E 30 minuti te maoro te ha’amaita’ira’a a te Fatu

I tō Jacinta Mauafu fa’aru’era’a i tāna piha ’ohipa i te maorora’a pō i muri a’e i te fa’aotira’a te hō’ē ’ohipa rū ’e te faufa’a, ’ua ho’i ’oi’oi ’oia i te fare nō te ha’apa’o i tāna tāne e ma’i rahi tōna, ’o Maeli Maika Mauafu. ’Ua a’o tāmau tōna paoti ’ohipa i taua taime ra ia Jacinta ’ia tu’u i te ’ohipa a te Fatu nā mua roa, ’e i muri iho e ha’amaita’ihia ’oia. ’Ua ti’aturi ’o Jacinta ē ’a rave noa ai ’oia i te ’ohipa a te Fatu, e maita’i mai tāna tāne. ’Ua hitimahuta roa rā ’oia i tō Maeli fa’aru’era’a mai hō’ē ’āfa hora noa i muri a’e i tōna tāpaera’a atu i te fare.

Ma te fifi roa i te fa’aau i teie ’ohipa i tupu i roto i tōna ’ā’au ’e tōna ferurira’a, ’ua parau ’o Jacinta nō ni’a i te māuiui rahi ’o tāna i fa’ari’i nō te mo’era’a ’o Maeli ’e, ’oia mau, mai te huru ē ’ua ha’avarehia ’oia inaha ’aita te Fatu i ha’amaita’i iāna, noa atu ē ’ua rave tāmau noa ’oia e rave rahi hora nō te fa’aoti i te ’ohipa ’īritira’a a te ’Ēkālesia i te hora ti’a. ’Aita rā ho’i, ’ua rave te Fatu i tāna tāne.

Nō tōna ’oto ’e tōna riri i mua i teie fa’ahope’ara’a mana’o—’ore-hia, ’ua fa’aoti Jacinta ’eiaha e ho’i fa’ahou i te ’ohipa—’ua pau rahi roa ho’i ’oia. I muri a’e i te hunara’a ’o Maeli, ’ua tāmau noa te mau ta’ata i te tāniuniu ia Jacinta nō te ’ite ’āfea ’oia e ho’i mai ai i te piha ’ohipa. ’Ua hina’aro-mau-hia ’e ’ua hina’aro-rū-hia te tauturu a Jacinta nō te hi’opo’a i te hō’ē buka ha’api’ira’a nō ni’a i te mau ha’api’ira’a a te peropheta Iosepha F. Semita. I te pae hope’a, ’ua parau ’o Jacinta ia rātou e’ita ’oia e ho’i mai e rave tāmau i te ohipa. Terā rā, nō te faufa’a o teie ’ohipa nō te fa’anahora’a ha’api’ira’a, ’ua fa’ari’i ’oia ’ia ho’i fa’ahou mai nō te fa’aoti noa i teie ’ohipa. ’A hi’opo’a ai i te pāpa’ira’a, ’ua tai’o Jacinta i te ’oto tā te peropheta i fa’ari’i. E ma’i rahi tō tāna vahine ’o Julina ’e, noa atu ē ’ua hina’aro te peresideni Semita e fa’aea noa i pīha’i iho i tōna ro’i nō te ha’apa’o iāna, ’ua onoono ’oia ’ia haere atu ’oia ’e ’ia rave i te ’ohipa a te Fatu. I muri noa mai, ’a hōro’a ai ’oia i te hō’ē a’ora’a i roto i te hō’ē purera’a a te ’Ēkālesia, ’ua tomo mai te hō’ē ta’ata i roto i te piha ’e ’ua hōro’a i te hō’ē parau fa’aarara’a i te peresideni Semita ē ’ua pohe tāna vahine.

’Ua tahe te roimata i ni’a i te pāpāri’a o Jacinta i tōna ’itera’a ē ’aita te Fatu i fa’aru’e iāna ! ’Ua hōro’a ’oia iāna e 30 minuti nō te fa’aea i pīha’i iho ia Maeli hou ’oia ’a pohe ai. ’Ua riro te reira ’ei ha’amaita’ira’a nōna ! ’Ua hōro’ahia iāna e 30 minuti. Noa atu te māuiui o te ’ohipa i tupu i ni’a iāna, ’ua ’oto ’o Jacinta nō te peresideni Semita tei ’ore i fa’ari’i i te hō’ē ā ha’amaita’ira’a e 30 minuti ’e tāna vahine.

I teie mahana, tē parau nei ’o Jacinta ma te ha’eha’a nō ni’a i tōna tā’amura’a ’e tō tātou Metua i te ao ra. Nōna, e au ē tei reira noa ’oia nōna, ’e nā roto i te hi’ora’a i muri, e nehenehe tāna e ’ite i te mau rāve’a e rave rahi tāna i pāturu ’e i ha’apūai iāna.

’Ua ho’i mai te tamāhine a Jacinta, ’o Blanche, i Hamoa ’e ’ua riro ’oia ’ei papa nōna—i haere ’oia i te ha’api’ira’a nā te ara. ’Ua vai noa te tamaiti a Jacinta, ’o JR, i roto i te ’āparaura’a tāmau ma te pūpū i te here ’e te turu, ’e ’ua hōro’a mai tāna mo’otua matahiapo i te here rahi roa a’e ’o tē ti’a iāna.

Tē fa’atumu pāpū nei ’o Jacinta i ni’a i te ’Evanelia a Iesu Mesia tei fa’aho’ihia mai ’e i ni’a i te vai-noa-ra’a ’ei pipi nā te Mesia. E metua vahine ’e e māmā rū’au here-roa-hia ’oia, ’e e mea au roa nāna e tāvini i te Fatu. Tē rave noa ra ’oia i te ’ohipa rave tāmau i roto i te tuha’a fa’atere nō te ’īritira’a a te ’Ēkālesia, ’e e peresideni Feiā ’Āpī Tamāhine, e ’orometua ha’api’i FAPO, e ’orometua ha’api’i nō te Institut nō te fa’aineinera’a nō te hiero ’e e tuahine rauti i te fa’arava’ira’a iāna iho. Nā roto i tōna pi’ira’a tāta’itahi, e ’imi itoito ’oia i te mau rāve’a nō te tāvini i te mau tuahine o tāna pāroita ’e e mea au nāna ’ia ha’api’i i te feiā ’āpī tamāhine nāhea i te tāvini ’a fa’ananea noa ai rātou i tō rātou ’aravihi feiā fa’atere. I te ’āva’e Fepuare ra, ’ua ha’aputuputu te Feiā ’Āpī Tamāhine i te mau taiha’a fa’anehenehe nō te ’ōpere nā te mau vahine ’ivi o te pāroita nō te mahana ’ōro’a nō te here (Saint-Valentin), ’āpitihia i te mau ’āu’a faraoa monamona na’ina’i hāmani-fare-hia ’o tā te mau tauturu i fa’aineine. ’Ua parau te hō’ē vahine ’ivi ē ’ua ha’amaita’ihia ’oia nō te mea ’ua ha’amana’ohia ’oia. ’Ua ’oa’oa te hō’ē vahine ’ivi tei tāpe’ahia i te fare nō te fa’a’oa’oara’ahia ’oia e te Feiā ’Āpī Tamāhine ’e ’ua ’oa’oa ’oia i tō rātou fārereira’a—’ua pohe rā ’oia e piti hepetoma i muri iho—’eiaha rā nā mua a’e i fa’ari’i-fa’ahou-ra’a i te here o te Fatu, nā roto mai i tōna mau tāvini.