O Loo Faasoa Mai e se Aiga Papua Niu Kini La Latou Malaga o le Faatuatua

Ia Setema 2024, sa malaga ai se aiga e toalima mai se nuu i tua o Papua Niu Kini i Hamilton, Niu Sila. Latou te lei malaga e matamata pe o ni tagata tafafao, ae ia tuufaatasia, pe “faamauina” o se aiga mo le faavavau.

E faamau faatasi aiga i na o maota paia lava o le Alii, ua ta‘ua o malumalu, i Le Ekalesia a Iesu Keriso o le Au Paia o Aso e Gata Ai.

O loo fauina i le taimi nei e le Ekalesia se malumalu i Port Moresby, Papua Niu Kini, ae e faitau masina ona faatoa mae‘a lea.

I le tapenaga mo le faamaeaina o se malumalu i lo latou atunuu, sa malaga mai ai talu ai nei le aiga o Wano i le 5000 kilomita i le Malumalu o Hamilton Niu Sila, o Le Ekalesia a Iesu Keriso o le Au Paia o Aso e Gata Ai Na faia e Paul ma Christina Wano, ma le la fanau e toatolu o, Elaine, 17, Natasha, 16, ma Ali, 15, le malaga umi ina ia soofaatasia ai o se aiga mo le faavavau.

O loo avea Paul o se taitai e galue fua mo le tele o aulotu a le Ekalesia i le itu maotua o Papua Niu Kini o Rigo. E volenitia ia Christina o se faufautua o le autalavou i la latou aulotu.

E faapei o aiga uma e tapenapena mo se malaga sagisagi fiafia, sa latou mafaufau ma le faautauta i lo latou aafiaga na lupe.

“Ua ou iloa a oo i le taimi ou te alu ai i le malumalu,” o le tala lea a Paul, “e mafai ona avea au o se tagata ua lelei atili i le taulimaina o lo‘u aiga ma isi e vagaia a‘u, i le ala e finagalo ai le Tama Faalelagi ia te au.”

Fai mai Christina, “Ua ou lagona le faafetai, ua ou lagona le fiafia e o faatasi ma lo‘u aiga i le malumalu.”

Fai mai Ali, 15, “Ua ou sagisagi fiafia lava ma ua ou lagonaina o se faamanuiaga lo matou o ma lo‘u aiga i le malumalu ina ia faamauina ai mo le faavavau.”

Fai mai lona tuafafine o, Natasha, 16, “Ou te faalogo o fai mai tagata, a outou o i le malumalu tou iloaina ni mea e fou, ma ua ou fefe e oo i ni mea fou. Ae o se faamanuiaga mo a‘u, o lea la ua ou manao moni ai lava e oo foi i ni mea fou.”

Fai mai Elaine e 17-tausaga, “Ua ese lo‘u fiafia ona sa matou faia ma lo‘u aiga le tele o ni osigataulaga ina ia o ai i le malumalu. O lea la ua oo mai lo matou taimi, ma o le a faamauina i matou, ma ua ou fiafia lava. Ou te manao ia faapei o faifeautalai o loo galulue, ma ou te manao ia ou mitamita lava. Ou te manao ia mitamita lo‘u aiga ia te au.”

Sa felelei le aiga o Wano mai Port Moresby, Papua Niu Kini, i Aukilani, Niu Sila i le faaiuga o Setema 2024, ona malaga lea i se pasi i le malumalu aupito lata ane i Hamilton.

Mo le fa aso sa latou mauaina ni faatonuga ma auai ai i sauniga ia e aumaia ai agaga, o e ola ma ua oti, e latalata atili ia Keriso. Mo i latou taitoatasi, o le taimi aupito fiafia, o le taimi na tootutuli faatasi ai i se fatafaitaulaga o le malumalu paia, ma sa faamauina ai faatasi o se aiga mo le faavavau.

E manatua e Ali le tilotilo atu i ona matua. “Sa faatumulia au i le olioli ma le filemu ona o le a matou faatasi i le isi olaga. O le mea e tasi na aoao mai e le malumalu ia te au o le, ua tatau nei ona ou saunia e ta‘u atu I tagata e uiga i mea na ou lagonaina i le malumalu.”

Fai mai Natasha o le aafiaga na suia ai o ia. “Na fesoasoani lea ia te au e fausia ai sootaga ma isi tagata. Ou te fia alu I la‘u misiona ina ia mafai ai ona ou ta‘u atu i tagata e uiga i le malumalu.”

Na faaopoopo mai Elaine, “Sa ou lagonaina e pei sa i ai le Agaga [o le Atua] iina. Sa ou lagonaina. O lea la ua matou i ai i le fale, ma e matou te faia e le aunoa a matou tatalo ma afiafi faaleaiga. O le faamauina ai i le malumalu, ua matou lagona ai le malolosi e mafai ai ona matou faatoilalo faaosoosoga.”

Fai mai Paul sa ia “tagi I le malumalu i le taimi o le faamauga, ma sa ou iloaina sa faamanuiaina a‘u e le Atua.”

Fai mai Christina ina ua auai atu le la fanau i le potu o le faamauga “sa matagofie tele. Sa ou le mautinoa pe o le a suia moni a‘u e le malumalu, ae na tupu. Ua ese lo‘u tilotilo atu I mea. Ua sili atu ona matagofie mea uma.”

Talu mai le 2019, ua fesoasoani Le Ekalesia a Iesu Keriso o le Au Paia Aso e Gata Ai I le silia ma le 300 Tagata Papua Niu Kini, e pei o le aiga o Wano, e malaga i fafo atu o le atunuu e asiasi i malumalu o le Ekalesia i se polokalama ua mafai ona o foai a tagata o le Ekalesia i le salafa o le lalolagi. I masina a sau, pe a tatala se malumalu i le taulaga o Port Moresby, o le a toatele atu aiga o le a mafai ona auai i sauniga paia o le malumalu, ia e soofaatasi ai aiga mo le faavavau ma faamalolosia ai le faatuatua ia Iesu Keriso.