’Ua fa’a’oa’oa ’oe i tō ’oe māmā rū’au

Ma te pa’arira’a ’e te nā metua tari’a turi, ’ua ’ite pāpū roa vau ē e mea ta’a ’ē tō’u ’utuāfare. I tō’u ’āpīra’a, ’aita e ta’ata nō te ’īriti te parau nō tō’u nā metua i te mau rurura’a ’aore rā i te mau ’ātivite a te ’Ēkālesia, nō reira ’aita mātou e haere pinepine atu.

E ’ite pinepine noa vau iā’u iho mai te hō’ē ta’ata ’ē’e, ma te hina’aro i te mea tā vetahi i roto i tā’u pāroita e fāna’o nei—hō’ē ’utuāfare e pure nei ’e e ha’api’i ’āmui nei.

I te fātatara’a te hope tā’u matahiti hōpe’a i te fare ha’api’ira’a tuarua, ’ua ha’amata mātou i te itoito mai i roto i te ’Ēkālesia. ’Ua tā’atihia tō’u nā metua i roto i te hiero nō Mesa Arizona, ’e e piti o tō’u nā e maha taea’e ’e tuahine ’e ’o vau nei tei tā’atihia ia rāua.

E pae matahiti i muri mai, tē fa’aineine ra vau ’ia fa’ari’i i tō’u iho ’ōro’a hiero ’e ’ia fa’aipoipohia i te hiero. I te pō hou tō’u tā’atira’a i te hiero, ’ua haere atu tō’u taea’e ’e tāna vahine i te hiero nō te rave i te ’ohipa monora’a nō nā metua o tō’u metua vahine, ’ei fa’aineinera’a nō tō rāua tā’atira’a i te mahana nō muri iho. ’Ua fa’afāriuhia tō’u metua vahine fātata e 20 matahiti i taua taime ra, ’e ’ua hina’aro roa ’oia e ha’amata i te ’ā’amu o tōna ’utuāfare ’e te ’ohipa hiero.

I te mahana nō muri iho, ’ua tā’atihia tō mātou nā metua tupuna i te tahi ’e te tahi, ’ua ti’a atu fa’ahou tō’u taea’e ’e tāna vahine ’ei mono. ’O te mahana ïa o tō’u fa’aipoipora’a, ’oia mau, ’ua riro rā te reira ’ei aura’a faufa’a mau nō’u. Tō’u nā metua tupuna ’o tā’u i ’ore na i fārerei, tē ’āmui mai nei i teie mahana ta’a ’ē ’e ’o vau nei.

Tau mahana i muri mai, ’a ’īriti ai māua tā’u tāne i te mau tao’a hōro’a nō te fa’aipoipora’a, ’ua ’ite atu māua i te hō’ē tao’a hōro’a ta’a ’ē mau tei pūpūhia mai e te tuahine fēti’i mātāmua o tō’u māmā rū’au. E vahine pae fa’aro’o ’oia e mea fātata roa ’oia i tō’u māmā rū’au. Te tao’a hōro’a ’o te hōho’a ïa o tō’u māmā rū’au i tōna iho mahana fa’aipoipora’a. Tē parau ra te tāreta e ’āpe’e ra « ’ua ’oa’oa roa tō ’oe māmā rū’au ’e ia ’oe ’e tē hi’o mai nei ia ’oe nā ni’a mai ».

’Aita teie tuahine fēti’i i ’ite i te faufa’a rahi o tāna parau poro’i nō’u. ’Aita ato’a ’oia i ’ite i te ’ohipa hiero tei ravehia ’aita i maoro a’enei nō tō’u māmā rū’au. ’Ua ’ite au i roto i tō’u ’ā’au i taua taime ra ē, ’ua māuruuru roa tō’u māmā rū’au iā’u ’e tē ’oa’oa nei ’ua ha’amata tō mātou ’utuāfare i te tere faufa’a rahi nō te ’ā’amu ’utuāfare ’e te ’ohipa hiero.

E ’utuāfare mure ’ore mātou i teienei, i ni’a i te ’ē’a nō te ha’aputuputura’a i tō mātou mau tupuna ’e arata’ihia e tō’u metua vahine nō te ha’amaita’i i tō mātou ’utuāfare i te tahi atu pae o te pāruru.