« Nō tō tātou nei ’anotau », Liahona, Tetepa 2025.
Nō tō tātou nei ’anotau
Toru ’ahuru matahiti i muri a’e i te vauvaura’ahia te poro’i nō ni’a i te ’utuāfare i tō te ao nei, e hau a’e te ’ite-ātea-ra’a ’e te tanora’a o tō te reira mau parau tumu hanahana i nā mua noa atu.
Te peresideni Gordon B. Hinckley e paraparau i te hō’ē ’āmuira’a i Santiago, i Tīreni
I te 23 nō Tetepa 1995, ’ua paraparau te peresideni Gordon B. Hinckley (1910–2008) i te hō’ē putuputura’a tuahine nō te Sōtaiete Tauturu ’e ’ua vauvau i « Te ’Utuāfare: E Poro’i i tō te Ao Nei ». Teie i muri nei te tahi o tōna mau mana’o nō ni’a i terā taime :
« Tē ti’aturi nei au ē ’ei ha’amaita’ira’a nō te mau tamari’i ato’a ’ia fānauhia i roto i te hō’ē ’utuāfare e fa’ari’i-poupou-hia rātou ’e e ’atu’atuhia ’e e ha’amaita’ihia i nā metua, te hō’ē metua tāne ’e te hō’ē metua vahine, ’o tē ora ma te vai-’ati-noa-ra’a i te tahi ’e te tahi ’e i tā rāua mau tamari’i […]
« Rahi noa atu te pāpūra’a tō ’outou fa’a’amura’a i tā ’outou mau tamari’i i roto i te parau nō te ’evanelia a Iesu Mesia, ma te here ’e te tīa’ira’a teitei, rahi noa ato’a atu te pāpūra’a o te tupura’a te hau i roto i tō rātou orara’a.
« Nō te rahi o te mana’o māramarama ’e te ha’avare e fa’arirohia nei ’ei parau mau, nō te rahi o te ha’avarera’a nō ni’a i te mau ture ’e te mau mea faufa’a, nō te rahi o te fa’ahina’arora’a ’e te parura’a ’ia fa’ari’i i te tāfeta marū a tō te ao nei, ’ua mana’o mātou ’ia fa’aara ’e ’ia fa’aara ’ātea i te ta’ata. Hau atu, tē hōro’a nei mātou, te Peresidenira’a Mātāmua ’e te pupu nō te Tino ’Ahuru ma Piti ’āpōsetolo, i te hō’ē poro’i i tō te ’Ēkālesia ’e i tō te ao nei mai te hō’ē fa’a’itera’a ’e te hō’ē ha’apāpūra’a i te fa’aturera’a, te mau ha’api’ira’a tumu ’e te mau peu e au i te ’utuāfare, tā te mau peropheta, te mau hi’o ’e te mau heheu parau nō teie ’Ēkālesia i tāmau noa na i te parau i te roara’a o tōna ’ā’amu […]
« Tē a’o nei mātou i te tā’āto’ara’a ’ia tai’o māite ’e ma te feruri ’e ma te pure i teie poro’i. Te pūai o te hō’ē nūna’a, ’ua a’ahia ïa i i te pū o te papa’i o tō te reira mau ’utuāfare. Tē fa’aitoito roa nei mātou i tō tātou mau ta’ata i te mau vāhi ato’a ’ia ha’apūai i tō rātou ’utuāfare mai te au i te mau mea faufa’a ha’apa’ohia e te tau ».