Te mana taui o te tāvinira’a i te hiero

I te matahiti 2000, ’ua fārerei au ia Paul Coward nō te taime mātāmua i Sydney, i tō’u haerera’a ’e tō’u ’utuāfare mai Perth mai nō te rave i te ’ohipa. I te reira taime, tē tāvini ra ’o Paul ’ei peresideni nō te titi nō Sydney Auteraria Greenwich, ’e ’ei Fa’atere nō te mau ’ohipa pae tino nei nō te ārea Pātitifa. ’Ua pi’ihia vau ‘ei tauturu i roto i te ’ēpisekōpora’a ’āpī i roto hō’ē matahiti, ’e ’ua ha’afātata atu te reira ia mātou. I te roara’a o te mau matahiti, ’ua māuruuru vau, ’eiaha noa tāna arata’ira’a, tōna ato’a rā ti’aturira’a hōhonu nō ni’a i te tāvinira’a i te hiero.

‘Ua fa’aea ’o Paul i tāna ’ohipa i te matahiti 2020 ’e i teienei, tē tāvini nei ‘oia ’e tāna vahine, ’o Julie, i roto i te hiero nō Hamilton i Niu Terani, tei ’īriti-fa’ahou-hia ’aita i maoro a’e nei. ’A feruri ai ’oia i ni’a i te mau hi’ora’a hōhonu i te pae vārua tāna i fāri’i ’a feruri ai ’oia i tōna mau ’itera’a ’ei ’ēpisekōpo, ’ei peresideni titi, ’ei peresideni misiōni, ’ei Hitu ’Ahuru Ārea, ’e ’ei fa’atere nō te mau ’ohipa pae tino nei. Noa atu ē, ’ua ha’apūai teie mau pi’ira’a iāna iho, ’ua fa’auru-rahi-hia ’o Paul ’e te mau tusia a te mau melo ha’apa’o maita’i ’o tē patu nei i te bāsileia ’o te Atua i ni’a i te fenua nei nā roto i te ha’amorira’a i te hiero.

’Ua vaiiho te tahi ’ohipa ta’a ’ē i te hō’ē mana’o mau i ni’a iāna. ’A tāvini ai ’oia ’ei Hitu ’Ahuru Ārea, tē tomo rū ra ’o Paul i roto i te hiero, ’ite atura ’oia i te hō’ē rū’au e haere marū noa mai ra i rāpae i te hiero. ’Ua hi’o noa tōna mata i ni’a i taua ta’ata ruhiruhia, ’e i taua taime ra, ’ua muhumuhu maira te vārua i roto iāna, « E ta’ata mo’a oia ». ’Aita roa atu ’o Paul i fārerei a’enei iāna, ’e ’aita teie ta’ata i fāri’i i te hō’ē ti’ara’a teitei. Teie rā, ‘ua fa’a’ite te Atua iāna ’ei ta’ata mo’a. ‘Ua ’ite a’era ’o Paul ē, ’ia tomo ana’e tātou i roto i te fare o te Fatu, e tae mai te hō’ē tuha’a ’o tōna mo’ara’a i ni’a ia tātou, ’e e ’āfa’i tātou i te reira ’ia ho’i ana’e tātou i tō tātou mau fare.

’Ua tauturu ato’a te vahine a Paul, ’o Julie, iāna ’ia hi’o hōhonu a’e i te tāvinira’a i te hiero. I roto i tāna ’ohipa ’ei Hitu ’Ahuru Area, tītauhia iāna ‘ia ’āmui atu i roto i te mau ’āmuira’a titi e rave rahi, ’e ’ia ho’i ana’e ’oia i te fare, pinepine ’o Julie i te ui mai iāna, « E aha te huru te ’āmuira’a ? » E pāhono oia, « Maita’i roa ».

’Ia ui ana’e ’oia ē, « E aha te huru tā ’oe mau a’ora’a ? » e parau mai ïa ’oia ē, « Iā’u e mana’o, ’ua haere maita’i te reira ». Ma te hi’opo’a tāmau, e pāhono ’o Julie, « Tē ti’aturi nei au ē, ’ua tere maita’i te mau mea ato’a, terā rā, e ’ere te horo’ara’a i te hō’ē a’ora’a maita’i nā ni’a mai i te terono i te ’ohipa fifi roa ». ’Ua fa’aro’o noa ’o Paul ma te māere, ’a parau ai ’oia ē : « E ravehia te ’ohipa mau ’ia putapū ana’e te māfatu, ’e ’ia fa’aotihia te ’ohipa a te Fatu i roto i te mau fare o te mau melo ’e i roto i te fare o te Fatu ».

’Ua fāri’i mai iho ā ïa ’o Paul. Mai te mea e hina’aro tātou ’ia ha’atihia tātou i roto i te mau rima pāruru o te Fa’aora, ’ia pārahi tātou i roto i te hiero e ti’a ai. Mai te mea e hina’aro tātou i te mana ’ia fa’aorahia tātou i roto i te fa’ateiteira’a, ’ia upo’oti’a i ni’a i te mau mana o te ao nei, ’ia ha’api’i ’e ’ia fa’ateitei i te feiā tei herehia e tātou, ’e ’ia ’aro te Fatu i tā tātou mau ’arora’a, ’ia pārahi tātou i roto i te hiero e ti’a ai.

Te feiā haere hiero, teie mau taea’e ’e mau tuahine « mo’a » ’e te feiā rave ’ohipa ha’apa’o ’o tē tāvini nei i roto i te bāsileia o te Fatu, ’ua riro mau rātou ’ei miti nō te fenua nei. E mau vārua fa’afāriuhia rātou, te pāpū ’e te ‘āueue ’ore. Tē ha’afaufa’a nei rātou i tā rātou mau fafaura’a, ma te ora i te hō’ē orara’a ha’apa’o ’e te tusia. ’Ua ha’api’i mai ’o Paul nā roto mai i tōna iho ’itera’a ē, ’o teie te tāviri nō te pāturu i te fa’afāriura’a ia Iesu Mesia ’e tāna ’evanelia.

E’ita te fa’afāriura’a mau e tupu nā roto i te mau hōho’a i rāpae, nā roto rā i te mau ’ohipa fa’aro’o tāmau ’e te hau. Nā te mau ha’api’ira’a tumu, te mau ’ōro’a, ’e te mau fafaura’a faufa’a roa e niu ia tātou i roto i te ’evanelia. E ha’amaita’i ’e e ha’apūai te ha’amorira’a tāmau i te hiero i te ti’ara’a pipi mai tā te tahi atu mea e ’ore e nehenehe e rave.

Tē fa’a’ite nei ’o Paul i tōna māuruuru hōhonu nō te mau ’itera’a pāpū ’e te tāvinira’a mo’a a te feiā rave ’ohipa ’e te feiā fa’atere o te hiero. ’Ua riro tō rātou fa’aro’o ’ei fa’a’itera’a ē, te tupura’a rahi roa a’e i te pae vārua, e tupu ïa nā roto i te ’ohipa mo’a ’e te hau o te hiero, ’eiaha rā nā roto i te mau ’ohipa rahi. Nō te mea ho’i ē, i roto i te hiero, te Fare o te Fatu, e ’itehia ai te mo’ara’a mau.