Nā roto i te ’opuara’a hanahana : Te mau ha’api’ira’a a te mau ’āpōsetolo nō ni’a i te ’utuāfare

« ’Ua fa’ata’a te Fatu i te ’utuāfare ’ia riro ’ei ’āmuira’a tumu nō te ’Ēkālesia ’e nō te sōtaiete ». E nehenehe te mau ’utuāfare e riro ’ei tāne ’e ’ei vahine fa’aipoipo ’e te mau tamari’i, ’e e nehenehe ato’a rātou e riro ’ei ta’ata ’ōtahi, ’ei metua ’e ’ei tamari’i ’ōtahi, ’aore rā ’ei tāne ’e ’ei vahine fa’aipoipo ’aita e tamari’i. ’E i te tahi taime, e nehenehe teie mau ’utuāfare e fa’aō mai i te tahi atu mau fēti’i. Noa atu te huru ’o tō tātou fa’aipoipora’a ’aore rā tō tātou iho orara’a, e melo tātou tāta’itahi nō te ’utuāfare o te Atua, e melo tāta’itahi tātou nō te hō’ē ’utuāfare i te fenua nei, ’e tē fa’aineine nei tātou tāta’itahi ’ia riro ’ei mau metua mure ’ore.

Nō te tau mileniuma, ’ua poro te mau peropheta ’e te mau ’āpōsetolo i te mo’ara’a o te ’utuāfare ’e ’ua fa’aara rātou i te mau ’ati rahi o tē topa i ni’a i te ta’ata hō’ē, te mau nūna’a ’ e te ao mai te mea ’aita te mau ’utuāfare i fa’ahereherehia ’e i pāruruhia. Teie te tahi mau parau fa’auruhia nō roto mai i te mau peropheta ’e te mau ’āpōsetolo nō ni’a i te ’utuāfare ’e te faufa’a rahi o « Te ’utuāfare : E Poro’i i tō te Ao nei ».