Ngāué pe Lotú?

Tā fakatātaaʻi ʻe Katy Dockrill

Naʻá ku maʻu ha faingamālie ke ngāue ʻi he kautaha naʻá ku fakaʻānaua maʻu pē ke ngāue ai, ʻi he hili ʻa e ʻunivēsití. ʻI he ʻuluaki ʻahó, naʻá ku talaange ki heʻeku pulé ʻeku vēkeveké. Naʻá ku talaange foki kiate ia ʻoku mahuʻinga kiate au hono fakaʻapaʻapaʻi ʻo e Sāpaté.

Naʻá ne talamai te ne fokotuʻutuʻu ʻeku taimi-tēpilé ke fakapapauʻi he ʻikai fiemaʻu ke u ngāue ʻi he Sāpaté. Naʻá ne pehē naʻe fakaʻapaʻapaʻi ʻe he kautahá ʻa e tui ʻa e kakaí.

Naʻá ku fiefia ʻi he ngāué pea fai hoku lelei tahá. Naʻá ku lava ʻo sioloto ki heʻeku ngāue ʻi he kautahá ʻi he ngaahi taʻu lahi ka hoko maí.

ʻI ha ʻaho ʻe taha hili ha ngaahi māhina siʻi mei heʻeku kamatá, naʻe pehē mai heʻeku pulé, “ʻOku ou fiemaʻu ke ke haʻu ʻi he Sāpaté. ʻOku mau fiemaʻu ʻa e timí kotoa ke fakataha mai ke fakaʻosi lelei ʻa e kuatá pea ʻave ha ngaahi ola lelei ki he hetikuotá.”

Ne u ongoʻi hohaʻa.

Naʻá ku tali ange, “Naʻá ta ʻosi talanoa ki he meʻá ni kimuʻa. ʻOku mahino kiate au ʻokú ke fiemaʻu ke ʻi heni ʻa e timí kotoa, ka ʻoku fepaki ʻa e ngāue ʻi he Sāpaté mo e meʻa ʻoku ou tui ki aí.”

Naʻá ne sio fakamamaʻu mai leva kiate au mo pehē mai, “Hangē ʻokú ke loto pē ke tukuange ʻa e ngāue ko ʻení koeʻuhí ko hoʻo tuí.”

Neongo ʻeku saiʻia ʻi heʻeku ngāué, ka naʻá ku fakapapau ke fakahaaʻi ʻeku ʻofa ki he ʻEikí ʻaki ʻeku fakaʻehiʻehi mei he ngāue he Sāpaté (vakai, Tokāteline mo e Ngaahi Fuakava 59:9–10).

Naʻe toe pehē mai ʻe heʻeku pulé, “Kuo pau ke ke ngāue ʻi he Sāpaté ʻi he foʻi tuʻo taha pē ko ʻení.”

Ne ʻikai mahuʻinga ia. Te u ʻiloʻi, pea ʻe ʻafioʻi ia ʻe he Tamai Hēvaní.

Naʻá ku pehē ange, “ʻOku ou kole fakamolemole atu, ka ʻoku ʻikai ke pehē ia kiate au. ʻOku ou tui ko e Sāpaté ko ha ʻaho toputapu ia ke u moihū ai ki he ʻOtuá.”

“Sai, ʻoku tuli koe!”

Naʻe ongo faingataʻa kiate au ʻa e ngaahi leá. Ka neongo ia, ʻi heʻeku lue ʻo ʻalú, naʻá ku ongoʻi ʻa e Laumālie Māʻoniʻoní ʻi hoku lotó. Ko e ʻikai ke u ngāue ʻi he Sāpaté ko ha fakaʻilonga ia naʻá ku fili ke foaki ki he ʻOtuá ʻa e meʻa naʻá ku pehē “naʻe taau mo e Sāpaté.” Naʻá ku ʻiloʻi te Ne tāpuakiʻi au koeʻuhí ko ia. Ne ʻikai fuoloa mei ai, kuó u maʻu ha ngāue lelei ʻaupito ʻe taha naʻe lava ai ke u tauhi ʻa e ʻaho Sāpaté ke māʻoniʻoni.

ʻOku talaʻofa mai ʻa e ʻEikí ʻi he 1 Nīfai 17:13, “Te u hoko foki ko hoʻomou maama ʻi he feituʻu maomaonganoá; pea te u tofa ʻa e hala ki muʻa ʻiate kimoutolu, ʻo kapau te mou tauhi ʻeku ngaahi fekaú.”

ʻE ala feinga ʻa e ngaahi matangi ʻo e māmaní ke fakamavaheʻi kitautolu mei he hala ke muimui ai ki he Fakamoʻuí. Ka ʻi heʻetau muimui kiate Ia ʻi he tuí mo feinga ke talangofua ki Heʻene folofolá, te tau maʻu ai ha mālohi ke ikunaʻi ʻa e māmaní.