“Ngaahi Koloa ʻi he Langí,” Liahona, Fēpueli 2025.
Ko Hono Fakaʻaongaʻi ʻo e Ngaahi Makasini ʻa e Siasí
Ngaahi Koloa ʻi he Langí
ʻOku fakamamafaʻi ʻe hono ako ʻo e Tokāteline mo e Ngaahi Fuakavá ʻi he māhina ní ʻa e ngaahi founga te ke lava ai ʻo “tokonaki ha ngaahi koloa maʻau ʻi he langí” (Tokāteline mo e Ngaahi Fuakava 6:27). Vakaiʻi ʻa e ngaahi fakamatala ʻi he makasini ko ʻeni ʻa e Siasí ke ako lahi ange fekauʻaki mo e ngaahi koloa fakalangi hangē ko e ngaahi aʻusia fakalaumālié, moihū ʻi he temipalé, pea mo ha vā fetuʻutaki mo e ʻOtuá.
Ko e Ako mei he Makasini Ko ʻEní
Lotua ʻa e Niʻihi Kehé
ʻOkú ke ʻiloʻi nai ha taha ʻokú ne foua ha taimi faingataʻa? Muimui ʻi he sīpinga ʻa ʻEletā Tieta F. ʻUkitofa mo hono uaifi ko Helietá, ʻaki haʻo lotua ʻa e tokotaha ko iá (vakai, peesi 2). Manatuʻi ke ke falala ki he finangalo ʻo e ʻOtuá, neongo kapau ʻoku ʻikai maʻu leva ʻe he tokotaha ʻokú ke lotuá ʻa e ngaahi tāpuakí.
Vakaiʻi e Ngaahi Feituʻu Hisitōlia ʻo e Siasí
ʻOku vahevahe ʻe ha taha ʻosi ngāue fakafaifekau naʻe ngāue ʻi he ngaahi feituʻu fakahisitōlia ʻo e Siasí ʻi Niu ʻIoke mo Penisilivēniá ʻa e meʻa naʻe hoko aí pea mo e ʻuhinga ʻoku mahuʻinga ai ʻi he ʻaho ní (vakai, peesi 12). Ko e hā ha ngaahi feituʻu pe aʻusia kuo mahuʻinga ki hoʻo tupulaki ko ha ākonga ʻa Sīsū Kalaisí? Fakakaukau ke talanoa ki hoʻo fāmilí pe kaungāmeʻá fekauʻaki mo ha taha ʻo e ngaahi taimi toputapu ko ʻení mei hoʻo moʻuí pea mo e ʻuhinga ʻoku mahuʻinga ai kiate koé.
Vakai ki he Moʻuí ʻaki ha Fakakaukau ʻoku Taʻengatá
Lau ʻa e fakamatala ʻi he peesi 36 ke ako lahi ange fekauʻaki mo e founga ʻe lava ke fakalahi ai ʻe he ʻenitaumeni fakatemipalé ʻetau fakakaukau ki he palani ʻa e ʻOtuá. Ko e hā ha ngaahi aʻusia kuó ke maʻu naʻá ne tokoniʻi koe ke ke maʻu ha fakakaukau ʻoku taʻengatá—pe fakakaukau fakasilesitiale, ʻo hangē ko e akonaki ʻa Palesiteni Lāsolo M. Nalesoní? Fakakaukau ke hiki hoʻo ngaahi aʻusiá ʻi ha tohinoa pe vahevahe ia mo e fāmilí mo e ngaahi kaungāmeʻá.