Manatu: ʻOkú Ke Mahuʻinga Lahi

“Tokanga ki he fisiʻi ʻakau ʻo e ngoué, ʻoku [fēfē] ʻenau tupú; ʻoku ʻikai te nau ngāue, pea ʻoku ʻikai te nau filo: … kapau ʻoku fakakofu pehē ʻe he ʻOtuá ʻa e mohuku ʻo e ngoué …, [ʻikai] ʻe lahi hake ʻa ʻene fie fakakofuʻi ʻa kimoutolú …?” (Mātiu 6:28, 30).

ʻI heʻemau monūʻia feʻunga ke nofo ofi ki natulá, ʻoku fiefia ai hoku fāmilí ʻi he lue lalo lōloa kimuʻa pea tō ʻa e laʻaá, ʻi he fanga kiʻi hala ofi ki homau ʻapí. ʻOku mau faʻa talanoa, ʻi he lolotonga ʻo e ngaahi fononga ko iá ki homau ʻahó pea mo e ngaahi tāpuaki naʻa mau fakatokangaʻi ʻi he ʻaho ko iá. ʻOku kau ʻi he fanga kiʻi meʻa ʻoku manako ai hoku ʻofefiné ʻi heʻemau fononga laló ko e ngaahi matalaʻiʻakau tupu vaó. ʻOku nau lanu kehekehe, tupu tavale, mo taʻe-totongi. ʻOku ʻikai ha taha ia ʻokú ne fuʻifuʻi fakaʻaho ʻa e ngaahi matalaʻiʻakau tupu tavalé, he ʻoku nau maʻu ʻa e vaí mo e hauhaú mei he hahaú, kakapú, pea mo e faʻa kiʻi ʻuhá.

ʻOku fakamanatu mai ʻe he meʻá ni kiate au ʻa e akonaki ʻa e ʻOtuá ʻi he Mātiu 6:28. ʻOku tau faʻa hohaʻa fakaʻaho ki he founga ke tau lelei ai ʻi he moʻuí, ki hotau fōtungá, pe ko e vakai mai ʻa e niʻihi kehé kiate kitautolú. Ka ko e fakaʻofoʻofa ʻo e matalaʻiʻakau tupu tavale ko iá ko ha kiʻi fakamanatu faingofua ia kiate au ʻoku ʻofa ʻa e ʻOtuá ʻiate au pea te Ne tokonaki maʻu pē maʻaku mo hoku fāmilí.

Thang Nguyen, Tekisisi, USA

“ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).

Kuó u toki ʻilo ʻoku ou mahuʻinga lahi ki he ʻOtuá, ʻi heʻeku ako ʻa e folofolá, ako maʻuloto e Kaveinga ʻa e Kau Finemuí, lau hoku tāpuaki fakapēteliaké, mo fakahoko ʻa e ngaahi fuakava ʻi he temipale māʻoniʻoní. Kuó u toki ʻilo ʻoku ou mahuʻinga lahi ki he ʻOtuá ʻo fakafou ʻi heʻeku aʻusia ʻi he moʻui ní. Kuó u ongoʻi ʻEne ʻofa lahi ʻiate aú ʻi he ʻofa ʻoku ou maʻu ki heʻeku fānaú. Ko e taimi ʻoku ou tokoni ai ki he niʻihi kehé, ʻoku ou ako ai ke u ʻofa ʻiate kinautolu ʻo hangē ko Iá. ʻOkú Ne maʻu ha ʻofa haohaoa ki heʻene fānaú kotoa, ʻa ia ʻoku kau ai au. ʻOku fakahaaʻi mai ʻe he ʻofa ko iá hoku mahuʻinga ki he ʻOtuá, pea ʻokú ne fakahaaʻi mai hoku mahuʻingá.

Keturah Gordon, ʻOlikoni, USA

“ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).

ʻOku ou manatu ki heʻeku kei siʻí, hono faʻa talamai ʻe heʻeku fineʻeikí hoku mahuʻinga lahi ki he ʻOtuá, ʻokú Ne ʻafioʻi au, pea ʻoku totonu ke u feinga maʻu pē ke ʻofa mo tauhi kiate Ia. Mahalo ʻe fuʻu ongo tōtuʻa ʻeni ia, ka ʻoku ou ʻiloʻi ʻoku moʻoni, he ʻoku ou moʻui ʻaki ia. Koeʻuhí ko ʻeku fakahoko ʻa e fanga kiʻi meʻa iiki mo faingofuá, kuo tupu ai ʻa e tenga ʻo e moʻoni naʻe tō ʻe heʻeku fineʻeikí ʻi hoku lotó ʻi ha taimi fuoloa kimuʻá, ʻo hoko ko ha ʻilo maʻongoʻonga mo ha fakamahino ʻoku ʻafioʻi mo ʻofa ʻa e ʻOtuá ʻiate au pea ʻoku ou mahuʻinga kiate Ia. ʻOku ou ofi ange ki he ʻOtuá ʻi heʻeku ʻalu maʻu pē ki he lotú mo maʻu maʻu pē ʻa e sākalamēnití, ako e folofolá, lotu maʻu pē ke mahino ʻEne folofolá, kolea ha fakahā mei he ʻOtuá maʻaku mo hoku fāmilí, muimui ki he ngaahi fekau ʻa e ʻOtuá, tali mo fakahoko totonu e ngaahi uiuiʻi faka-Siasí, ʻofa ʻi he niʻihi kehé, vahevahe ʻa e ongoongoleleí mo e niʻihi kehé, akoʻi ʻa e niʻihi kehé ke nau fekumi ki heʻenau ngaahi kuí pea tauhi hanau ngaahi hisitōlia fakataautaha, pea fakahoko mo tauhi ʻa e ngaahi fuakava toputapu mo e ʻOtuá.

Naʻá Ne fekauʻi mai Hono ʻAló ke mamahi pea pekia maʻaku koeʻuhí he ʻokú Ne ʻofa lahi ʻiate au mo finangalo ke u foki ange ʻo nofo mo Ia ha ʻaho. ʻOku ʻikai haʻaku toe veiveiua naʻe ʻiloʻi ia ʻe heʻeku fineʻeikí, pea ʻoku ou fakatauange mo lotua te u manatuʻi maʻu pē mo kei fakahoko ai pē hoku lelei tahá.

Moana Piena, Hauaiʻi, USA

“He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate Iá, ke ʻoua naʻa ʻauha, kae maʻu ʻa e moʻui taʻengatá” (Sione 3:16).

Kuó u ongoʻi e ʻofa ʻa e ʻOtuá ʻi heʻeku moʻuí, ʻi he ngaahi lotu kuo talí pea mo e nonga ʻoku ou ongoʻi ʻi he taimi ʻoku ou ako ai ʻa e folofolá mo hoku fāmilí. ʻOku fakamanatu mai ʻe he ngaahi aʻusia fakataautaha ko ʻení ʻoku ʻafioʻi au ʻe he ʻOtuá mo tokanga ke u lelei. Ko e palani ʻo e fakamoʻuí ʻiate ia pē, ko ha fakamoʻoni ia ki hotau mahuʻinga ʻi he ʻao ʻo e ʻOtuá. Kuó Ne teuteu ha founga ke tau foki hake ai kiate Ia pea hoko ʻo hangē ko Iá. ʻOku fakahaaʻi ʻe he palani fakalangi ko ʻení ʻokú Ne mahuʻingaʻia ʻi heʻetau fakalakalaká mo e fiefia taʻengatá.

Mahalo ko e fakamoʻoni maʻongoʻonga taha ʻo e ʻofa ʻa e ʻOtuá ko e Fakalelei ʻa Sīsū Kalaisí. Naʻe mamahi hotau Fakamoʻuí maʻatautolu fakafoʻituitui, ʻo fakahaaʻi ai ʻoku tau taau mo e feilaulau taupotu tahá. ʻOku ou fakamoʻoni ʻoku ʻofa lahi mo fakataautaha ʻa e ʻOtuá ʻiate kitautolu takitaha. ʻOku tau mahuʻinga hulufau kiate Ia. Te tau lava ʻi heʻetau manatuʻi ʻa e foʻi moʻoni ko ʻení, ke fehangahangai mo e ngaahi faingataʻa ʻo e moʻuí ʻi he tui pea maʻu ʻa e fiefia ʻi heʻetau fononga foki kiate Iá.

Alex Lobanov, Tipilisi, Siōsiā

“Manatu ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10).

Kiate au, ko e taimi kotoa pē ʻoku ou ongoʻi ʻoku ʻikai ʻofaʻi au pe te u ongoʻi loto-mamahí, ʻoku ou kamata leva ke manatuʻi e potufolofola mei he Tokāteline mo e Ngaahi Fuakavá ʻoku pehē, “ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). Kuo ʻomi ʻe he fakamatala ko ʻeni mei heʻetau Tamai Hēvaní ha fakafiemālie lahi kiate au. Kuó Ne ʻi ai maʻu pē ke tokoniʻi au, ʻo tatau ai pē pe ko e hā. ʻOku taʻengata ʻEne ʻofá, pea ʻoku ʻikai mafakakaukaua ʻa ʻEne fie feilaulauʻi Hono ʻAló ke fakahaofi kotoa kitautolú. Kuo ʻomi ʻe he tōʻonga fakaofo ko ʻeni ʻo e ʻofá ha mālohi ke u ikunaʻi ʻa e meʻa kotoa pē ʻoku hokó pea tuʻu ke fetuʻutaki mo Ia.

Janette Tam, Kalefōnia, USA

“He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).

Kuo tokoniʻi au ʻe heʻeku ʻilo lahi ange ki he palani maʻongoʻonga ʻo e fakamoʻuí mo e hakeakiʻí ke u ʻiloʻi ko e fānau au ʻa e ʻOtuá. ʻI heʻeku ako ʻa e Mōsese 1:39, ʻoku mahino kiate au ʻoku ʻi ai ha fatongia maʻongoʻonga ʻa e Tamai Hēvaní ke fakahoko ʻi heʻeku moʻuí. ʻOku ʻomai ʻe he meʻá ni kiate au ha ʻamanaki lelei mo ha fakamahino.

Tuʻunga ʻi hoku uiuiʻi mo e fatongia ko ha husepāniti mo ha tamaí, kuó u ako ai ko e ʻOtuá ʻa ʻeku Tamaí pea ʻokú Ne ʻofa ʻi he kotoa ʻo ʻEne fānaú. Kuo tokoniʻi au ʻe he fakahoko mo tauhi ʻa e ngaahi fuakavá ʻo fakafou ʻi he fakatomala fakaʻahó mo maʻu fakauike ʻa e sākalamēnití ke u ongoʻi ʻEne ʻofa kiate au mo hoku fāmilí.

Francis Kikambi Sseremba, Uakiso, ʻIukanitā

ʻOkú ke ʻiloʻi nai ha taha ʻoku fiemaʻu ke fakamanatu ki ai ʻoku nau mātuʻaki mahuʻinga lahi? Kumi ha founga ke vahevahe ai e ʻofa ʻa e ʻOtuá mo e niʻihi kehé ʻi he ʻahó ni!