Te mau ‘api nō pātifita
Tē vai noa ra te ti’aturira’a
I tō māua, ’o tā’u vahine, pi’ira’ahia nō te tāvini i te hō’ē misiōni i Tahiti, ’aita roa atu māua i feruri noa a’e i te mau ’ohipa mana’o-’ore-hia ’e te nehenehe e tīa’i mai ra ia māua. E fa’a’ite atu vau i te hō’ē o te fa’a’ite ra e mea nāhea te Fatu i te rave i te ’ohipa nā roto i te mau rave’a ’aro.
Hau atu i te piti ’ahuru ma pae matahiti i teienei, ’a tāvini ai au ’ei ’ēpisekōpo nō te pāroita nō Aix-en-Provence ’e ’a rave ai au i te ohipa nō te te Séminaire ’e te Institut, ’ua fārerei au ia Sophronia, nō Tahiti mai ’oia ’e ’ua haere mai i te ha’api’ira’a i Farani. E taure’a pa’ari ’oia, ’e te ’ite pūai nō ni’a i te ’evanelia, inaha, ‘ua pa’ari ‘oia i roto i te ’Ēkālesia. Nō reira, ’ua ha’ape’ape’a roa vau i tōna haerera’a mai i roto i tā’u piha ’ohipa nō te parau mai ē, e’ita ’oia e haere fa’ahou mai i te purera’a. ’Ua mana’o vau ē, e mea poto noa te reira, terā rā, ’ua tupu iho ā tōna hina’aro, ’e ’aita roa atu vau i ’ite fa’ahou iāna. ’Ua ora ’o Sophronia i te hō’ē orara’a ātea roa i te Evanelia hau atu i te piti ’ahuru matahiti te maoro.
I tō māua taera’a atu i tā māua misiōni i Tahiti, i te matahiti 2024, ’ua ‘oa’oa roa māua i te ’ite-fa’ahou-ra’a iāna, ’e ’ua ’oa’oa roa atu māua i te ’itera’a ē, ’ua ho’i mai ’oia i roto i te ’Ēkālesia e piti matahiti nā mua atu. ’Ua fa’a’ite mai ’oia i te mea i tūra’i iāna ’ia ho’i fa’ahou mai :
« ’Ia ’ite mai ’ōrua ē, ’ua tāpe’a vau i tō’u ’itera’a pāpū nō ni’a i te ’evanelia ’e ’ua hina’aro hōhonu vau i tā’u tamāhine, ‘o Kahaili, ’ia pa’ari mai iā’u nei, i roto i te ’Ēkālesia a Iesu Mesia i te Feiā Mo’a i te mau Mahana Hope’a nei. ‘Ua hina’aro vau ‘ia ‘ite oia ē, tē ora nei te Atua, tē here nei ‘oia iāna, ’e e ’ōpuara’a tāna nōna ’ia ho’i atu nō te ora i pīha’i iho iāna ’e tōna ’utuāfare mai te mea ē, e ha’apa’o ’oia i tāna mau fa’auera’a. Terā rā, ’aita vau i hina’aro e ho’i fa’ahou i te fare purera’a. E mea ta’a ’ē roa, e ‘ere ānei ?
« I te tahi mau taime, ’ua haere ’o Kahaili ’e tō’u metua vahine i te mau putuputura’a, ’aita rā teie haerera’a i te mau putuputura’a i fa’aineine iāna nō te bāpetizora’a. I te matahiti 2022, i te ono matahiti e te ’āfa o Kahaili, ’ua ’ite a’era vau ē, hō’ē noa matahiti ’e te ’āfa tā mātou nō te fa’aineine. Tē parau nei au ē, ’mātou’ nō te mea, te aura’a o teie ’ohipa, e ti’a iā’u ’ia ’āmui atu iā’u iho i roto ma ’ore e ti’aturi i tō’u metua vahine ’e ’aore rā, i te tahi atu ta’ata.
« ’Ua ui au i tā’u tamāhine, ’Kahaili, tē hina’aro ra ānei ’oe e bāpetizohia ’ia 8 matahiti tō ’oe ?’
Ma te fē’a’a ’ore, ’ua pāhono mai ’oia ē, ’Oia mau, e māmā, tē hina’aro nei au ’ia bāpetizohia vau !’
’Ua māere roa vau i tōna ’oa’oa rahi, ’e i roto i taua mana’o pūai ra, ’ua ’ite au i te itoito i roto iā’u nō te rave i te tusia ’e nō te ho’i i te fare purera’a.
« ’Ua haere māua ’o māua ana’e i taua Sābati mātāmua ra. Terā rā, ’aita i maoro roa i muri iho, ’ua ’āpiti mai tā’u tane fa’aipoipo ’o Cyril ia māua, ma te mana’o ē, ’ia fa’aea ’oia i pīhai iho ia māua e ti’a ai. I tō Kahaili fa’a’itera’a i tōna hina’aro ’ia bāpetizo tōna metua tāne iāna, ’ua pāhono atu vau ma te ’ata’ata, ’Ā, ’a ui atu ïa i tō ’oe metua tāne, e hape ana’e !’ ma te ’ore e ti’aturi ē, e nehenehe te reira e tupu. ’Ua pāhono mai tōna metua tāne, ’E tā’u tamāhine, e nā reira vau mai te mea ē, e nehenehe tā’u’ ».
I muri iho, ’ua fa’aō mai te Fatu i roto i te orara’a o Cyril. ’Ua tupu tōna fa’afāriura’a nā roto i te tai’ora’a i te Etera 12:4 : « Nō reira, ’o ’oia ’o tē ti’aturi i te Atua, e riro ato’a ’oia i te ti’aturi ē tē vai ra te hō’ē ao maita’i roa, ’oia ïa, te hō’ē vāhi i te rima ’atau o te Atua, ’e e tae mai ho’i taua ti’aturira’a ra nā roto i te fa’aro’o, ’e e riro ho’i te reira ’ei tūtau nō te vārua o te ta’ata nei, nō te ha’apūai ’e nō te tāpe’a māite ia rātou, ’ia tāmau noa i roto i te mau ’ohipa maitata’i, ’e ’ia arata’ihia nō te fa’ahanahana i te Atua. »
’Ua ha’aputapū hōhonu teie ’īrava nō ni’a i te ti’aturira’a o te rirora’a ’ei tūtau i ni’a ia Cyril ’a ha’amana’o ai ’oia i tōna fātatara’a i te mo’e i roto i te tai roto nō Tuamotu i te mau matahiti nā mua atu. ’Ua mo’e tōna poti i te taime ’a matara ai te tutau. Noa atu tāna mau tauto’ora’a, ’ua rohirohi roa ’oia. Nā roto rā i te hō’ē rāve’a semeio, ’ua mau te tūtau o te poti i ni’a i te hō’ē aruaru, mau a’era te poti, ’e ’ua ti’a a’era iāna ’ia tae i ni’a i te poti. Tē fa’ata’a noa ra ā ’o Cyril i te reira mai te hō’ē semeio ’o tei fa’aora iāna.
Mai te hō’ē fānau-fa’ahou-ra’a, ’ua bāpetizohia ’o Cyril i te 28 nō Māti 2024, i te 50ra’a o tōna mahana fānaura’a. I te ’āva’e i muri iho, ’ua bāpetizo ’oia ia Kahaili. ’Ua tupu te taime faufa’a rahi i te 12 nō ’Ēperēra 2025, i te taime a tā’atihia ai ’o Sophronia, ’o Cyril, ’e ’o Kahaili i roto i te hiero nō Papeete. ’Ua fana’o māua i te ’āmui atu i teie ’ōro’a mo’a.
Tē fa’a’ite nei au i teie ’ā’amu nō te fa’a’ite pāpū ē, tē vai noa ra te ti’aturira’a ’ia ātea ana’e te mau melo o te ‘utuāfare i te ’Ēkālesia. Noa atu ē, e tītauhia e rave rahi matahiti, nā roto i te fa’aro’o ia Iesu Mesia, e nehenehe noa te hō’ē semeio e tupu.