Vakaiʻi e ʻAá

Tā ʻo e tokotaha faʻu tohí ʻi he fāmá meia Shaun Sutton

ʻI he fakaʻosinga ʻo ʻeku hoko ko ha faifekau tokoni kei talavoú, naʻá ku muimui ki ha ueʻi ke u ngāue ʻi ha ʻaho ʻe ua he uike ʻi ha faama ʻi ʻIutā maʻá e ngaahi fāmili fakakautau mo hao moʻuí. Naʻe ʻikai haʻaku aʻusia ʻe taha ʻi ha faʻahinga meʻa pē naʻe fekauʻaki mo e fanga hōsí, ka naʻá ku fiefia.

ʻI he kamata ʻo ʻeku ʻi aí, naʻe kole mai ke u fakamaʻa ʻa e ngaahi loki tauhiʻanga ʻo e fanga hōsí. Naʻe vahe mai hoku kaungāmeʻa mo e hoa ngāue lelei naʻá ma ō ʻo faiako ʻi he ngaahi efiafí, ko ʻEletā Salitena, ke ne fakahinohino mai ʻa e meʻa ke u faí.

ʻI ha ʻaho ʻe taha ʻi heʻeku aʻu ki he fale tauhiʻanga hoosi fakaʻosí ke fakamaʻá, naʻá ku muimui atu ʻia ʻEletā Salitena ki loto. Naʻá ku maʻu ʻi hoku ʻatamaí ha ongo angavaivai ke fehuʻi ange fekauʻaki mo hono tāpuniʻi ʻo e ʻā ʻi mui ʻiate kimauá. Naʻá ku tukunoaʻi leva ʻa e fakakaukaú peá u ngāue ki hono fakamaʻá.

Ko e hoosi ʻi he lotoʻaá ko Suleki, ko e taha ia ʻo e fanga hoosi lahi taha ʻi he fāmá. Naʻe kamata ke ne mafulifuli loto-hohaʻa holo ʻi heʻema fakamaʻá. Fakafokifā pē kuo lele ʻa Suleki ki tuʻa mei he lotoʻaá ʻi he ʻā naʻe fakaavá ʻo lele fakalaka atu he fanga hoosi kehe ʻi tuʻa ʻi he lotoʻaá.

Meʻamālié, naʻe toʻo mai ʻe ha taha ʻo e kakai taukei ʻi he fāmá ha kane ʻouti peá ne tohoakiʻi fakavavevave ʻaki e hōsí ke foki mai. ʻI heʻene fakafoki ʻa Suleki ki hono lotoʻaá, naʻá ne sio mai kiate au peá ne fehuʻi mai, “Ko e hā e meʻa ne tau akó?”

Ko e lēsoni naʻe mahinó ke tāpuniʻi maʻu pē ʻa e ʻaá. Naʻá ku manatu ai ki ha potufolofola naʻá ku lau ʻi he pongipongi pē ko iá naʻá ne akoʻi au ke u talangofua “ki he ngaahi fakahinohino ʻa e Laumālie Māʻoniʻoní” (Mōsaia 3:19).

ʻI heʻeku hū atu mo ʻEletā Salitena ki he loki tauhiʻanga ʻo Sulekí, naʻá ku tukunoaʻi ha ueʻi mei he Laumālie Māʻoniʻoní ke tāpuniʻi e ʻaá. Naʻá ku fakangatangata ʻa e Laumālié ke ne faleʻi au ʻi he meʻa pē naʻá ku pehē ko e ngaahi meʻa “fakalaumālie” ʻoku fekauʻaki mo e folofolá pe ko e ngaahi fekaú. Naʻe fakavaivaiʻi au ʻe he aʻusia ko ʻení. Naʻá ku fakatokangaʻi naʻe lahi ange ʻa e ʻilo ʻa e Laumālié ʻi he meʻa naʻá ku ʻiloʻí—ʻo aʻu pē ki he fāmá!

Naʻe akoʻi mai ʻe Palesiteni Tōmasi S. Monisoni (1927–2018), “Manatuʻi ʻoku ʻikai ko haʻata ngāue ʻeni ʻataua. … Ko e taimi ʻoku tau fai ai e ngāue ʻa e ʻEikí, ʻoku ʻi ai leva ʻetau totonu ki he tokoni ʻa e ʻEikí.”

Mahalo naʻe ʻikai ke u mei akoʻi e ongoongoleleí ʻi he fāmá, ʻo hangē ko ia ne u mei fai mo ʻEletā Salitena ʻi he efiafi ko iá, ka naʻe ʻi ai ʻeku totonu ki he tokoni mo e fakahinohino fakalangí—ʻo aʻu pē ki heʻeku ngāue ke fakamaʻa ʻa e ngaahi loki tauhiʻanga hōsí.