« Te mau tumu rā’au ha’a Tāpōnē ’e te mau ’itera’a pāpū faufa’a rahi », Liahona, Tetepa 2025.
Te mau tumu rā’au ha’a Tāpōnē ’e te mau ’itera’a pāpū faufa’a rahi
’Ua riro te ’itera’a pāpū tāta’itahi ’ei hōro’a faufa’a rahi roa ’o tē tītau i te ha’apa’o maita’i o te ta’ata iho ’e te fa’aro’o, ’ia vai noa te reira mai te hō’ē ’ohipa nehenehe mau ’e te ’oa’oa.
Hōho’a i hōro’ahia mai e te fatu hōho’a
I roto i te pū nō Tokyo, i Tāpōnē, ’ua ’ite atu vau i te hō’ē ’ohipa i roto i te hō’ē ’āua nehenehe tei ha’afa’ahiahia iā’u. I te hiti o te hō’ē ’ē’a e haere atu nā roto i te ’āua, tē vai ra hō’ē papa’i ’ua tā’amu’amuhia i ni’a hau atu i te tātini mau fāri’i tiare na’ina’i, i roto i te fāri’i tāta’itahi tē vai ra hō’ē tumu rā’au ha’a Tāpōnē. I ni’a i te tumu rā’au tāta’itahi ’una’una ’ōtahi, tē vai ra hō’ē ’apa pāpa’i e fa’a’ite ra i tōna matahiti. Te rahira’a ’ua hau ïa i te 100 matahiti.
Hō’ē, e 390 matahiti te pa’ari, e hōro’a noa nei i te mā’a hotu. Te tahi atu e piti tōna tumu tei firihia—’ua pohe hō’ē, tē ora ra te tahi. E 590 matahiti tōna, e matahiti māere mau.
’Ua feruri au, mea nāhea te tumu rā’au ha’a Tāpōnē tāta’itahi i te fa’atupura’ahia ’e i te topera’ahia ma te te’ote’o rahi ’e te ’oa’oa. I muri a’e, e riro mai paha teie mau tumu rā’au ’ei mau faufa’a ’āi’a ’utuāfare. ’Ua feruri au i te mau metua pa’ari e hōro’a ra i tā rātou mau tamari’i i te hōpoi’a ’ia ’atu’atu maita’i i te tumu rā’au ha’a Tāpōnē o te ’utuāfare, ’ia pāruru i te reira i te mau ’ino ’e ’ia fa’ahereherehia nō te mau u’i nō ananahi.
’Ua ora mai teie mau tumu rā’au ha’a nō Tokyo i te mau tama’i hanohano ’e te mau tau o te hau, i te mau vero rarahi ’e te mau tau mania. ’Ua riro rātou ’ei hō’ē fa’a’itera’a fa’ahiahia mau nō te itoito, te peu tumu ’e te here aupuru.
Hō’ē hōro’a faufa’a rahi roa
Mai te taime ’a ’ite ai au i teie mau tumu rā’au ha’a Tāpōnē, ’ua ha’amaerehia vau i te ferurira’a, mea nāhea te mau ’utuāfare u’i rau nō Te ’Ēkālesia a Iesu Mesia i te Feiā Mo’a i te mau Mahana Hope’a nei, i te riro mai ma te hō’ē melo pionie o te ’utuāfare tei fa’ari’i i te hō’ē ’itera’a pāpū faufa’a rahi roa o te ’evanelia tei fa’aho’i-fa’ahou-hia mai.
E ha’amata te ’itera’a pāpū o te melo ’āpī tāta’itahi o te ’Ēkālesia ’a « hōro’a ai [’oia] i te hō’ē vāhi » nō ’aore rā ’a tanu ai ’oia i te parau a te Atua i roto i tōna ’ā’au ’e ’a fa’a’amu ai i te reira (hi’o Alama 32:28). ’A tupu rahi ai te ’itera’a pāpū, e ha’amaita’ihia ’e e fa’atanohia te mau ’ohipa a teie melo ’āpī i te hō’ē huru orara’a ta’a ’ē.
Nā roto i te mau tāmatara’a ’e te mau vero e rave rahi o te orara’a, e pūai atu ā te ’itera’a pāpū tei ’atu’atuhia nō Iesu Mesia ’e nō tāna ’Ēkālesia. Mai te hō’ē tumu rā’au ha’a Tāpōnē, e fa’a’itehia ’e e hōro’ahia te hō’ē ’itera’a pāpū mai te hō’ē hōro’a faufa’a rahi roa, ’o tā te mau u’i i muri nei e fa’atupu ato’a ’e e ’atu’atu.
E hōpoi’a rahi tā te u’i tāta’itahi ’ia fa’ariro i te reira ’ei ’itera’a pāpū nōna iho. E hōro’a faufa’a rahi roa te reira e mea fati ’ōhie rā. Nō te vai maoro noa te reira mai te hō’ē tao’a nehenehe mau ’e te ’oa’oa, e tītauhia te ha’apa’o maita’i o te ta’ata iho ’e te fa’aro’o.
’Aita tātou i ’ite i te fāito rahi o te tumu rā’au tā Lehi i ’ite i roto i tōna moemoeā. ’Ua ’ite rā tātou ē, e mea nehenehe hope mau ’e ’ua hina’aro rahi roa tōna ’ia hōro’a atu i te hotu o te reira i tōna ’utuāfare (hi’o 1 Nephi 8). ’Ua riro mai te ’utuāfare o Lehi ’ei hi’ora’a pāpū nō te hō’ē ’utuāfare u’i rau—i te tahi taime e manuia ’oia ’ia hōro’a atu i te mau peu tumu tano maita’i, ’e i te tahi taime, e ’ite atu ma te ’oto i tōna mau ’itera’a pāpū i te māhe’ahe’ara’a ’e te pohera’a i mua i te pe’ape’a, te ha’apa’o ’ore ’e te fa’ahemara’a.
E ’oa’oa tātou i te feiā tei riro ’ei ta’ata mātāmua feiā mo’a i te mau mahana hope’a nei nō tō rātou ’utuāfare, e fa’a’amu nei i tō rātou ’itera’a pāpū ’āpī ma te ravera’a ’e te ha’apa’ora’a i te mau fafaura’a mo’a. ’E e ha’amāuruuru tātou i teie mau pionie feiā mo’a nō te huru ’a hōro’a ai rātou i tō rātou here nō te Atua i te mau u’i nō ananahi.
Te mau metua, te mau ’orometua ha’api’i, te feiā ’āpī ’e te feiā ’āpī pa’ari ’o tē hōro’a nei nā mua roa te mau purera’a i te sābati, te tavinira’a i roto i te hiero, ’e te haerera’a i te ha’api’ira’a seminaire ’e te institut ’e te mau ’āmuira’a a te feiā ’āpī ’e te feiā ’āpī pa’ari—te tu’ura’a nā mua roa i te Fa’aora i roto i tō rātou orara’a—tē horo’a nei i te repo maita’i pae vārua ’e te mā’a e hina’arohia nō te fa’ananea atu i te mau ’itera’a pāpū ’āpī.
Mai te mau tumu rā’au ha’a Tāpōnē tā’u i ’ite i Tokyo, ’ua riro tō tātou ’itera’a pāpū nō Iesu Mesia ’e tāna ’evanelia i fa’aho’ihia mai ’ei mau tao’a faufa’a rahi roa ’o tē ha’amaita’i i te feiā tā tātou i here. E nehenehe te reira e riro mai ’ei faufa’a ’āi’a nō tātou mai te mea e ’aupuru maita’i, e poihere maita’i ’e e fa’a’ite tātou i te reira i tera u’i ’e i tera u’i.