Ang Ebanghelyo ni Jesukristo: Ang Nag-awhag nga Tunog
Ang gipahiuli nga ebanghelyo nagdala og katuyoan ug hingpit nga kalipay kaninyo ug sa inyong panaw padulong sa kinabuhing dayon.
Light of Hope [Kahayag sa Paglaom], ni Simon Dewey
Samtang nagserbisyo isip lider sa misyon sa Japan pipila ka tuig na ang milabay, nagpahigayon ko og interbiyo sa usa ka tawo nga mipasakop sa Simbahan usa na ka tuig ang milabay ug nagtinguha nga makadawat og rekomend sa templo.
Atol sa among pag-istoryahanay, kining bag-o nga miyembro milarawan kon unsa kadako ang iyang pagpasalamat alang sa mga panalangin nga iyang nadawat sa tuig sukad sa iyang bunyag. Alang nako, siya nagpakita og pagsalig sa pakigsaad nga miresulta tungod sa iyang pagkasabot sa ebanghelyo, nga nakagamot na og maayo diha niya. Siya usa ka nakabig nga disipulo ni Jesukristo kinsa nakasinati og dako nga kausaban sa kasingkasing (tan-awa sa Mosiah 5:2).
Pagkahuman sa interbiyo, akong gisultihan ang presidente sa district nga nakadayeg kaayo ko nga ang mga misyonaryo ug mga miyembro nakakaplag, ug nakaamuma sa espirituhanong paagi, niana nga bantogan nga tawo nga dako kaayo og potensiyal.
Nakurat ko nga nakahibalo nga sa dihang kini nga tawo nagsugod sa pagpakigkita sa mga misyonaryo ug nagtambong sa simbahan, siya walay pinuy-anan ug hapit na diha sa walay paglaom nga kahimtang. Ang pagtuon sa ebanghelyo niini nga brother ug ang iyang pagkakabig sulod sa pipila ka bulan misangpot sa iyang milagroso nga kausaban, nagbutang kaniya sa dalan sa espirituhanon ug temporal nga pagbarog sa kinaugalingong paningkamot ug hingpit nga kalipay.
Ang ebanghelyo mihatag niini nga brother og tataw nga hulagway sa katuyoan sa iyang kinabuhi. Yano ug bililhong mga kamatuoran sa ebanghelyo ang naghatag niya og mga tubag sa mahinungdanong mga pangutana sa mortalidad. Ang mao nga mga panalangin parehas nga anaa alang ninyo ug sa tanang anak sa Dios pinaagi sa ebanghelyo ni Jesukristo.
Ang Katuyoan sa Kinabuhi
Ang ebanghelyo ni Jesukristo gipahiuli pinaagi ni Propeta Joseph Smith. Sa iyang kataposang pagpamatuod ngadto sa Simbahan, si Presidente M. Russell Ballard (1928–2023), nga kaniadto–Akting nga Presidente sa Korum sa Napulog Duha ka Apostoles, miingon:
“Kita nakaila kon kinsa ang Dios; kita nakaila kon kinsa ang Manluluwas, tungod kay kita adunay Joseph. …
“… Unsa kita ka bulahan nga mahibalo sa unsay atong nahibaloan mahitungod sa katuyoan sa atong kinabuhi, kon nganong ania kita dinhi, unsa ang atong paningkamotan nga buhaton ug tumanon sa atong inadlaw nga mga kinabuhi.”
Alang sa mga miyembro sa Ang Simbahan ni Jesukristo sa mga Santos sa Ulahing mga adlaw, kana nga kahibalo naglakip sa pagkasabot sa “hingpit nga plano” sa Dios sa kaluwasan, nga naila usab isip “ang mahinungdanong plano sa kalipay,” “ang plano sa katubsanan,” ug “ang plano sa kaluoy” (Alma 42:8, 11, 15). Ang plano sa Dios “mokuha sa walay kaseguroan sa wala pagkahibalo sa katuyoan sa atong kinabuhi ug sa ka walay kaseguroan gikan sa atong umaabot.” Mahinungdanon ug sentro niana nga plano ug ang katuyoan sa kinabuhi mao “ang doktrina ni Kristo.”
Pinaagi sa ebanghelyo, kita nakahibalo nga kita mga anak sa Dios, gipadala sa kalibotan aron sulayan ug maandam aron mabanhaw (tan-awa sa Doktrina ug mga Pakigsaad 76:39)). Kita nakahibalo sa mga sugo ug gitudloan aron “mahibalo sa maayo gikan sa daotan” (2 Nephi 2:5). Kita nakahibalo nga kita ania dinhi aron mohigugma ug moserbisyo ug nga ang Manluluwas mitawag kanato aron mabuntog ang kalibotan ug aron matabangan ang uban nga mohimo sa ingon (tan-awa sa Juan 16:33).
Ang gitawag ni Joseph Smith nga “nag-awhag nga tunog sa Ebanghelyo sa atong Ginoo nga si Jesukristo” molig-on nato atol sa lisod nga mga adlaw ug magdala og kahulogan ug katuyoan kanato ug sa uban.
Pagkamasulondon ug mga Panalangin
Ang Dios naghatag kanato og moral nga kabubut-on aron kita mahimong may tulubagon alang sa atong mga pagpili (tan-awa sa Doktrina ug mga Pakigsaad 101:78); tan-awa usab sa 2 Nephi 2:16). Isip kabahin sa “kaatbang sa tanang butang” (2Nephi 2:11), si Satanas gitugotan nga motental kanato nga gamiton sa dili sakto ang atong kabubut-on.
Sa atong panahon, ang Ginoong si Jesukristo mitawag kang Propeta Joseph Smith ug “namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17). Ang Ginoo nagpadayon sa pagpadayag sa Iyang mga sugo ug pagbuot ngadto sa Iyang mga propeta karon tungod kay Siya nagtinguha nga giyahan kita ngadto sa kalipay niini nga kinabuhi ug ngadto sa celestial nga himaya sa sunod nga kinabuhi.
King Benjamin Preaches to the Nephites [Si Haring Benjamin Nagsangyaw ngadto sa mga Nephita], ni Gary L. Kapp
Teaching True Doctrine [Pagtudlo sa Tinuod nga Doktrina], ni Michael Malm
Joseph Smith Preaching [Si Joseph Smith Nagsangyaw], ni Sam Lawlor
Ang pagkamasulundon sa mga sugo sa Dios kinahanglan maggikan sa atong debosyon ug gugma alang Kaniya. Si Jesukristo nagproklamar, “Kon nahigugma kamo kanako, tumana ninyo ang akong mga sugo” (Juan 14:15). Ang kataposang sangpotanan sa pagpakita sa atong gugma alang sa Manluluwas pinaagi sa pagtuman sa Iyang mga sugo mao ang mga panalangin nga magdala og kamaya ug hingpit nga kalipay (tan-awa sa Doktrina ug mga Pakigsaad 130:20–21).
Uban sa tataw nga panglantaw sa atong balaanong gigikanan ug padulngan, kita nakahibalo nga “ang mga butang gayod nga makapahimo sa [atong] mortal nga kinabuhi nga labing maayo nga kini mahimo mao gayod ang samang mga butang nga makapahimo sa [atong] kinabuhi hangtod sa kahangtoran nga labing maayo nga kini mahimo!”
Hingpit nga kalipay sa Inyong Panaw
Ang puno sa hingpit nga kalipay nga bag-ong kinabig nga akong nahimamat sa Japan mga tuig na ang milabay nakakaplag sa gipahiuli nga ebanghelyo ni Jesukristo pinaagi sa iyang pagkugi ug sa pagkugi sa mga misyonaryo ug mga miyembro. Siya nakadiskobre sa iyang katuyoan ug mipalapad sa iyang panabot sa mahinungdanong plano sa kalipay, nga nagdala niya og mga panalangin ug hingpit nga kalipay nga mibayaw niya sa temporal ug sa espirituhanong pamaagi.
Si Elder Patrick Kearon sa Korum sa Napulog Duha ka Apostoles nagtudlo:
“Tungod sa mahigugmaong plano sa atong Langitnong Amahan alang sa matag usa sa Iyang mga anak, ug tungod sa matubsanon nga kinabuhi ug misyon sa atong Manluluwas, si Jesukristo, kita makahimo—ug kinahanglan—nga mahimong labing hingpit nga malipayon nga mga tawo sa yuta! Bisan og ang mga unos sa kinabuhi sa gubot nga kalibotan mohapak kanato, kita makaugmad og usa ka nagtubo ug nagpadayon nga pagbati sa hingpit nga kalipay ug kalinaw sa kahiladman tungod sa atong paglaom kang Kristo ug sa atong pagsabot sa atong kaugalingong dapit diha sa matahom nga plano sa kalipay.”
Ako mohalad sa akong pasalamat alang, ug pagpamatuod sa, gipahiuli nga ebanghelyo ni Jesukristo ug sa mahinungdanong plano sa kalipay. Ako modapit kaninyo sa pag-ambit sa mga bunga sa ebanghelyo ug sa pagbati og dugang nga hingpit nga kalipay diha sa inyong panaw padulong sa kinabuhing dayon.