Fekumi ki ha Fakahā mei he ʻOtuá

ʻOku ʻi he Tokāteline mo e Ngaahi Fuakavá ha ngaahi akonaki mahuʻinga fekauʻaki mo e fakahaá.

Ko e fē feituʻu ʻoku totonu ke u kumi ai ha ngāue foʻoú? Te u lava fēfē ke fehokotaki lelei ange mo hoku fāmilí? Ko e hā e palani ʻa e ʻOtuá maʻakú?

Mahalo kuo ʻi ai haʻo ngaahi fehuʻi hangē ko ʻení fekauʻaki mo hoʻo moʻuí, ko ho ngaahi vā fetuʻutakí, pe ko hoʻo tuí. ʻE lava ke tataki koe ʻe he Laumālie Māʻoniʻoní ʻi hoʻo tali e ngaahi fehuʻi hangē ko ʻení. ʻE lava ke tokoniʻi koe ʻe he ngaahi potufolofola ʻi he Tokāteline mo e Ngaahi Fuakavá mo e ngaahi akonaki mei he kau palōfitá ke ke ako fekauʻaki mo hono maʻu ha fakahā ki hoʻo ngaahi fehuʻi vivilí.

ʻOku ʻatā ʻa e fakahaá kiate kinautolu kotoa pē ʻoku kolé.

“Kapau te [mou] kole meiate au, te [mou] maʻu; kapau te [mou] tukituki, ʻe toʻo kiate [kimoutolu]” (Tokāteline mo e Ngaahi Fuakava 6:5; vakai foki, Mātiu 7:7).
“Ko e faingamālie ke maʻu e fakahaá, ko e taha ia ʻo e ngaahi meʻaʻofa lelei taha ʻa e ʻOtuá ki Heʻene fānaú.” —Palesiteni Russell M. Nelson

ʻOku maʻu ʻa e fakahaá ʻi ha ngaahi founga kehekehe.

“Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní, ʻa ia ʻe hoko mai kiate koe pea ʻe nofo ʻi ho lotó” (Tokāteline mo e Ngaahi Fuakava 8:2).
“ʻOku ngāue ʻaki ʻe he ʻOtuá ha ngaahi sīpinga kehekehe ke fakahoko mai ai e ngaahi fakahaá ki Hono ngaahi fohá mo e ngaahi ʻofefiné, hangē ko ha ngaahi fakakaukau ki he ʻatamaí mo ha ngaahi ongo ki he lotó, ngaahi misi, ngaahi meʻa-hā-mai, ngaahi fetalanoaʻaki mo ha kau talafekau fakalangi, mo ha ngaahi ueʻi fakalaumālie.” —ʻEletā David A. Bednar ʻo e Kōlomu ʻo e Kau ʻAposetolo ʻe Toko Hongofulu Mā Uá

ʻE ala fiemaʻu ki he fakahaá ha teuteu.

“Kuo pau ke ke fakakaukauʻi ia ʻi ho ʻatamaí; pea kuo pau ke ke toki fehuʻi mai kiate au pe ʻoku totonu ia” (Tokāteline mo e Ngaahi Fuakava 9:8).
“ʻOku faitokonia lahi ange ʻetau teuteu fakalaumālié ʻi he taimi ʻoku tau ako maʻu ai pē ʻa e folofolá mo e ngaahi moʻoni ʻo e ongoongoleleí pea mo fakalaulaulotoa ʻi hotau ʻatamaí e fakahinohino ʻoku tau kumiá.” —ʻEletā Quentin L. Cook ʻo e Kōlomu ʻo e Kau ʻAposetolo ʻe Toko Hongofulu Mā Uá

ʻE lava ke hoko mai ʻa e fakahaá ʻi he founga ʻo e melinó.

“Ke ke fakakaukau ʻi ho ʻatamaí ki he pō ʻa ia naʻá ke tangi ai kiate au ʻi ho lotó. … ʻIkai naʻá ku lea ʻaki ʻa e fiemālie ki ho ʻatamaí ʻi he meʻá?” (Tokāteline mo e Ngaahi Fuakava 6:22–23).
“ʻE [folofola] fakanonga atu e Laumālié ki hoʻo [lotó]. Te Ne fakalotolahiʻi koe ke ke laka atu ʻi he tui. Pea te Ne fakafoki hoʻo manatú ki he ngaahi taimi naʻá ke ongoʻi ai e maama pea mo e ʻofa ʻa Sīsū Kalaisí.” —Palesiteni Henry B. Eyring, Tokoni Ua ʻi he Kau Palesitenisī ʻUluakí

ʻE lava ke ʻomi ʻe he fakahaá ʻa e fiefiá.

“Te u foaki kiate koe mei hoku Laumālié, ʻa ia ʻe fakamāmaʻi ho ʻatamaí, ʻa ia ʻe fakafonu ho laumālié ʻaki ʻa e fiefia” (Tokāteline mo e Ngaahi Fuakava 11:13).
“ʻOku ʻomi ʻe he fiefia ʻokú ne fakafonu hotau lotó ha fakakaukau ʻoku taʻengata, ʻo kehe ia mei he moʻui fakaʻahó. ʻOku hoko e fiefia ko iá ko ha fakanonga ʻi he lotolotonga ʻo e faingataʻá pe mamahí.” —ʻEletā Ronald A. Rasband ʻo e Kōlomu ʻo e Kau ʻAposetolo ʻe Toko Hongofulu Mā Uá