Te ’ohipa ’ā’amu ’utuāfare : Tō tātou tere nō te fa’aro’o ’e nō te tū’atira’a

« ’Ua parau atu ra Iesu iāna : Tei iā’u te ti’afa’ahoura’a ’e te ora. ’O tē fa’aro’o mai iā’u ra, pohe noa ’oia e ora ā ïa » (Ioane 11:25).

’Ei ’utuāfare, ’ua fa’aoti māua e riro te ’ohipa hiero ’e te ’ā’amu ’utuāfare ’ei tuha’a faufa’a rahi nō tō māua orara’a fa’aipoipo. ’Ua rave mātou i teienei e rave rahi tauatini ’ōro’a nō tō mātou mau fēti’i i pohe, ’e tae noa atu e rave rahi hānere i’oa Hāmoa, tā māua i ’ite i te fifi roa ’ia ’ite nō te mea ’aita i pāpa’ihia te ’ā’amu. Terā rā, ’ua tāmau noa tā’u tāne ’o Sosene Faleofe « Fe » i te tai’o e rave rahi hora ’e te mau mahana i te Pū ’Ā’amu ’Utuāfare nō te tai’o i te mau rīpene o te mau parau tahito. I muri a’e i te tauto’ora’a rahi, ’ua ti’a iāna ’ia fa’a’ohipa i te mau i’oa i ’itehia ’e ’ia fa’atū’ati i te reira i ni’a i tōna papara’a ’utuāfare. I tō māua ’āfa’ira’a i teie mau i’oa i te hiero i te mau ’āva’e ato’a, e mea ’oa’oa ’ia ’ite ē tē tāhō’ē nei māua i tō mātou mau ’utuāfare e a muri noa atu.

Nō te fa’a’ā’ano i teie ’ohipa, ’ua fa’aau mātou e rave rahi mahana i roto i te matahiti nō te hiero, nō nā u’i e maha o tō mātou ’utuāfare : tō’u nā metua, tā’u tāne fa’aipoipo ’e ’o vau iho, tā māua tamaiti ’e tāna vahine, tā māua mau mo’otua tamāroa matahiapo, tō’u tuahine ’e tōna ’utuāfare. ’Ua rave mātou i te mau bāpetizora’a, te mau ha’amaura’a ’e te mau hōroira’a nō te mau melo e rave rahi hānere o te ’utuāfare i teie mau mahana ta’a ’ē nō te ’utuāfare i te hiero, ma te tāhō’ē i tō mātou mau fēti’i nā roto i te hō’ē rāve’a e ’ore e ravehia i te tahi atu fa’anahora’a.

I roto i te tahi atu ’ohipa e’ita e mo’ehia, ’o vau te rave ’ohipa hiero nō te ’ōro’a ’a tomo mai ai te hō’ē tuahine i roto i tō’u piha. I roto noa i te parau mātāmua i fa’ahitihia, ’ua pūai roa te Varua ’e ’ua ta’i au i te roara’a o te ’ōro’a. ’A haere ai terā tuahine, ’ua ’ite ihora vau ē te tāreta i’oa, ’o te hō’ē ïa o tā’u mau i’oa, ’e ’ua ’ite au, nā roto i teie ’ohipa ē, ’ua fa’ari’i teie tuahine here i’ō mai i te pāruru i te ’ohipa tā’u i fa’anaho nā ni’a i tōna i’oa.

E ’ere i te mea ’ōhie ’ia tāpe’a i tō tātou pūpūra’a ia tātou iho nō te ’ohipa hiero ’e te ’ā’amu ’utuāfare. ’Ua tītauhia ia māua iho ’ia rave ’e ’ia turu te tahi i te tahi. ’Aita ’o Fe i ’ohipa a’enei i ni’a i te hō’ē mātini rorouira ’e ’aita ’oia i ’ite i te hō’ē noa a’e mea nō ni’a i te mau vāhi mā’imira’a rau, ’aita rā i maoro ’ua ha’amaita’ihia ’oia nō tōna fa’aro’o ’e tāna mau ’ohipa maitata’i. Tē tāmau noa nei ’oia i te fa’a’ohipa i tōna ’ite ’āpī nō te fa’ahaere i tōna mau rēni ’utuāfare hāmoa.

Te hō’ē mahana mā’a i te pū ’ā’amu ’utuāfare, ’ua ’umehia vau i te hō’ē ’āfata ’ume o te mau parau putu pōtiti, e ha’aputu ra te mau hōho’a na’ina’i o te mau ’api parau nō te orara’a o te ta’ata. ’Ua ’itea mai iā’u te hō’ē ha’apu’era’a nō te vāhi ra Kent, i Peretāne, ’o tei hape te fenua i te fa’anahora’ahia te reira. ’A fa’aho’i ai au i te reira i roto i te ’āfata ’ume ti’a, ’ua ite a’era vau ē nō te hō’ē ā vāhi rātou ’e tō’u fēti’i, nō reira, ’ua pārahi au i raro nō te tai’o i te tāreta tāta’itahi. ’Ua ’ite vave atu ra vau i te hō’ē ’utuāfare ’o nā metua ’e e ono tamari’i ’ua ti’a iā’u ’ia fa’atū’ati ’ei tuahine i te ’utuāfare o tō’u metua tāne fēti’i. Tae roa mai i teienei, ’aita mātou i ’ite ē tē vai ra rātou. ’Ua riro te reira ’ei hi’ora’a pāpū e nāhea te Vārua i te arata’i noa ia tātou i roto i teie ’ohipa mo’a.

’A feruri ai au i tō’u iho orara’a, ’ua parau mai tō’u metua vahine iā’u ē ’ua fa’aru’e tō’u metua tāne fānau iā’u nō te mea e tamāhine au ’e ’ua hina’aro ’oia i te hō’ē tamāroa. I te hō’ē mahana, ’a taua’i ai au i te ’ahu, ’ua puta mai te mana’o pūai ’ia fa’aoti i te ’ohipa hiero a tōna ’utuāfare, nō te tāmarū i tō’u ’ā’au nō ni’a iāna ’e nō te ’īriti ’ē i te teimaha o te mana’o pāto’ira’a e rave rahi ’ahuru matahiti. ’Ua ’ite ’oi’oi a’era vau i te metua tāne fēti’i ’o tō’u metua tāne fānau ’e e rave rahi hānere i’oa tei ti’a iā’u ’ia ’āfa’i i te hiero. I te pohera’a teie metua tāne fēti’i, ’ua hōro’a mai tāna tamāhine i te parau fa’ati’a iā’u nō te fa’aoti i tāna ’ohipa hiero ’e tae noa atu i tō tōna taea’e tei pohe, ma te ’oa’oa i te mea ē e tūru’a tōna nō te tu’u i tōna upo’o i ni’a i te ra’i. ’Ua fafau mai tō’u ha’amaita’ira’a pātereāreha i te manuia mai te mea e fa’aoti au i tō’u ’ā’amu ’utuāfare, ’e e nehenehe au e parau pāpū ē ’ua manuia rahi mātou i roto i teie ’ohipa mo’a.

« ’E i teienei, e au mau taea’e here e au mau tuahine here rahi, tē ha’apāpū atu nei au ia ’outou ē, e mau ha’api’ira’a tumu teie nō ni’a i te feiā i pohe ’e te feiā ato’a e ora nei ’o te ’ore e ti’a ’ia ha’apa’o-’ore-hia, nō ni’a i tō tātou fa’aorara’a. Nō te mea ē ’ua tītauhia tō rātou fa’aorara’a nō tō tātou ato’a fa’aorara’a, mai te au i tā Paulo i parau mai nō ni’a i te mau metua–e ’ore e noa’a te maita’i rahi roa ia rātou ’ia ’ore tātou nei, e ’ore ato’a tātou e maita’i roa ’ia ’ore tō tātou feiā i pohe ra » (Te Ha’api’ira’a Tumu ’e te mau Fafaura’a 128:15).

« Te feiā i pohe ’o tē tātarahapa e fa’aorahia ïa, nā roto i te ha’apa’ora’a i te mau ’ōro’a nō te fare o te Atua » (Te Ha’api’ira’a Tumu ’e te mau Fafaura’a 138:58).