi sa pag-ampo, apan makig-istorya sa atong Amahan, sa makusog nga tingog kon mahimo.
Akong naamgohan nga sa kagubot sa atong kinabuhi, kon kita nag-atiman sa mga bata o nagdali-dali taliwala sa mga miting, tingali wala kitay kahigayonan alang sa hilom nga mga lawak ug mahunahunaon nga pagpangandam—apan kadtong hilom, paspas, ug dinalian nga mga pag-ampo mahimong mas makahuluganon kon kita naningkamot nga “makig-uban sa Dios” sa sayo pa niana nga adlaw.
Mahimong adunay pipila nga wala mag-ampo sa dugay na nga panahon o uban nga wala mobati nga ang ilang mga pag-ampo gidungog. Mosaad ako kaninyo nga ang inyong Langitnong Amahan nakaila kaninyo, nahigugma kaninyo, ug gustong makadungog gikan kaninyo. Gusto Niyang makigsulti kaninyo. Gusto Siya nga makahinumdom kamo kon kinsa kamo.
Si Elder Jeffrey R. Holland bag-ohay lang mitudlo: “Bisan kapila pa kamo nag-ampo, pag-ampo pa og dugang. Bisan unsa pa kakusog kamo nag-ampo, pag-ampo pa og mas kusog.”
Agig dugang sa pagpalambo sa kapirmihon ug kamadasigon sa atong mga pag-ampo, ang pagtuon sa Basahon ni Mormon kada adlaw ug pagsimba diha sa templo makatabang sa pag-andam sa atong mga hunahuna alang sa pagpadayag. Samtang maningkamot kita sa pagpalambo sa atong komunikasyon ngadto sa atong Langitnong Amahan, Siya mopanalangin kanato nga mas mobati gayod nga kita Iyang mga anak.
Ikaduha, Hibaloi nga si Jesus Mao ang Kristo
Ang labing dako nga pagpakita sa gugma sa Langitnong Amahan alang kanato isip Iyang mga anak mao ang katinuod nga Iyang gipadala ang Iyang Anak, ang atong personal nga Manluluwas, aron sa pagtabang kanato nga makapauli. Busa, kita kinahanglan nga makaila Kaniya.
Mga tuig na ang milabay, samtang nagserbisyo isip presidente sa stake, misumiter ko og rekomendasyon alang sa usa ka brother sa pagserbisyo isip usa ka ordinance worker sa templo. Human sa pagpasabot kon unsa siya ka nindot nga mahimo nga ordinance worker, wala nako tuyoa nga napislit ang “Dili i-endorso” nga misumiter sa rekomendasyon. Human nga wala nagmalamposon sa pagsulay sa pagpabalik sa mensahe, akong gitawagan ang presidente sa templo ug miingon, “Nakahimo ko og dakong sayop.” Sa walay pagpanagana, kining maayo nga presidente sa templo miingon, “Presidente Eyre, walay bisan unsa nga imong nabuhat nga dili mapasaylo ug sa kataposan makorehian.” Pagkanindot nga kamatuoran. Gayod, si Jesukristo “gamhanan sa pagluwas.”
Niadtong 2019 dihay dakong kausaban sa mga pangutana sa rekomend sa templo. Kaniadto, ang usa ka pangutana nangutana kon aduna ka bay pagpamatuod sa tahas ni Jesukristo isip Manluluwas ug Manunubos. Kini karon nangutana kon ikaw ba adunay pagpamatuod sa Iyang tahas isip imong Manluluwas ug Manunubos. Ang Pag-ula ni Jesukristo dili lamang molihok alang sa uban; kini molihok alang kanimo ug kanako. Siya ang akong Manluluwas. Siya ang inyong Manluluwas. Sa tinagsa-tagsa. Pinaagi lamang Kaniya nga kamo ug ako makabalik aron makauban ang atong Amahan.
Mao nga, mga kaigsoonan, tinguhaon nato Siya. Atong tun-an ang Iyang balaan nga relasyon ngadto sa Amahan ug sa matag usa kanato. Atong sination ang awit sa matubsanon nga gugma nga personal nga moabot sa matag usa kanato pinaagi sa atong Manunubos samtang kita maghinulsol. Samtang kita makaila “kaniya kinsa gamhanan sa pagluwas,” atong masabtan nga kita, isip mga anak sa Dios, mao ang Iyang kalipay—ang Iyang labing importante nga gitutokan—ug sa pagkatinuod ang matag usa takos nga maluwas.
Ako nagpamatuod nga kita adunay usa ka mahigugmaon nga Langitnong Amahan. Samtang atong mahibaloan kini nga mahangtorong kamatuoran pinaagi sa gamhanang pag-ampo, personal nga pagpadayag, ug pagduol ngadto ni Jesukristo, kita mahimo karon ug sa kanunay nga maisogon nga mopahayag, “Ako anak sa Dios.” Sa ngalan ni Jesukristo, amen.