Founga ʻe 7 ke Fiefia ai ʻi he Mūsika Fakalaumālié

Laʻitā meia David Green

Kuo hoko ʻa e hivá ʻi he taimi kotoa pē ko ha konga mahuʻinga ʻo e moihū maʻá e kau ākonga ʻa Sīsū Kalaisí.

Ko e lahi taha ʻo e ngaahi saame ʻi he Fuakava Motuʻá ko ha ngaahi hiva ia ʻo e fakafetaʻi ki he ʻEikí. ʻOku lekooti ʻi he Fuakava Foʻoú naʻe hiva fakataha ʻa Sīsū mo ʻEne kau ʻAposetoló ʻi ha himi, kimuʻa pea nau ʻalu ki Ketisemaní (vakai, Mātiu 26:30). Pea ʻoku fakatupulaki ʻe he ngaahi himí ʻetau moihuú lolotonga ʻo e houalotu sākalamēnití ʻi he ʻahó ni.

ʻOku fakafiefia ʻa e hokohoko atu hono faʻu ʻo e tohi himi foʻoú, pea te tau lava ʻo ʻamanaki atu ki ha ngaahi himi foʻou ange ʻi he hokohoko atu ʻa e ngāué. Ka ʻoku ʻikai ko e ngaahi himí pē ʻa e faʻahinga mūsika te ne lava ʻo ueʻi kitautolú. ʻOku lahi ha faʻahinga hiva kehekehe ʻi he ongo polokalama Gospel Library mo e Sacred Music ʻa e Siasí ke aʻusia, mei he mūsika tukufakaholó ki he mūsika fakafiefia mo fakaeonopōní (ʻoku ʻikai fiemaʻu ia ke ke taʻu hongofulu tupu ka ke fiefia ʻi he ngaahi ʻalapama Strive to Be!). Te ke lava ʻo maʻu ʻi he ngaahi polokalama ko ʻení ha ngaahi hiva lelei mo fakalaumālie, ʻa ia ʻoku kau ai ʻa e ʻū laʻi hiva te ke lava ʻo tā pe hivaʻi pē ʻe koe.

Ko ha ngaahi fakakaukau ʻeni ʻe niʻihi ke tokoni atu ke ke fakaʻaongaʻi ʻa e ngaahi hiva fakalaumālié ʻi hoʻo moihū ʻi ʻapí—neongo kapau ʻoku ʻikai ke ʻi ai haʻo ʻilo ki he hivá:

• Fanongo ki he fasi ʻo e ngaahi himí kuo hikí mo e ngaahi hiva fakalaumālie kehé ʻi he lolotonga ʻo e uiké. ʻE lava ke maʻu ʻeni ʻi he polokalama Gospel Library pe Sacred Music pe ʻi he Laipeli Hivá ʻi he uepisaiti ʻa e Siasí.

• Fakatotolo ki he ngaahi talanoa ʻo e ngaahi himí pea ako ʻa e meʻa naʻá ne ueʻi fakalaumālie kinautolú.

• Hivaʻi ʻa e ngaahi himí pea ako ʻa e ngaahi konga kehekehe ʻo fakaʻaongaʻi ʻa e konga ki he Interactive Sheet Music ʻi he polokalama Sacred Music pe ʻi he uepisaiti ʻa e Siasí.

• Fakafanongo ki he Kuaea ʻa e Tāpanekalé pe Strice to Be ʻi he meʻa ʻokú ke saiʻia taha ke fanongo aí (hangē ko e YouTube, Spotify, Apple Music, Pandora).

• Ako ke tā ʻa e ngaahi himí mo e ngaahi hiva fakalaumālie kehe ʻi he pianó pe kītaá ʻo fakaʻaongaʻi ʻa e laʻi hiva pe tuʻunga fasi ʻoku fakakau ʻi he polokalama Gospel Library pe ʻi he uepisaiti ʻa e Siasí.

• Ako mo fakalaulauloto ki he fakalea ʻo e ngaahi hiva langaki moʻuí mo e ngaahi himí.

• Muimuiʻi fakataha ʻa hono fakaleá lolotonga hoʻo fanongo ki he ngaahi hiva ʻa e Kuaea Tāpanekalé ʻi he Temipale Sikueá. ʻE lava ke maʻu ʻa e ngaahi hivá ʻi he sēnolo YouTube ʻa e kuaeá.