Tē hina’aro nei au ’ia riro mai ia ’oe

Fa’ahōho’ara’a nā David Malan

I muri a’e i te hō’ē mahana roa ’e te hepohepo, tei ’ī i te mau ’arora’a tei tae mai nā roto i te ha’apa’ora’a e toru tamari’i ’āpī, te mea noa tā’u i hina’aro roa, e hapu i te pape ’e e haere e ta’oto.

’Ua huti hōhonu vau i te aho ’e ’ua haere atu i roto i tō’u piha nō te tāmarū iā’u. I te reira taime ’ua tomo mai tā māua tamāhine e pae matahiti ’e ’ua fa’aha’amana’o mai iā’u ē, nōna te taime nō te uiuira’a ta’ata hō’ē tā’āva’e ’o tā tā’u tāne ’e ’o vau nei i ha’amata i te rave nōna ’e tā māua tamaiti e toru matahiti. E ui atu māua ia rāua i te mau uira’a nō ni’a i te mau mea e au-roa-a’e-hia e rāua, ’e te mea tā rāua e au i te fare ha’api’ira’a tamahou ’aore rā i te fare purera’a. I muri iho e fa’aha’amana’o māua ia rāua ē, e tamari’i rāua nā te Atua ’e ’ua here roa māua ia rāua.

’Ua au roa vau i teie mau ’āparaura’a, ’aita rā vau e putapū nei i te pae tino ’aita ato’a i te pae ferurira’a i te reira. ’Ua ha’amata vau i te parau i tā’u tamāhine e tupu tā mātou paraparaura’a ananahi pō, ’ua ’ite rā vau e mea faufa’a roa tā mātou ’āparaura’a nōna.

« Nā reira ïa », ’ua parau vau ma te rohirohi, « e haere ana’e e ti’i ia pāpā ».

’Ua pārahi atu mātou to’otoru i ni’a i te ro’i ’e ’ua ha’amata i tā mātou ’āparaura’a. I muri a’e i tō tā’u tāne haerera’a i rāpae i te piha ma’a taime ri’i, ’ua ui atu vau i tā māua tamāhine, « e aha tā ’oe e hina’aro e rave ’ia pa’ari ana’e ’oe ? »

’Aita vau i ineine nō tāna pāhonora’a : « Mai ia ’oe ».

’Ua tahe tō’u roimata ’e ’ua ’ī tō’u ’ā’au i te ’ā’āina. ’Ua putapū roa vau i te hi’ora’a tā tā’u tamāhine e hi’o nei iā’u, ’ua putapū rā vau i te ahoaho teimaha tei tupu mai nā roto mai i te ri’ari’a ’ia ’ore e tano. ’Ua feruri au i te mau tumu ato’a nō te reira ’aita vau i riro ’ei hi’ora’a maita’i nō tā’u mau tamari’i, ’e ’ua ’ite pāpū maita’i au i tō’u mau hapehape.

I muri a’e i taua pō ra ’a pure ai au, ’ua ani au ma te itoito i te Metua i te ao ra ’ia tauturu mai iā’u ’ia riro ’ei hi’ora’a maita’i a’e nō tā’u tamāhine, ’e ’ia ti’a-mā a’e nō tāna fa’ahiahiara’a. I taua iho taime ra, ’ua ninahia vau e te hō’ē vāve’a tamāhanahana rahi, te tīa’ira’a ’e te here. ’Ua ’ite a’era vau i te māuruuru rahi tā tō’u Metua i te ao ra ’e te Fa’aora e putapū nei nō’u, nō te mea noa ’ua riro vau ’ei metua vahine ’o tē tūtava nei ’ia maita’i roa a’e. ’Ua ’ite rāua i tā’u mau tauto’ora’a ’e tei reira rāua nō te tauturu iā’u ’ia riro ’ei metua vahine ’e ’ei tamāhine tā rātou e hi’o nei i roto iā’u.

’Ua ’ite au ma tō’u ’ā’au ato’a ē, ’ua ’ite pāpū maita’i te Atua ia tātou ’e ’ua here ia tātou ’e nā roto i « te mana ha’amana o te tāra’ehara a te Fa’aora », e nehenehe tātou e riro mai i te mea tā tātou e tīa’i nei ’ia riro mai.