O Feagaiga ma Vavega

Matou te nonofo i se Motu matagofie o le Pasefika e leai se malumalu. Ae ua masani le Au Paia o Aso e Gata Ai i Niu Kaletonia e malaga i mea mamao e asiasi i le Maota o le Alii.

Sa matou sefeina a matou tupe i le taimi o le faama‘i oti o le KOVITI, ma ia Tesema 2023, sa mafai ona matou malaga i Iuta e asiasi I lo ma afafine ma le mau malumalu o loo i ai iina. I le mavae ai o le lima tausaga o le le mafai ona faia o galuega mo o matou augatuaa, sa matou saunia ni igoa e 65 e ave i le malumalu i le taimi na matou nonofo ai iina.

Sa o se lu‘itau le taufaavasegaina o taimi faatulagaina mo galuega uma o le malumalu sa matou fuafuaina mo Iuta. Sa matou matuai naunau e fesoasoani i o matou augatuaa, ma a o lata mai le aso matou te toe foi ai, sa amata le matou galuega maoae—sa mafai ona faamautu sauniga e fa mo papatisoga i malumalu eseese i le aso lava e tasi.

Sa matou ulufale atu i le potu papatiso i le Malumalu o Provo i le taeao po, ma sa ou augani atu i le Tama Faalelagi ia saunia se vavega mo le galuega sa moomia ona matou faia. Sa ou faatuatua o le a finagalo foi o Ia e silasila mai ua papatisoina o‘u augatuaa.

Sa faifailemu le gaoioi a tagata ulu i le vai papatiso i lena taeao nai lo le mea e masani ai, ae sa ou faamalamalamaina lo matou tulaga i se tuafafine faigaluega o le malumalu, ma sa ia valaaulia isi tagata ulu naunautai e fesoasoani matou te faatinoina faatasi le galuega.

O se aafiaga maoae ma o‘otia le molimauina o tuaa uma e 65 o papatisoina e tagata sui, ta‘itasitasi, ina ua mavae se taumafaiga tele sa matou faia e su‘e i latou! Sa matou faafetai mo lenei vavega muamua. Sa malosi le Agaga, ma sa mafai ona matou lagonaina le mapusaga, faafetai ma le fiafia ma i na agaga taua e 65.

O le tuafafine faigaluega i le malumalu—ua matou faaigoaina o ia o lo matou “Tuafafine Vavega” i le taimi nei—na ia valaaulia i matou i lona fale, sa manao e fia iloa atili i le tala a lo matou aiga. Sa fesagisagia‘i o matou aiga e lua a o talanoa e uiga i misiona ma ‘aai a matou waffles, galuega o le malumalu, talafaasolopito o aiga, ma o matou faamanuiaga uma mai lo tatou Tama Faalelagi.

Ina ua faaiuina le afiafi, sa talosagaina e Tuafafine Vavega se faamanuiaga faaleperisitua mo se faamafanafanaga, ona sa faailoa atu ia te ia ua maua i se kanesa ogaoga, ma ua sauniuni o ia mo le togafitia i le kimo, taotoga, ma faauila.

Faatasi ai ma lona toalua, sa ou tuuina atu se faamanuiaga ia aua ne‘i faapu‘upu‘uina lona ola, a ia vaai i lana fanau o o e faamisiona, ma ia fiafia e matamata i fanau a lana fanau a o tuputupu a‘e.

Mulimuli ane, sa faasoa mai ai e Tuafafine Vavega e uiga i la matou asiasiga:

“. . . o se alofa mutimutivale mai le Alii, na iloa ai sa Ia silafia a‘u ma lo‘u tofotofoga fou i le kanesa. Sa faamalosia lo‘u faatuatua ia Iesu Keriso. Ua faamanuiaina au i le i ai o lenei aafiaga faatasi ma a‘u uo fou mai Niu Kaletonia.”

Sa faaauau pea ona ia faasoa mai mea ua ia aoaoina: 

“Tatou te o‘o uma lava i tofotofoga ma luitau eseese i o tatou olaga. Ua ou filifili e faatotonugalemu lo‘u ola ia Iesu Keriso ma tausi a‘u feagaiga ma Ia. Ua ou talitonu ma mautinoa o le a Ia faamanuiaina a‘u, i Lana ala atoatoa. E tele ina ou faaaogaina le fasifuaitau ‘ae afai e leai’ i a‘u tatalo. Ou te ole mo le faamalologa ma le malosi ae, afai ou te le malosi mai le kanesa, ou te talitonu o le a Ia faamanuiaina a‘u i Lana ala atoatoa. Ua i ai lo‘u talitonuga atoatoa o le a Ia saunia foi vavega ma sina alofa mutimutivale i luga o le ala, e fesoasoani ai ia te au ia ou iloa o loo Ia silafia a‘u.

O lenei savali mai ia Elder Soares, o loo faamatalaina ai o‘u lagona, ‘Ou te iloa pe a silasila mai le Alii tusa lava pe na o sina ‘aloiafi o le naunautai po o se emo o se taumafaiga amiotonu i lo tatou naunautaiga e faatotonugalemu o tatou olaga ia te Ia ma i sauniga ma feagaiga tatou te osia i Lona maota, o le a Ia faamanuiaina i tatou, i Lana ala atoatoa, i vavega ma le alofa mutimutivale tatou te manaomia.’”

Mai lava i le aso o la matou uluai asiasiga, sa matou tatalo ai mo Tuafafine Vavega. Sa amata ona atili faigata togafitiga, ma sa tele ina maualalo le faitauga o ona sela papa‘e e mafai ai ona faaauau pea le faiga o le kimo i le saoasaoa e tatau ai. E ui lava i nei faigata, sa i ai lava lo‘u faatuatua ma le talitonuga i le Alii mo lona toe malosi mai.

E fitu masina mulimuli ane, sa vili mai ai Tuafafine Vavega ma lona toalua ia te au a‘o ou agai atu e faigaluega. I se talatalanoaga faavitio, sa la faamatala mai ai taunuuga o le taotoga mulimuli, ina ua uma ona aveese le patu kanesa. O se tulaga faavavega ona, sa lei mauaina e fomai se sela kanesa i lena ‘afu‘afu. Sa le mafai ona faamatala i ni upu lo‘u olioli ma loimata i lenei vavega fou!

E ui o lena ituaiga tali faavavega e le o se taunuuga lea i taimi uma o luitau o le olaga, ae o loo silafia e le Tama Faalelagi o tatou manaoga ma e tuuina mai le malosi e ala i feagaiga ma Ia.

Ioe, mo Tuafafine Vavega, o le fesoasoani lagolago ma le alofa na ia lagonaina mai le Tama Faalelagi o le vavega moni lea i lona olaga. E pei ona saunoa Peresitene Nelson: “O i latou uma e osia feagaiga ma le Atua ua mafai ona mauaina se ituaiga alofa faapitoa ma le alofa mutimutivale,” ma “O alii ma tamaitai uma e auai i sauniga o le perisitua ma osia ma tausia feagaiga ma le Atua e tuusao lava lo latou mauaina o le mana o le Atua.”

Ou te molimau atu, e pei o lo tatou Tuafafine Vavega, e mafai ona faamanuiaina atoatoa i tatou mai le mana le iu ma le alofa o le Atua e ala i le faatuatua, feagaiga, auaunaga, ma le usiusitai. O le Atua o se Atua o vavega. E alofa ma alofamutimutivale o Ia. O Lona Alo o lo tatou Faaola lea iinei i le lalolagi ma tua atu o le veli. O Lona mana e le iu ma o loo avanoa i Ana fanau uma.