Pīkitai ki Heʻetau Ngaahi Fuakavá

fefine malimali ʻoku tangutu ʻi ha ʻā maka

ʻE lava ke tokoniʻi koe ʻe he ngaahi fakamatala ʻi he ngaahi makasini ʻa e Siasí ki he māhina ní ʻi hoʻo feinga ke “pīkitai ki he ngaahi fuakava” kuó ke fakahokó (Tokāteline mo e Ngaahi Fuakava 25:13).

Ko e Ako mei he Makasini Ko ʻEní

Fanongo ki he Leʻo ʻo e Langí

ʻOku fakamanatu mai ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he peesi 2, ʻe lava ke tohoakiʻi kitautolu ʻe he longoaʻa ʻo e māmaní mei he leʻo ʻo e Laumālié. ʻOku ʻi ai nai ha ngaahi meʻa fakahohaʻa ʻi hoʻo moʻuí ʻokú ne ʻai ke faingataʻa ʻa e fetuʻutaki mo e ʻOtuá? Te ke lava ʻo fokotuʻu ha taumuʻa he māhiná ni ke fakasiʻisiʻi e ngaahi meʻa fakahohaʻa ko ʻení, hangē ko e fakaʻaongaʻi ha taimi lahi ange ke moihū ʻi he temipalé pe fakahoko ha ʻaukai mei he mītia fakasōsialé.

Tokoniʻi e Niʻihi Kehé ke Nau Maʻu e Ngaahi Tāpuaki ʻa e ʻOtuá

ʻOku fakamatalaʻi ʻe he fakamatala ʻi he peesi 18 ʻa e founga ʻe lava ke maʻu ai ʻe he kāingalotu ʻo e Siasí ʻa e fiefiá mo ongoʻi ʻoku nau kau ʻi he temipale ʻo e ʻEikí, neongo pe ko e hā honau tuʻunga fakamalí. Ko e hā te ke lava ʻo fai ke tokoni ke mahino ki ho kaungā Kāingalotú mo nau maʻu e ngaahi tāpuaki kuo foaki ʻe he Tamai Hēvaní ki Heʻene fānau kotoa pē ʻoku nau tauhi e ngaahi fuakava mo Iá?

Maʻu mo ʻIloʻi ʻa e Fakahaá

Lau ʻa e fakamatala ʻi he peesi 44 naʻe fai ʻe ʻEletā Kulisitofā G. Kiliati-Kalia ʻo e Kau Fitungofulú ke kumi ha ngaahi fakakaukau ʻe nima ki hono maʻu mo ʻiloʻi ʻo e fakahaá. Ko e hā ha ngaahi tafaʻaki ʻi hoʻo moʻuí ʻokú ke fiemaʻu ai ha tataki fakalangi? Fakakaukau ke fakaʻaongaʻi ʻa e ngaahi tefitoʻi moʻoni naʻe akoʻi ʻe ʻEletā Kiliati-Kalia ʻi hoʻo fekumi ki ha ueʻi fakalaumālie mei he ʻOtuá ʻi he māhiná ni.

Fiefia Fakafāmili ʻi he Haʻu, ʻo Muimui ʻIate Aú

Tokāteline mo e Ngaahi Fuakava 20:75–79

ʻI he taimi naʻe fokotuʻu ai ʻa e Siasi ʻo Sīsū Kalaisi kuo fakafoki maí ʻi he 1830, naʻe fakahinohinoʻi ʻe he ʻEikí ʻa Hono kakaí ke nau “faʻa fakataha … ke maʻu ʻa e maá mo inu ʻa e uainé ko e fakamanatu ʻo e ʻEiki ko Sīsuú” (Tokāteline mo e Ngaahi Fuakava 20:75). Te ke lava ʻo ʻahiʻahiʻi ʻa e ʻekitivitī ko ʻení mo hoʻo fāmilí ke ako lahi ange fekauʻaki mo e sākalamēnití:

Lau fakataha ʻa e ongo lotu tāpuakiʻi ʻo e sākalamēnití ʻi he Tokāteline mo e Ngaahi Fuakava 20:77, 79. Te ke lava ʻo tokoni ke mahino ki hoʻo fānaú ha faʻahinga lea foʻou pē, hangē ko e “fakamāʻoniʻoniʻí.”

Ko e hā ha meʻa ʻe tolu ʻoku tau palōmesi te tau fai? Ko e hā e tāpuaki ʻoku talaʻofa mai ʻe he ʻEikí ke foaki mai maʻatautolú?
Ko e hā ha ngaahi founga te tau lava ai ʻo “manatu maʻu ai pē” ki he Fakamoʻuí lolotonga e uiké, fakafoʻituitui mo fakafāmili fakatouʻosi?
Mahalo naʻa fiemaʻu ʻe homou fāmilí ke nau feinga ke ako maʻuloto ʻa e ongo lotu tāpuakiʻi ʻo e sākalamēnití. Te ke lava ʻo fakaʻaongaʻi ha ngaahi naunau tokoni fakafaiako ki he sió ke tokoni. Fehuʻi kimui ange ki he kau mēmipa ʻo e fāmilí pe ko e hā ne nau ako mei he fakakaukau ki he fakalea ʻo e ongo lotu tāpuakiʻi ʻo e sākalamēnití.

Mei he Makasini Ki Hono Fakamālohia ʻo e Toʻu Tupú

Ko Hono Ikunaʻi ʻo e Ngaahi Fakafeʻātungia ki he Lotú

Kumi ha fanga kiʻi fakakaukau faingofua ki hono ikunaʻi ʻo e ngaahi fakafeʻātungia angamaheni ʻo e lotú.

Ngāue mo e Laumālié

Lau ʻa e fanga kiʻi tokoni ko ʻení ke tokoni ke ʻiloʻi ʻe he toʻu tupú ʻa e founga ʻoku folofola mai ai ʻa e Tamai Hēvaní kiate kinautolú ʻo fakafou ʻi he Laumālie Māʻoniʻoní.

Ko e Fakapulipuli ke ʻOua Naʻa Toe Tōnounoú

Tokoni ke liliu ʻe he toʻu tupú ʻenau fakakaukau ki he taʻe-malavá mo e loto-mamahí.

Toʻu Tupu Faiva Vilo Afí

Fiefia ʻi ha talanoa ki he kau faiva vilo afi ʻa e toʻu tupú ʻi Hauaiʻi, USA, mo e meʻa ʻoku nau ako fekauʻaki mo e ongoongoleleí ʻo fakafou ʻi honau ngaahi talēniti makehé.

Mei he Makasini Ko e Kaumeʻá

Feinga ke ʻIlo Lahi Ange ki he Ngaahi Lauʻi Peleti Koulá

Fakaʻaongaʻi ʻa e fakahokohoko ʻo e ngaahi meʻa ne hoko ʻi he konga Haʻu, ʻo Muimui ʻIate Au ʻo e māhina ní ke tokoniʻi hoʻo fānaú ke nau ako fekauʻaki mo e founga naʻe kamata ai ʻa e Tohi ʻa Molomoná.

Founga ke Fakafanongo ai ki he Laumālie Māʻoniʻoní

Lau ʻa e ngaahi talanoá pea hivaʻi ha foʻi hiva foʻou mei he makasini ʻo e māhina ní ke tokoniʻi hoʻo fānaú ke nau ako ʻa e founga ʻoku folofola mai ai ʻa e Tamai Hēvaní kiate kitautolu ʻo fakafou ʻi he Laumālie Māʻoniʻoní.

Fānau Moʻui Lelei mo Fiefiá

ʻI he konga maʻá e Fānau Lalahi Angé, kumi ha ngaahi maʻuʻanga tokoni fekauʻaki mo e moʻui lelei fakaelotó mo e moʻui lelei fakaeʻatamaí.

Mālō e lelei mei Matakasikā!

Feʻiloaki mo hotau kaungāmeʻa ko Loleiní pea ako ki he founga ʻo ʻene muimui ʻia Sīsuú. Lau leva ha meʻa lahi ange fekauʻaki mo Matakasikā pea mo e tuʻunga ʻoku ʻi ai ʻa e Siasí ʻi aí.