Pagpakigbahin sa Ebanghelyo … diha sa Parke sa mga Kalingawan?

Bag-ohay lang ko nga miadto sa usa ka parke sa mga kalingawan kauban ang pipila ka higala gikan sa simbahan. Samtang ang akong higala nga si Eve ug ako nagbarog aron molinya alang sa rollercoaster, usa ka batan-ong lalaki nga ginganlan og Erik ang misugod og pakig-istorya namo mahitungod sa iyang YouTube channel. Miistorya siya tingali mga 15 minutos mahitungod kon sa unsang paagi nga ang pipila ka tawo sa iyang eskwelahan mibugal-bugal kaniya ug misulti niya nga i-delete ang iyang channel.

Sa simbahan, ang among mga lider mihagit kanamo nga magdala og Alang sa Kalig-on sa mga Kabatan-onan nga giya ug ipakigbahin kini sa usa ka tawo. Si Erik mura og adunay problema sa iyang mga higala, mao nga naghunahuna ko nga tingali ang giya makatabang niya.

Ako kining gipagawas ug gisultihan siya nga iyaha na kini. Nangutana siya kon unsa kini, ug akong gipasabot nga gikan kini sa akong Simbahan ug nga kini makatabang niya nga makahimo og maayo nga mga desisyon ug magtudlo niya ug ubang nindot nga mga butang. Ako siyang gisultihan nga kinahanglan basahon niya kini kon duna siyay higayon. Miingon siya og OK, gisulod kini sa iyang bulsa, ug nagpadayon sa pag-istorya mahitungod sa iyang YouTube channel.

Wala ko kahibalo kon gibasa ba kaha niya ang giya, apan kini nga kasinatian nagtudlo nako nga ikaw mahimong misyonaryo sa bisan unsang edad, bisan asang dapit—bisan sa parke sa mga kalingawan.