’Āhiri e ’Ēkālesia tā te Atua i te fenua nei

Nā Nicolas Watbled, Salies de Béarn, Farāni

’Ua parau vau i te mau misiōnare ’eiaha e ha’amāu’a i tō rātou taime, ē e ti’aturira’a iho ā tō’u. I muri iho rā, ’ua ha’api’i mai au ē, ’ua tū’ati tā rātou mau ha’api’ira’a i tō’u mau ti’aturira’a nō te ’utuāfare, te hō’ē Metua here i te ao ra ’e te ’Ēkālesia a te Fa’aora.

I tō’u ’āpīra’a, ’ua ’āfa’i tō’u nā metua iāu i roto e rave rau ’ēkālesia. I muri a’e, i tō’u fāito taure’ara’a, ’ua ha’amata vau i te fāriu atu i ni’a i te Atua ’e i te tai’o i te Bibilia. ’Ua ’ite au te maita’i.

’A feruri ai au i te Atua ’e te fā o te orara’a, ’ua ’ite a’era vau e mea faufa’a ’ia fa’ari’i i te hō’ē ’utuāfare. ’Ua ti’aturi vau ē, e ti’a i te feiā fa’atere o te ’ēkālesia ’ia ha’api’i nā roto i te hi’ora’a, i roto rā i te ’ēkālesia tā’u e haere nei, ’aita te mau pōpe i fa’aipoipohia. ’Aita te reira e aura’a nō’u. ’Ua ti’aturi vau ē, e mea maita’i ’ia fa’aipoipohia ’e ’ia fa’ari’i i te hō’ē ’utuāfare.

I te 16 o tō’u matahiti i taua taime ra. E hoa tamāhine tō’u ’o tā’u i here roa, ’ua fa’aru’e mai rā ’oia iā’u. ’Ua riro te reira ’ei fifi rahi nō’u. ’Ua māuiui rahi roa vau fātata i te roara’a e hō’ē matahiti. Nō teie ’ohipa i tupu, ’ua hina’aro vau ’ia māramarama nō hea mai au, nō te aha vau i vai mai ai i te fenua nei, e aha te fā o te orara’a ’e e aha te ’ohipa e tupu i muri mai i te pohe. ’Ua hina’aro vau ’ia ’ite mai i te pāhonora’a i teie mau uira’a. I muri a’e rā i te feruri-maoro-ra’a i te reira, ’ua fāriu fa’ahou vau i ni’a i te Atua ’e ’ua parau vau iā’u iho, « ’ua ’ite te Rahu o te ora i te orara’a hau atu iā’u nei. E ti’a iā’u e fa’ari’i i te mau pahonora’a nā roto mai iāna ».

I tō’u tai’ora’a i te Bibilia, ’ua ha’api’i mai au ē, ’ua pi’i Iesu hō’ē ’ahuru ma piti ’āpōsetolo. « Mai te peu e ’ēkālesia tā te Atua i teienei mahana », ’ua mana’o vau, « tē vai ra ïa i roto te mau ’āpōsetolo ». ’Ua fa’ahina’aro-rahi-roa-hia vau e te ha’apa’ora’a fa’aro’o, ’e ’ua hina’aro vau ’ia bāpetizohia vau.

’A paraparau ai au nō te Atua i tō’u metua tāne, ’ua parau mai ’oia iā’u ē, e mea ti’a te Atua. ’Ua parau ’oia, ’ātīrā ’ia bāpetizohia ’oe ’ia fa’aorahia ’aore rā ’ia fa’aūtu’ahia ’oe i hade ē a muri noa atu. ’Aita vau i hina’aro e ti’aturi ē, e ’oa’oa te hō’ē Metua here i te ao ra ’ia ’āfa’ihia atu tāna mau tamari’i i hade ē a muri noa atu, nō te mea noa ’aita rātou i bāpetizohia. E aha ïa te parau nō te feiā tei ’ore i fāna’o ’ia bāpetizohia ?

I Farāni, e mea iti roa te feiā e ti’aturi nei. E mau hoa maita’i tō’u, ’aita rā rātou i bāpetizohia. ’Ua fa’aoti a’era vau ē, e ’ere i te mea tano ’ia feruri ē, e haere pā’āto’a rātou i hade.

Nō reira, ’ua fa’aoti au e fa’atupu i tō’u iho ti’aturira’a. ’Ua ti’aturi au i te hō’ē Atua e mea maita’i hope roa tōna aroha, ’e ’o tē rave nei i te mau mea ato’a nā roto i tōna mana ’ia fa’aora i tāna mau tamari’i. Mai te mea e’ita tāna mau tamari’i e hina’aro e fa’ari’i i tōna hanahana, ’o te mea ïa tā rātou i mā’iti. E hōro’a rā ’oia ia rātou i te tahi taime.

Hō’ē ho’ira’a i muri nō te fa’afāriura’a

I te hō’ē mahana, ’ua ha’aputapūhia e piti nāu misiōnare rave tāmau e ’ohipa ra i roto i tō’u ’oire iti, e ho’i i muri nō te ho’i i te fare. I ni’a i te pūromu ho’ira’a i te fare, ’ua fārerei atu rāua i tō’u metua vahine. ’Ua tāpe’a tō’u metua vāhine ia rāua ’e ’ua fa’anaho i te hō’ē fārereira’a nō’u ia rāua. ’Aita vau i ’oa’oa roa i te reira. ’Aita vau i hina’aro e paraparau ia rāua. ’Ua mana’o vau e parau mau rāua, « e ti’a ia ’oe e fa’aro’o mai ia māua. E ti’a ia ’oe e ti’aturi i te mea tā māua e parau atu ia ’oe ».

I te taera’a mai te mau misiōnare i tā mātou fārereira’a, ’ua parau atu vau ia rāua, « ’eiaha e ha’amāu’a i tō ’ōrua taime. E mau ti’aturira’a tō’u iho. Te mea tā ’ōrua e rave nei e mea maita’i, tē ti’aturi nei rā vau ē e mea faufa’a roa te ’utuāfare. Tē ti’aturi nei au ē, e ti’a i te feiā fa’atere o te ’Ēkālesia ’ia fa’aipoipohia. Tē ti’aturi nei au ē, e ti’a i te hō’ē ’Ēkālesia ’ia vai e hō’ē ’ahuru ma piti ’āpōsetolo. Tē ti’aturi nei au ē, e fa’aora te Atua e rave rahi o tāna mau tamari’i mai tāna e nehenehe. ’E aita vau e ti’aturi nei i te puhipuhira’a ’ava’ava ’e i te inura’a ’ava ».

’Ua ha’amāerehia vau i te ha’api’ira’a mai i tā rāua ha’api’ira’a e tū’ati i tō’u mau ti’aturira’a. ’Ua hōro’a mai rāua i te Buka a Moromona ’e ’ua ani mai iā’u ’ia tai’o ’e ’ia pure nō te reira. ’Ua putapū vau i te Vārua ’a tai’o ai au i te buka, ’e ’ua putapū vau i te reira ’e te mau misiōnare. ’Ua mana’o rā vau, « penei a’e tē fa’atupu noa ra vau i teie mau mana’o maita’i roa ».

’Ua pure au ’e ’ua fa’ari’i au i te pāhonora’a i roto i te hō’ē moemoeā. I roto i tā’u moemoeā, ’ua ’īriti au i te Bibilia. I roto i te Bibilia tē vai ra te mau parau iti tāpa’o ’e te mau buka ta’a ’ē o te Bibilia. Tē parau ra te parau iti tāpa’o hōpe’a « Moromona ». ’Ua tauturu teie poro’i iā’u ’ia māramarama ē, hō’ē ā ’evanelia e vai ra i roto i te Bibilia ’e te Buka a Moromona (hi’o Ezekiela 37:15–19).

’Ua ha’apūai-fa’ahou-hia tō’u ’itera’a pāpū e te tahi atu mau ’ohipa i tupu nō te tai’ora’a ’e te ’imi-māite-ra’a i te Buka a Moromona. I te ’anira’a mai te mau misiōnare iā’u ’ia bāpetizohia, ’ua fa’ari’i au ma te ’oa’oa. ’Ua bāpetizo-mau-hia vau hō’ē matahiti i muri a’e i te fa’aru’era’a mai tō’u hoa tamāhine iā’u. ’Ua tāpa’o tō’u bāpetizora’a i te hō’ē tauira’a rahi i roto i tō’u orara’a. ’Ua ’aramo’e te tahi mau hoa tō’u i tō’u tomora’a mai i roto i te ’Ēkālesia, ’ua fa’ahoa mai rā vau i te mea ’āpī i roto i te ’āma’a tā’u e haere nei.

Te taea’e Watbled ’e tōna ’utuāfare — « ’Ua ’āfa’i mai te ’evanelia iā’u e rave rahi māramarama ’e te poupou », tē nā reira ra o Nicolas. « ’Ua ha’amaita’i te Atua iā’u. ’Ua fārerei au i te hō’ē vahine maita’i ’e e toru tā māua tamāhine maita’i ».

’Ua hōro’a mai te ’evanelia iā’u e rave rahi māramarama ’e te poupou. ’Ua ’ī au i te Vārua ’e te ’oa’oa. ’Ua mana’o vau, « te mau mea ato’a tā’u i māuiui nā mua a’e nei ’ua hōpoi mai iā’u i’ō nei ».

’Ua ha’amaita’i te Atua iā’u. ’Ua fārerei au i te hō’ē vahine maita’i, ’e e toru tā māua tamāhine maita’i. E piti o rātou tei tāvini i te hō’ē misiōni, ma te tauturu ia vetahi ’ē ’ia ta’a i te mea tā’u i māramarama e rave rahi matahiti i teienei : « ’Ua riro te ’utuāfare ’ei pū nō te ’ōpuara’a a Tei Hāmani nō te hope’a mure ’ore nō tāna mau tamari’i », « te feiā pohe ’o tē tātarahapa e fa’aorahia ïa, nā roto i te ha’apa’ora’a i te mau ’ōro’a nō te fare o te Atua » (Te Ha’api’ira’a Tumu ’e te mau Fafaura’a 138:58), ’e ’ua pi’i te Fatu i te mau ’āpōsetolo ’e te mau peropheta i tō tātou nei ’anotau nō te arata’i i tāna ’Ēkālesia (hi’o Ephesia 2:20).