Kon ang mga Pagsulay Daw Lisod Kaayo
Ang mga hagit kabahin sa kinabuhi. Apan uban sa tabang, makita nato kini pinaagi sa panglantaw sa Dios.
Ang Bukid sa Timpanogos usa ka bukid sa Utah, USA, nga 11,000 ka pye (3,353 m) ang gitas-on ug puno sa mga busay, mga bato nga bungbong, kasagbotan, ug ihalas nga mga hayop. Ang pagbarog sa tiilan sa usa ka bukid sama niini makapabati nimo nga gamay. Dili ka makakita sa ibabaw o sa palibot niini. Pwede kining tan-awon nga dako kaayo ug dili mahimong tungason.
Apan, ang 10 ka minuto nga pagbiyahe gikan sa Bukid sa Timpanogos magtugot nimo nga makita kini sa lahi nga paagi. Gikan niini nga panglantaw, imong makita ang mga agianan ug mga dalan nga gipasubay agi sa bukid. Kini nagpakita nga ang uban nakaadto na didto kaniadto ug nga adunay luwas nga agianan sa ibabaw ug sa palibot sa bukid.
Ang mga pagsulay sa imong kinabuhi karon tingali mabati nga susama ra. Ang pagsinati og lisod nga mga hagit makapabati nga sama sa pagtutok sa mga bukid nga dako kaayo nga dili nimo makita ang ibabaw o gani ang palibot niini. Daw mahimong dako kaayo kini ug tingali imposible nga maagian. Kadtong mga pagsulay tingali makapabati nimo nga gamay, napakyas, nahadlok, o nag-inusara.
Apan adunay laing butang nga pwedeng sulayan. Atras ug sulayi pagtan-aw ang imong mga pagsulay gikan sa lahi nga panglantaw—panglantaw sa Dios.
Tungod niini nga panglantaw, imo usab nga maamgohan nga wala ka mag-inusara sa pagsulbad sa imong mga problema. Aduna kay Amahan sa Langit nga nahigugma kanimo ug motabang kanimo. Ang uban, ilabi na ang Manluluwas, nakaagi usab og lisod nga mga panahon. Gusto Nila nga mohatag nimo sa giya nga imong gikinahanglan sa pagbuntog sa imong mga pagsulay, bisan ang dagko kaayo nga pagsulay.
Unsaon Nato Pag-usab ang Atong Panglantaw?
1 Sunda ang plano sa Langitnong Amahan.
Si Jesukristo mao ang atong hingpit nga ehemplo. Ang mga baroganan nga Iyang gitudlo yano, gamhanan, ug sayon nga sabton. Nagpasabot ba kana nga kanunayng sayon kini nga sundon? Aw, dili. Dili kanunay. Apan sa matag higayon nga kita mohimo sa pagsunod Kaniya pinaagi sa hugot nga pagtuo, ang atong panglantaw magsugod sa pagkausab. Atong sugdan sa pagtan-aw ang mga hagit isip mga oportunidad sa pagpangayo og tabang sa Manluluwas imbes pagtan-aw niini nga mga silot, mga lit-ag, o mga babag nga mopalayo kanato.
2 Pangayo og tabang sa Dios.
Ang Dios mao ang imong Langitnong Amahan. Nakaila Siya kanimo, nahigugma kanimo, ug andam nga motabang kanimo bisan kanus-a nga mohangyo ka. Si Presidente Russell M. Nelson mitudlo nga “ang panglantaw sa Ginoo molabaw sa inyong mortal nga kaalam. Ang Iyang tubag sa inyong mga pag-ampo makasorprisa ninyo ug motabang ninyo sa paghunahuna og celestial.”
Kon mag-ampo ka, ang Dios makatabang nimo nga makita ang mga butang nga dili nimo makita karon. Makagiya Siya nimo pinaagi sa imong mga pagsulay ug gani makahatag kanimo og kalinaw ug kalig-on samtang mosunod ka Kaniya.
3 Pangayo og tabang sa uban.
Ang Langitnong Amahan mibutang og maayo nga mga tawo diha sa imong kinabuhi nga makatabang nimo. Kon nanlimbasog ka sa mga hagit nga morag nag-ung-ong sa imong atubangan, ikonsiderar ang pagpakig-istorya sa masaligan nga sakop sa pamilya, usa ka higala, usa ka lider sa Simbahan, o sa imong bishop.
Ang pagpangayo og panalangin sa kahupayan ug giya sa usa ka takos nga tighupot sa pagkapari maoy laing talagsaong paagi nga makita ang imong kaugalingon ug ang kinabuhi pinaagi sa panglantaw sa Dios.
Klaro nga Makita
Sama sa usa ka higante nga bukid nga nagbarog diha mismo sa imong agianan, usahay ang imong mga pagsulay mora nga dako kaayo. Apan kon mosunod ka sa plano sa Dios ug tugotan Siya ug ang uban nga motabang nimo, imong makita ang imong mga hagit sa lahi nga paagi.
Mahimo kang moatras ug makakita nga adunay paagi aron mabuntog ang imong mga pagsulay. Si Jesukristo naghatag og dalan nga imong agian. Bisan unsa pa kadako sa imong mga pagsulay, ang Dios mas lig-on.