Human Niini nga Kinabuhi
Mga Tubag sa Pipila ka Pangutana
Ang plano sa Langitnong Amahan makahatag kanato og panglantaw ug kalinaw mahitungod sa kinabuhi human sa kamatayon.
Paghulagway pinaagi ni Thomas Arnaud
Unsa ang mahitabo human kita mamatay?
Tingali mao kini ang pangutana sa tanang relihiyon. Ang mga tubag nga atong maangkon pinaagi kang Jesukristo ug sa Iyang ebanghelyo gamhanan. Kini nga kinabuhi dili mao ang kataposan. Tungod kay si Jesukristo nabanhaw, ang atong mga espiritu magkauban pag-usab sa atong mga lawas, ug kitang tanan mabanhaw sa umaabot nga adlaw.
Siyempre, adunay ubang mga detalye mahitungod sa kinabuhi human sa kamatayon nga moabot kanato pinaagi sa modernong pagpadayag nga makatubag sa atong ubang mga pangutana. Ania ang pipila niana nga pangutana, uban sa pipila ka mubo nga mga tubag.
Unsay hitsura sa espiritu nga mga lawas?
Ang espiritu usa ka matang sa butang, lamang “labaw nga dalisay o putli” (Doktrina ug mga Pakigsaad 131:7). Ang espiritu nga mga lawas makita nga sama sa hamtong nga mga lawas sa tawo.
Asa ang kalibotan sa espiritu?
Unsay nahitabo sa kalibotan sa espiritu?
Uban sa laing mga butang, ang mga espiritu nga midawat sa ebanghelyo giorganisar nga mosangyaw sa ebanghelyo ngadto sa mga espiritu kinsa wala modawat sa ebanghelyo. Kadto nga mga espiritu makapili sa pagdawat o pagbalibad niini.
Unsay hitsura sa nabanhaw nga mga lawas?
Ang nabanhaw nga mga lawas dili mamatay, mga unod ug bukog, ug hingpit. Sila mahimayaon ug matahom. “Walay laing mas matahom nga tan-awon kaysa usa ka nabanhaw nga lalaki o babaye.”
Unsay nahitabo diha sa celestial nga gingharian?
Kadtong anaa sa labing taas nga ang-ang sa celestial nga gingharian mahimong sama sa atong Langitnong Amahan ug makasinati og kahingpitan sa kalipay. Sila makadawat sa tanan nga anaa sa Amahan. Sila moapil sa Iyang buhat ug himaya. Naselyo sila sa kaminyoon alang sa kahangtoran ug karon nagpuyo sa mahangtoron nga mga pamilya, adunay mahangtorong espiritu nga mga anak sa ilang kaugalingon.
Unsa kaha ang mga tawo nga wala magminyo niini nga kinabuhi?
Ang Langitnong Amahan hingpit nga makiangayon ug maluluy-on. “Ang Ginoo misaad nga sa kahangtoran walay panalangin nga ihikaw sa iyang mga anak kinsa nagtuman sa mga sugo, mga matinuoron sa ilang mga pakigsaad, ug nagtinguha sa unsay matarong.”
Ang akong mga ginikanan naselyo didto sa templo, apan karon sila nagdiborsyo. Kang kinsa ako naselyo?
Mahimong kamo “natawo diha sa pakigsaad” (nga mao, natawo human maselyo ang inyong mga ginikanan diha sa templo), o tingali naselyo ka sa inyong mga ginikanan sa templo human sila maselyo sa usag usa. Sa bisan hain nga sitwasyon, ang inyong mga panalangin magpabilin nga matuman bisan kon ang inyong mga ginikanan mopili nga magdiborsiyo ug ikanselar ang ilang pagselyo.
Ang mga pagpili sa inyong mga ginikanan dili makaapekto sa inyong mga panalangin. Ang importante nga kamo magpabilin nga matinud-anon ug magtinguha sa mga panalangin sa templo sa inyong kaugalingon. Kalabot sa inyong mga relasyon sa pamilya, kamo kinahanglan nga “[mo]salig sa Ginoo ug magtinguha sa Iyang paghupay,” sa pagkasayod nga ang “Langitnong Amahan moseguro nga ang matag tawo makadawat sa matag panalangin sumala sa iyang mga tinguha ug mga pagpili.”
Unsay mahitabo ngadto sa mga tawo nga namatay pinaagi sa paghikog?
Wala kita makahibalo kon unsay mahitabo sa mga tawo nga namatay pinaagi sa paghikog, ug dili nato sila hukman (sama sa tanang mga tawo, sa kataposan). “Bisan pa sa labing maayong mga paningkamot sa mga minahal, mga lider, ug mga propesyonal, ang paghikog dili kanunay nga mapugngan. …
“Dili sakto alang sa usa ka tawo nga iyang kutloon ang iyang kaugalingong kinabuhi. Hinuon, ang Dios lamang ang makahimo sa paghukom sa mga hunahuna, mga aksiyon, ug lebel sa pagkamaytulubagon sa tawo (tan-awa sa 1 Samuel 16:7; Doktrina ug mga Pakigsaad 137:9). …
“Kadtong kinsa nawad-an og minahal tungod sa paghikog makakaplag og paglaom ug pagkaayo diha ni Jesukristo ug sa Iyang Pag-ula.”