’Ua hōro’a mai te Atua te hau iā’u

’A fa’aineine ai mātou nō te hīmene i roto i te hō’ē tuha’a purera’a nō te ha’amo’ara’a i te hiero nō Concepción i Tīreni i te matahiti 2018, hō’ē ā fā tā te mau melo ato’a o te pupu hīmene a te feiā ’āpī pa’ari tā’u e arata’i nei : e rave fa’aoti i te ’ohipa i te pae o te hīmene ’e te pae vārua e tītauhia nō te pūpū atu i te Atua i tā mātou pūpūra’a maita’i roa a’e.

Ma te mau melo o te pupu hīmene, nō roto mai nā titi e piti nō te ’oire nō Chillán, ’ua ha’amo’a vau iā’u iho ’ia riro ’ei mea mā mai tā’u e nehenehe. ’Ua hina’aro vau e fa’a’ite atu i te māramarama o te Mesia i roto i tō’u orara’a. ’Ua hina’aro vau ’ia riro te pūpūra’a tā tātou e pūpū atu i te Atua i roto i tōna fare mo’a, ’ia hau atu i te maita’i hope e ti’a ai. ’Ua ’ite au ē, mai te mea e rave mātou i tā mātou tuha’a, e tauturu mai te Metua i te ao ra ia mātou, ’e e hīmene atu mātou mai tāna e hina’aro ’ia hīmene atu mātou.

I roto i te ha’amo’ara’a, ’ua hīmene mātou ma tō mātou reo ’e tō mātou ’ā’au. Tē mana’o nei au ’ua hīmene ato’a mai te mau melahi nā muri ia mātou. E mea maita’i roa te ta’ira’a reo o te pupu hīmene. ’Ua putapū mātou ē, tei ia mātou ra te aroha o te Atua ’e ’ua māuruuru roa ’oia i tā mātou ō. ’Ua vai noa teie nīno’a mana’o i roto iā’u e mea māoro.

I muri a’e i te ha’amo’ara’a o te hiero, ’ua putapū vau ’ua fa’a’amuhia vau i te pae vārua ’e ’ua hō’ē ’e te Metua i te ao ra. ’Ua putapū vau i te hō’ē tū’atira’a pūai ’e ’ōna hau atu i nā mua a’enei. E tū’atira’a pūai mau teie e au ra iā’u ’ua arata’ihia vau i te pae vārua i roto i te mau mea tā’u e ti’a e ani i roto i tā’u mau pure (hi’o 3 Nephi 19:24).

I te taime o te ha’amo’ara’a o te hiero, ’ua hapū vau e pae hepetoma. Tau ’āva’e i muri mai, ’ua marua tā’u ’aiū. ’Ua riro ’ei taime hāhano mau te reira. ’Ua ’oto rahi au, i te taime iho ā rā ’a fa’a’itehia mai ai iā’u ē, e’ita roa paha vau e fa’ari’i fa’ahou i te tamari’i.

’Ua tupu rā teie ’ohipa fifi i te taime ’a putapū pūai rahi ai au i te pae vārua. ’Ua ta’a iā’u ē, ’ua fa’a’ine’inehia vau nō teie taime, maoti te pūpūra’a tā mātou i pūpū atu i roto i te hiero. Te pūai pae vārua tā’u i putapū ’ua tauturu iā’u ’ia upo’oti’a i teie tāmatara’a, nō te mea tei pīha’i iho te Metua i te ao ra iā’u ’e ’ua hōro’a mai te hau iā’u.

Tau taime poto i muri mai, ’ua ha’amaita’i te Atua ia māua, tā’u tāne fa’aipoipo ’e iā’u, i te hō’ē temeio. ’Ua ’oa’oa roa māua i te taime ’a fa’ari’i ai tā māua tamaiti, ’o Arturo, i te hō’ē tuahine iti, ’o Daniela.

E’ita roa vau e nehenehe e upo’oti’a i teie tāmatara’a, ’aita ana’e te tū’atira’a fātata ’o tā’u i fa’ananea ’e te Metua i te ao ra. ’Ua ’ite au ē e maita’i te mau mea ato’a ’e mai te au i tōna hina’aro. Tē fa’a’ī fa’ahou nei te ha’amana’ora’a i teie mau ’ohipa i tupu i tō’u ’ā’au i te ’oa’oa ’e te māuruuru.