Nofo Maʻu ʻi he Fakamoʻuí

Tā fakatātā ʻa David Miles

Naʻe ʻalu hoku fāmilí ʻi ha faʻahitaʻu māfana ʻe taha ʻo ʻeveʻeva mālōlō ki he fakatonga ʻo Siainá, ʻa ia ne mau heka ai ʻi ha ʻū meʻalele kaka moʻunga (ATVs) ʻi ha vaotā. ʻI heʻemau aʻu atu ki he ʻapitanga ATV, naʻa mau ʻohovale ʻi he taimi naʻe ʻomi ai ʻe he kau faifakahinohinó ha suti kakato maluʻi ki he sinó mo ha ngaahi fuʻu tatā mo e matasioʻata. Naʻe hangē ia ne kiʻi fuʻu lahí ki he kau heka meʻalele ʻeveʻevá ʻi ha ʻaho vela mo ʻafu, ka naʻa mau tui pē ʻa e ʻū teungá.

Hili ʻemau maʻu ha fakahinohino ki he founga ʻo e heka ʻi he meʻalelé, naʻa mau lele leva ʻo mau aʻu ki he tumutumu ʻo ʻemau fonongá. Naʻa mau tuʻu ai ʻo inu vai mo holoholoʻi e pupuhá mei homau fofongá.

Naʻe fakamatalaʻi mai leva ʻe heʻemau tokotaha fai fakahinohinó ʻe faingataʻa ange ʻa e hifó. ʻE fiemaʻu ke mau vāofi fakataha pea lele laine taha ʻa e ʻū ATV, ʻo pā ʻa e ATV takitaha ki he meʻalele ʻi muʻá mo mui ke palanisi ʻa e kulupú.

ʻI he kamata ke mau lele hifo ki laló, ne mau feuiʻaki ke fakafekauʻaki ʻemau ʻalu hifó. Ka neongo ia, naʻa mau māvahevahe māmālie pē, ʻo ʻikai pā ʻa ʻeku meʻalelé ki he ATV naʻe heka ai ʻeku tangataʻeikí mo hoku tehina ko Viví. Fakafokifā pē kuo punakaki ʻa Vivi mo ʻeku tangataʻeikí mei heʻena meʻalelé! Naʻe puna ʻeku tangataʻeikí ʻi ʻolunga ʻia Vivi ʻo taimi tonu pē ke ne maluʻi ia mei hono tataʻo ʻe he ATV naʻe mafulí.

Naʻá ma ongoʻi fiemālie ʻaupito ʻi heʻema sio atu ki he tuʻu hake ʻeku tangataʻeikí mo Vivi ʻo tafitafiʻi e kelekelé mei hona talausesé. Fakamālō ki he teunga maluʻi naʻá na tuí, naʻe lavelavea siʻisiʻi pē ʻeku tangataʻeikí. Naʻe ilifia ʻa Vivi ka naʻe ʻikai ke ne lavea. ʻI he taimi naʻa mau toe fetaulaki fakakulupu aí, naʻe fakamanatu mai ʻe he tokotaha faifakahinohinó kiate kimautolu ʻi ha leʻo mālohi naʻe pau ke fakafehokotaki ʻemau ATV kapau naʻe ʻikai ke mau loto ke mau toe teka hifo ʻi he tafungofungá.

ʻOku faʻa fakataueleʻi kitautolu ʻi he moʻuí ke tau fakakaukau te tau lava ʻo fai ha ngaahi meʻa ʻiate kitautolu pē. ʻOku tau fakakaukau ʻoku ʻikai fiemaʻu ke tau tui e teunga maluʻi ʻo e ongoongoleleí, ʻa ia ʻe lava ke taʻefakafiemālié. Ko e meʻa tatau pē, mahalo ʻe ʻi ai ha ngaahi taimi ʻe faingataʻa ai ke tau kei fetuʻutaki maʻu pē mo ʻetau Tamai Hēvaní. ʻI he taimi ʻoku ʻikai ke tau fai ai iá, ʻoku tau fehangahangai toko taha ai mo e ngaahi hala fakailifia mo fakatuʻutāmaki ʻo e māmaní, ʻo tau tuʻu laveangofua ai ki ha ngaahi fakatuʻutāmaki mo ha ngaahi lavea fakalaumālie lahi.

Kapau te tau fakaʻaongaʻi ʻa e maluʻi ʻoku ʻomi ʻe he ongoongoleleí pea kei fetuʻutaki maʻu pē mo e Tamai Hēvaní mo Sīsū Kalaisi, te tau lava ʻo fehangahangai mo e ngaahi faingataʻa ʻoku toka mei muʻa ʻi heʻetau moʻuí. Tatau ai pē pe ʻoku fakamanavahē pe fakailifia fēfē ʻa e halá, ka te tau lava ʻo ikuna fakataha mo Kinaua.