Te Mau Lava ʻo Tokoniʻi Koe

Tā fakatātaaʻi ʻe Katy Dockrill

ʻI he taimi naʻe tō ai ʻa e Afā ko ʻĪmá ʻi he ʻOtu Kalipiané ʻi Sepitema 2017, naʻe fakatupu ai ha fakaʻauha lahi ki he ʻotu motú. Naʻe fetuʻutaki mai ha mēmipa fie tokoni ʻo e Siasí mei he ʻIunaiteti Siteití ki hoku husepānití, ʻa ia naʻe hoko ʻi he taimi ko iá ko ha palesiteni fakasiteiki ʻi Pueto Liko.

Naʻá ne pehē mai, “ʻOku ʻi ai haʻaku fuʻu vaka lahi te u ʻalu atu mo ia ki Pueto Liko ke u lava ʻo ʻave ai ha meʻakai mo ha ʻū naunau ki he motu ko Tōtuká. ʻOku ou fiemaʻu hoʻo tokoní ki hono tānaki ʻo e ʻū naunaú.”

Ne kamata leva ke mau tānaki ha ngaahi foaki meʻakai, vala, mo ha ʻū meʻa kehe mei he kāingalotu ʻo e Siasí mo ha niʻihi kehe ʻi Pueto Liko. Naʻa mau ʻave ha vaka fonu ʻe ua ki Tōtuka pea naʻa mau teuteu ke ʻave ʻa e vaka hono tolú ne fonu mo ia ʻi he naunau tokoní, ʻa ia ne mau tānaki ʻi he siteiki senitaá ke tufaki atu. Ko e taimi ia ne mau ʻilo ai naʻe ʻi ai ha matangi ʻe taha, ko Afā Malia, naʻe fononga fakahangatonu mai ia ki Pueto Liko.

ʻI he tō mai ʻa e Afā ko Maliá, naʻá ne maumauʻi homau motú, ʻo mate ai ha kakai ʻe lauiafe. Hili ha ngaahi ʻaho lahi mei ai, naʻe ʻikai ke mau lava ʻo mavahe mei homau koló koeʻuhí ko e ʻuluʻakau kuo holó, veveveve lalahí, mo e ngaahi maumau kehé. Ka neongo ia, naʻe ʻi ai ha meʻakai, vai, vala, mo ha fanga kiʻi koloa fakataautaha ʻi he siteiki senitaá—ʻa e meʻa kotoa pē naʻa mau fiemaʻu ki ha fakatamaki fakanatulá. Ne mau tānaki ʻa e ngaahi meʻa ko iá ke tokoni ki he niʻihi kehé, ka naʻe iku ʻo hoko ia ko ha tāpuaki kiate kimautolu.

Naʻe fakatupu ʻe he afaá ʻa e mate e ʻuhilá pea motuhia ai mo e fetuʻutaki ʻi he ʻinitanetí mo e telefoni toʻotoʻó. Lolotonga e ngāue ʻa e kau maʻu mafai Pueto Likó ke tokoni ki he fakatamakí, naʻa mau maʻu ha ʻū naunau naʻe hoko ia ko ha tokoni vave ki ha kakai tokolahi.

ʻI he fāifai pea mavahe hoku husepānití mei homau ʻapí, naʻe ueʻi mālohi ia ke ʻaʻahi ki ha kāingalotu pau ʻo homau siteikí. Naʻá ne ʻilo ai ha ongo fefine naʻe fakaʻauha hona ʻapí pea naʻe mole ʻa e meʻa kotoa.

Naʻá ne talaange, “Te mau lava ʻo tokoniʻi koe. ‘Oku mau maʻu e meʻa ʻokú ke fiemaʻú. ʻOku fonu ʻa e siteiki senitaá ʻi he ʻū naunaú.”

ʻI he fetuʻutaki mai ʻa e kāingalotu ʻo e Siasí mo e kāingalotu ʻo e ngaahi tui fakalotu kehé ki hoku husepānití ke tokoní, naʻe kamata ke mau maʻu ha fanga kiʻi kaati meʻaʻofa paʻanga mei he kāingalotu ʻo e Siasí ʻi he ʻIunaiteti Siteití ʻa ia naʻa mau tufaki ki he kakai faingataʻaʻiá. Naʻe fakaʻaongaʻi foki ʻe he Siasí ha ngaahi maʻuʻanga tokoni ʻofa fakaetangata hangē ko e meʻakai, vai, mo e ʻū naunau kehe ki homau motú. Naʻe hanga ʻe he ngaahi foaki ko ʻení ʻo ʻai ke mau lava ʻo tokoniʻi ha kakai taʻefaʻalaua ʻi Pueto Liko, ʻi ha lau māhina.

ʻI heʻemau ngāue ke tokoniʻi homau kaungāʻapí hili ʻa e Afā ko ʻĪmá, naʻe teuteu ʻe he ʻEikí ha founga ke mau tokoniʻi ai kimautolu hili ʻa e Afā ko Maliá. Hangē ko e akonaki ʻa e Fakamoʻuí, “Foaki, pea ʻe foaki ia kiate kimoutolu” (Luke 6:38).