Tei te hoe fa’atere te Atua

I te 2 nō Fēpuare o teie matahiti, ’ua tere atu vau ’e te tuahine Meurs i Warrnambool, i Auteraria, nō te ha’amau i te ’āma’a nō Warrnambool nō roto mai i te hō’ē pupu pāroita nō Geelong. ’Ua riro te ho’ira’a i tō’u vāhi fānaura’a ’e te ’itera’a i te ’āma’a tā’u i haere ’ei tamari’i ’āpī, ’ei mahana ’oa’oa. 

E piti hepetoma i muri mai, ’ua paraparau māua i te mau misiōnare i te PHM nō te ārea nō Pātifita i Auckland. E mea au nā māua ’ia fārerei i te mau misionare ’āpī ’e ’ia ’ite i tō rātou hina’aro ’e tō rātou fa’aro’o ’a ha’amata ai rātou i tā rātou tāvinira’a mo’a. E mea ta’a ’ē roa teie taime nō te mea ’ua pi’ihia tā māua mo’otua tamāroa, ’o Harrison Snow, i te misiōni nō Auteraria Melbourne ’e te hō’ē ’oia o taua mau misiōnare ra. 

Hau atu i to māua ’oa’oa, ’ua tonohia ’o Elder Snow i Warrnambool ’ei vahi mātāmua nōna. ’Ua fa’aoti au e hāpono atu iāna i te tahi ’ā’amu nō ni’a i te huru o tō mātou utuafare i te ’āpitira’a atu i te ’Ēkālesia i reira. Teie te tahi tuha’a o te mea tā’u i fa’a’ite atu : 

’Ua fānauhia tō ’oe pāpā rū’au, ’o Frederick Michael Wilhelm Meurs, i te matahiti 1926 i Hōlane. Te hō’ē ’oia o te 12 tamari’i. ’Ua arata’i tōna metua vahine i tāna mau tamari’i i te pure tūsia i te mau sābati ato’a, e Kātolika fa’aro’o tōna metua vahine. ’Ua haere ’o Fred i te mau fare ha’api’ira’a Kātolika ’e ’ua fa’atupu i te hō’ē fa’aro’o hōhonu ia Iesu Mesia ’e te here nō te mau pāpa’ira’a mo’a. 

’Ua fānauhia ato’a tō ’outou māmā rū’au, ’o Lois Ellen Meurs, i te matahiti 1926 i Warnambool. E piti taea’e tōna, ’o Ralph ’e ’o David, ’e ’ua pa’ari mai ’oia i roto i te hō’ē ’utuāfare métoti ha’apa’o maita’i. ’Ua māere roa ’oia i te tāvinira’a aroha a tōna mau metua ’e ’ua fa’atupu ’oia i te hō’ē fa’aro’o keresetiāno pūai. 

I te ava’e Tēnuare 1954, ’ua fa’aipoipohia ’o Fred ’e ’o Lois i Warnambool. ’Ua fānauhia ’o Julie i te hope’a o taua matahiti ra, ’e ’o Peter (’o vau) i te ’āva’e Tītema 1956. 

I tē raua fa’aipoipora’a mātāmua, ’ua hina’aro ’o Fred ’e ’o Lois e tāhō’ē i roto i tō rāua fa’aro’o. ’Ua haere rāua i te ’Ēkālesia Kātolika ’e te ’Ēkālesia Métoti ’e ’ua ha’api’i ’āmui rāua i te Faufa’a ’Āpī. E rave rahi uira’a tā rāua i pāpa’i ’a tai’o ai rāua, mai te huru o te Atua, te ti’afa’ahoura’a, te mana o te autahu’ara’a, te ha’amaura’a o te ’Ēkālesia, ’e te bāpetizora’a utuhi. 

’Ua ani rāua i te mau pāhonora’a i te feiā fa’atere fa’aro’o nō taua vāhi ra, terā rā, ’ua parau te rahira’a ē, e « mau parau ’aro » taua mau mea ra ’aore ra ’ua fifi rātou i te pāhono mai. ’Ua tūra’i tō rāua ’imira’a i te parau mau ia rāua ‘ia tere atu i te mau ’Ēkālesia Keresetiāno e rave rahi i Warrnambool. Noa atu ē, ’aita rāua i māuruuru, ’ua fāriu atu rāua i te Atua nā roto i te pure ma te ani iāna ’ia hāpono mai i te mau pāhonora’a ia rāua. 

’Ua tono te peresideni Thomas S. Bingham ia Elder Jones (nō Utaha) ’e ia Elder Erickson (nō Canada) i taua taime ra nō te ha’amata i te ’hipa misiōnare i Warrnambool. ’Ua fa’aara te mau fa’atere nō taua vāhi ra i te mau ta’ata o te ’oire ’eiaha e paraparau ia rāua, ma te parau ē, e « horoi rāua i te roro o tā ’outou mau tamari’I ». 

’Ua patoto ’o Elder Jones ’e ’o Elder Erickson i te mau ’ūputa ma te ha’apa’o maita’i e toru ’āva’e te maoro ’e ’ua pāto’ihia rāua. ’Ua paruparu to rāua mana’o ’e ’ua hepohepo. ’Ua tapitapi tō rāua fa’aro’o. ’Ua pāpa’i rāua i te peresideni Bingham ’e ’ua ani ’ia fa’arevahia rāua i rāpae ia Warrnambool. 

I te pae hope’a ’ua tae mai te hō’ē rata nā te peresideni Bingham. I muri a’e i tōna feruri-māite-ra’a ma te pure, ’ua fāri’i oia i te mana’o pūai roa a’e ē, tē vai ra te ta’ata i Warrnambool tei ineine nō te fāri’i i te ’Ēkālesia i fa’aho’i-fa’ahou-hia mai. ’Ua fa’aitoito ’oia ia rāua ’ia ho’i i te ’ohipa ’e ’ia tere atu i te mau vāhi tā rāua i ’ore i haere nā mua atu. 

’Ua fāri’i nā ’orometua i te rata i taua ārea taime ra ē, tē pure ra ’o Fred ’e ’o Lois nō te ani i te mau pāhonora’a. Tau mahana i muri iho, ’ua pātōtō rāua i te ’ūputa fare o te ’utuāfare Meurs i te aroa Jamieson, i Warrnambool. ’Ua pāhono mai ’o Lois, ’e ’ua parau atu rāua ē, e poroi ta’a ’ē tā rāua nō te fa’a’ite nō ni’a ia Iesu Mesia ‘e tāna ’Ēkālesia. 

’Ua pāhono mai ’o Lois, « ’Ua pure māua ’ia haere mai ’ōrua, e’ita rā e nehenehe ia ’ōrua ’ia haere mai i teienei. ’Ua ro’ohia tā maua nā tamari’i (’o Julie, e piti matahiti, ’e ’o Peter, e ono ’āva’e) i te ma’i ma’i ’ōniho [varicelle] ’e e nehenehe ’ōrua e pe’ehia ». ’Ua ani ’oia ia rāua ’ia ho’i mai i muri a’e i te hō’ē hepetoma. 

’Ua fa’a’ite ’o Lois ia Fred nō ni’a i taua fārereira’a ra, ’e ’ua tāmau noa rāua i te pure ia ’ore te mau misiōnare ’ia ha’amo’e i te ho’i mai. ’Aita rāua i ’ite ē, ’o vai tā rāua e fārerei ra. 

’Ua ho’i mai ’o Elder Jones ’e ’o Elder Erickson i te hepetoma i muri mai ’e ’ua ha’amata i te ha’api’i ia Lois ’e ia Fred. ’A ha’api’i ai rāua, ’ua pāhono rāua i te mau uira’a ato’a i ni’a i te tābula roa a Fred ’e ’o Lois. ’Ua fa’ata’a rāua i te nātura o te Atua, te mana o te autahu’ara’a, te fi’afa’ahoura’a ’e te orara’a i muri a’e i te pohe, te tumu o te orara’a, te fa’ahotura’a i te fa’aro’o, ’e te mau ’ōro’a nō te bāpetizora’a ’e te ’ōro’a mo’a. 

’Ua ’īriti ’o Fred ’e ’o Lois i tā rāua mau pāpa’ira’a mo’a tei oti a’ena i te tāpa’opa’ohia i roto i tā rāua tai’ora’a nā mua atu, ’e ’ua ’ite rāua i te ha’apāpūra’a nō te mau mea ato’a tā te mau misiōnare i ha’api’i. 

E rave rahi matahiti i muri mai, i tō’u pi’ira’ahia ’ei Hitu ’ahuru ārea, ’ua paraparau vau ia Elder Bruce Jones nō ni’a i teie ’ohipa i tupu. ’Ua parau mai oia iā’u ē, ’ua riro tō rāua taime i Warrnambool ē tae roa atu i te taime ’a fārerei ai i tō’u nā metua, ’ei tāmatara’a rahi nō tōna fa’aro’o. Terā rā, te ha’api’ira’a ia Fred ’e ’o Lois ’e te fāri’ira’a ia rāua ia pāhono nā roto i te mau ’īrava nō roto mai i te Faufa’a ’Āpī, ’ua fa’aitoito fa’ahou te reira i tōna fa’aro’o ’e ’ua riro mai ’ei tauira’a rahi i roto i tōna orara’a. 

’Ua bāpetizohia ’e ’ua ha’amauhia ’o Lois ’e ’o Fred i te 5 nō Tiurai 1957, e toru noa hepetoma i muri a’e i te fārereira’a i te mau misiōnare. ’Aita i maoro i muri iho, ’ua ’āpiti mai te tahi atu mau ’utuāfare i te ’Ēkālesia, ’e ’ua ha’amata te ’āma’a ’āpī i te fa’atupu i te mau putuputura’a i roto i te fare ’o Meurs i roto i te aroā nō Jamieson. 

E nehenehe tātou pā’āto’a e hi’opo’a i tō tātou fa’aro’o i roto i te hō’ē ’ā’amu nō te fa’afāriura’a, nō tātou iho ’e ’aore rā, nō te mau melo ’o te ’utuāfare ’o tei pāhono i te tītaura’a a te ’evanelia a Iesu Mesia i fa’aho’i-fa’ahou-hia mai. Tā fa’aha’amana’o mai nei te reira iā’u i teie mau parau nō roto mai i te pene mātāmua nō te buka ’a poro haere i tā’u nei ’evanelia : 

« ’Ua ’āua-ha’a’ati-hia ’oe e te ta’ata [… ’o tē] ’imi nei i te fā i roto i te orara’a […] Tē hina’aro nei rātou i « te hau i roto i teie nei ao ’ te ora mure ’ore i roto i te ao a muri atu » (Te Ha’api’ira’a Tumu ’e te mau Fafaura’a 59:23).

E rave rahi « ’o tei fa’a’erehia i te parau mau nō te mea ’aita rātou i ’te i te vāhi te reira e ’itehia mai ai » (Te Ha’api’ira’a Tumu ’e te mau Fafaura’a 123:12). 

I teie mahana, ’ua ’ite tātou ē, nā te tītau-manihini-ra’a i tō tātou mau hoa ’ia haere mai ’e tātou i te fare purera’a e hōro’a mai i te ’itera’a maita’i roa a’e tā rātou e nehenehe e fa’ari’i. E ha’api’i rātou hau atu ā nō ni’a ia Iesu Mesia, e ’ite i te mau pāhonora’a i tā rātou mau uira’a, ’e e ’ite rātou ē, te fari’ihia ra rātou e te mau melo mai ia ’outou. E ’ite rātou i te hō’ē vārua ta’a ’ē ’a ’āmui atu ai rātou i roto i te ’ōro’a. E rave rahi ’o te hina’aro e ha’api’i hau atu ā ’e i te pae hope’a, e ha’amata i tō rātou tere i ni’a i te ’ē’a o te fafaura’a nā roto i te bāpetizora’a. 

E māuruuru noa vau e a muri noa atu ia Elder Jones ’e ia Elder Erickson, ’e tae noa atu i te ’oa’oa tā tō’u nā metua i ’ite i tō rāua ’itera’a i te ’Ēkālesia nō te Faufa’a ’Āpī tei fa’aho’i-fa’ahou-hia mai, ’ia ho’i te ’Ēkālesia a Iesu Mesia i te Feiā Mo’a i te mau Mahana Hope’a nei.