Ko Hai Naʻá Ne Fakafonu ʻa e Faiʻanga Papitaisó?

Tā fakatātā ʻa David Miles

Hili haʻama tōmui ki ha pasi ʻi Nailopi ʻi Keniā, naʻá ku fakakaukau mo hoku hoá ke ma vahevahe ʻa e ongoongoleleí mo e tokotaha kotoa pē naʻá ma sio ki ai lolotonga ʻema talitali ki ha pasi ʻe taha ki homa feituʻú. Naʻá ma talanoa ki ha kakai ʻe toko 400 tupu.

Ko e taha ʻo kinautolu ko Penaati, ʻa ia naʻe ngāue langa ofi mai pē. Naʻá ma ʻoange kiate ia ha Tohi ʻa Molomona peá ma fakatukupaaʻi ia ke ne lau fakaʻaho ia pea fehuʻi ki he ʻOtuá pe ʻoku moʻoni nai ia.

Hili ha māhina ʻe fā mei ai, naʻá ku hiki ki Nailopi. Naʻá ku sio kia Penaati ʻi heʻeku fuofua houalotu sākalamēniti ʻi aí. Naʻe ʻosi papitaiso pea fakanofo ia ki he Lakanga Taulaʻeiki Faka-ʻĒloné.

Naʻe fakaafeʻi fiefia kimaua ʻe Penaati ke ma ʻaʻahi ange ki hono ʻapí ʻo akoʻi hono uaifi ko Meikení. ʻI heʻemau feʻiloaki mo Meikení, naʻá ma ʻohovale ʻi heʻene fuʻu tui lahí. ʻI he taimi naʻá ne lotu ai ke ʻiloʻi pe ʻoku moʻoni ʻema pōpoakí, naʻe tali ʻe he ʻOtuá ʻene lotú.

Naʻá ma fakaafeʻi ʻa Meikeni ke ne papitaiso ʻi he Sāpate hono hokó. Ka neongo ia, ʻi he uike ko iá, naʻe fanongonongo ʻe he kolo ko Nailopí ʻe tuʻusi ʻa e vaí ʻi ha ʻaho ʻe 10! Hili e ʻinitaviu papitaiso ʻo Meikeni ʻi he ʻaho Tokonakí, naʻá ku lotua mo hoku hoá ke hoko atu hono papitaisó ʻi he ʻaho hono hokó.

Naʻa mau ʻaukai, fealeaʻaki mo homau kau takí, mo feinga ʻi ha ngaahi founga kehekehe ke maʻu ai ha vai—ka naʻe ʻikai hano ʻaonga. ʻI he efiafi ko iá naʻa mau teuteu pē ki he papitaisó. Naʻa mau tūʻulutui leva ʻo toe lotu. Naʻá ma ongoʻi naʻe ueʻi kimaua ke ma fakamaʻu ʻa e tafaʻaki ʻe taha ʻo e housí ki he paipa ʻi he peito ʻo e falelotú pea tuku ʻa e tafaʻaki ʻe tahá ki he vai faiʻanga papitaisó. Naʻá ma toe fai ha lotu, lokaʻi e falelotú, peá ma foki ki ʻapi.

ʻI heʻemau ō ki he ʻapisiasí he pongipongi hono hokó, ne mau fakatumutumu he fonu vai ʻa e faiʻanga papitaisó! Naʻá ma vakaiʻi e paipa ʻi peitó, ka naʻe teʻeki ai pē ke haʻu ha vai. Naʻe ʻikai ha taha mei he koló naʻá ne ʻilo ki he fakafonu ʻo e vai papí.

Naʻe papitaiso ʻa Meikeni ʻi he ʻaho ko iá. Naʻe haʻu kotoa ʻa e uōtí ke mamata ʻi hono papitaisó mo talitali lelei ia ki he Siasí. Naʻe kei mōmoa pē ʻa e paipá, ka naʻe loʻimataʻia e tokotaha kotoa pē ʻi he loto-houngaʻiá.

Naʻe akonaki ʻa Palesiteni Lāsolo M. Nalesoni, “ʻE tāpuekina koe ʻe he ʻEikí ʻaki ʻa e ngaahi mana ʻokú ke fiemaʻú kapau ʻokú ke tui kiate Ia, ʻʻo ʻikai fakataʻetaʻetui ʻi ha meʻa ʻe tahaʼ [Molomona 9:21]. Fai ʻa e ngāue fakalaumālié ke maʻu ai ʻa e ngaahi maná.” ʻOku ou ʻiloʻi koeʻuhí naʻá ku fakahoko mo hoku hoá ʻa e ngāue fakatuʻasinó mo fakalaumālié—ʻo lotu, feinga ʻi ha ngaahi founga kehekehe, mo muimui ki he ngaahi ueʻi fakalaumālié—naʻá ma mamata ki ha mana mei he ʻEikí.