’Ua arata’i te Fatu iā’u i tō’u fenua

Fa’ahōho’ara’a nā David Malan

’A fa’aineine ai au i tā’u parau tū’ite taote ’e te ha’api’ira’a i te pehe i te fenua Marite, ’ua tūtava noa vau ’ia ora i te ’evanelia ’e ’ia putapū i te fa’aurura’a a te Atua i roto i tō’u orara’a. Mea ātea roa vau i tō’u fenua ’e i te tahi taime e ’ite au i te vai ’ōtahira’a, e ’ite rā vau i tōna here ’e tōna reo i te arata’ira’a i tā’u mau fa’aotira’a.

I te hō’ē mahana, ’ua tae mai te mana’o iā’u e ho’i au i tō’u fenua ’āi’a i Pōrīvia. E ’ere te ho’ira’a i te hō’ē fa’aotira’a tā’u i rave mai terā noa. E tere maita’i te mau ’ohipa. I muri a’e i te purera’a, ’ua putapū pūai au i te hina’aro e ho’i, nō te mea tē tīa’i mai ra te hō’ē ’ohipa faufa’a rahi iā’u.

I muri a’e i tō’u ho’ira’a, ’ua ’īriti te parau tū’ite tuatoru tuha’a rua nō te pehe i roto i te hō’ē o te mau fare ha’api’ira’a teitei maita’i roa nō Pōrīvia, i reira te noa’ara’a iā’u te hō’ē ’ohipa ’ei ’orometua tuatoru.

I roto i tā’u pāroita tumu, ’ua fārerei ’oi’oi atu vau i te hō’ē tamāhine ’āpī ’o tā’u i ’ore na i ’ite nā mua a’e nei. ’Ua fa’afāriuhia tōna nā metua i te ’Ēkālesia, ’a fa’aineine ai au nō te tere atu i te fenua Marite a tau matahiti i teienei. ’Ua ha’amata māua i te arapae ’e ’ua fa’aipoipo, ’ua riro te reira ’ei ha’amaita’ira’a rahi i roto i tō’u orara’a.

’A piti matahiti i teienei, ’ua ’itehia e ma’i māriri ’aita’ata i tō’u māmā rū’au. E mea fātata roa māua. I tō’u ’āpīra’a, ’ua parau mai ’oia iā’u, « e vai noa ’oe i pīha’i iho iā’u, ’e ’ua ’ite au ē e aupuru maita’i ’oe iā’u ».

Nō te mea ’ua ho’i mai au i te fare, tei reira vau i te taime e hina’aro ai ’oia iā’u, ’ua rave au i te taime nō te fa’aea i pīha’i iho iāna i tōna mau mahana hope’a. ’Aita ’oia i riro mai ’ei melo nō te ’Ēkālesia hou tōna pohera’a, ’ua here rā ’oia i te ve’a Liahona te Buka a Moromona ’e te ’āmuira’a rahi. « Tē ti’aturi nei au i te mau mea ato’a », ’ua parau ’oia.

I muri a’e, ’ua ha’amaita’ihia vau ’ia vai i roto i te hiero nō Cochabamba i Pōrīvia ’e tō’u nā metua, ’a tā’atihia ai tō’u māmā rū’au i tāna tāne fa’aipoipo, tei pohe i tōna ’āpīra’a. ’Aita ’oia i fa’aipoipo fa’ahou. ’Ua putapū vau ē, tei reira rāua i roto i te hiero ’e ’o mātou, ’oa’oa ’e ’āmui-fa’ahou-hia. Te hi’ora’a i tō’u nā metua i roto i te piha tā’atira’a e ti’a ra ’ei mono nō rāua, ’ua riro ’ei hi’ora’a nehenehe mau.

’Aita tātou i ’ite e nāhea te mau mea ’ia tupu mai i roto i tō tātou orara’a, ’ua ’ite rā te Fatu i hea tātou e ti’a ’ia vai. ’Ua ’ite ato’a ’oia e nāhea i te ha’amaita’i ia tātou, ’e e arata’i ’oia ia tātou ’ia rave nōna nō te ha’amaita’i ia vetahi ’ē e ti’a ai. Mai te mea e ti’aturi tātou i tōna pa’ari ’e tāna arata’ira’a, ’ua ’ite au e nehenehe ’oia e rave rahi atu ā i tō tātou orara’a, i tā tātou iho e nehenehe e rave ’o tātou ana’e.