Te here o tō tātou Fa’aora nā roto i te ’ā’amu ’utuāfare

’A fa’ahanahana ai tātou i te fānaura’a o tō tātou Fa’aora, ’o Iesu Mesia, e ha’amana’o tātou i te hōro’a tao’a rahi tāna i hōro’a mai ia tātou tāta’itahi nā roto i tāna Tāra’ehara, te hōro’a nō te ora mure ’ore ’e nō te fa’ateiteira’a.

’Ei « Fa’aora i ni’a i te Mou’a nō Ziona », e nehenehe tātou e hōro’a i teie tao’a hōro’a i tō tātou mau tupuna nā roto i te mau ’ōro’a o te hiero. E fa’ati’a te ’ā’amu ’utuāfare ’e te ’ohipa hiero ia tātou ’ia tauturu i te fa’aorara’a i te feiā tei pohe, ma te hōro’a ia rātou i te rāve’a nō te ’āmui atu i roto i te mana tāra’ehara o te Mesia.

’Ua ’ite ’o Maria Purcell, nō te pāroita nō Massey Park, i roto i te titi nō Papatoetoe (Auckland, Niutirani), i te ’oa’oa nō teie ’ohipa ’a tā’ati ai rātou tōna nā metua i tōna pāpā rū’au iti, ’o Afele Schwenke, i tōna ’utuāfare—e ha’amaita’ira’a tāna i ’ere i te roara’a o tōna orara’a noa atu tōna ha’apa’o maita’i ’e tāna tavinira’a i te ’Ēkālesia a Iesu Mesia i te Feiā Mo’a i te mau Mahana Hope’a nei.

’Ua a’a-hōhonu-hia ’o Afele Schwenke, ’o tei fānauhia i te 10 nō ’Ēperēra 1912, i roto i tōna fa’aro’o ’e ’ua pūpū iāna iho nō tōna ’utuāfare. ’Ua tāvini ’o Afele ’e tāna vahine ’o Soala i te mau misiōnare nō Malaela (Aleipata) fātata e piti ’ahuru matahiti i te maoro. ’Ua vai matara tō rāua fare i te mau misiōnare, ma te onoono ia rāua ’ia fa’aea i roto i tō rātou fare hāmanira’a papa’ā, ’a noho noa ai ’o Afele, Soala ’e tā rāua mau tamari’i i roto i tō rātou fare hāmoa. ’Ua vaiiho mai tōna ’ā’au hōro’a i te hō’ē ’ohipa ’o tē vai maoro mai ’e ’ua riro tōna fare ’ei vāhi nō te ha’api’ira’a i te ’evanelia.

Noa atu e ’itera’a pāpū pūai tō Afele ’e ’ua ’aufau ’oia ma te ha’apa’o maita’i i tāna tuha’a ’ahuru, ’ua fifi ’oia nō te ha’apa’o-maita’i-ra’a i te Parau Pa’ari. ’Aita tōna here nō te ’Ēkālesia i ’āueue noa a’e, ’ua pohe rā ’oia i te matahiti 1967 ma te ’ore e fa’ari’i i te mau ha’amaita’ira’a o te hiero.

Tau matahiti i muri mai, ’a hi’opo’a ai rātou i te mau parau tuatāpapara’a tupuna, ’ua ’ite a’era ’o Maria ’e tōna nā metua ē ’aita te tā’atira’a o tōna metua vahine i tōna nā metua i tāpa’ohia. ’Ua fa’ari’i ’oi’oi roa ’o Maria i te mana’o pūai pae vārua : ’eiaha noa ’ia ravehia te tā’atira’a o tōna metua vahine, o tō tōna ato’a rā pāpā rū’au ’o Afele. ’Ua puta mai tōna hōho’a mata i roto i tōna ferurira’a ’e ’ua ’ite ’oia ’ua tītauhia ’ia rave i te ’ohipa hiero.

Ma te ti’aturi i teie mana’o i tae mai, ’ua fa’anaho te ’utuāfare i te hō’ē fārereira’a nō te tā’atira’a. Terā rā, i tō rātou taera’a atu i te hiero, ’ua ’ite a’e ra ’o Maria ē ’aita rātou i ineine maita’i ē te mau ’api parau i tītauhia. ’Ua rave rātou i te tahi atu mau ’ōro’a, terā rā, i roto i te piha tā’atira’a, ’ua ’oto ’o Maria ’e tōna metua vahine i te mea ’aita rāua i rave i te ’ōro’a.

Nō tō rātou hina’aro pāpū e fa’aoti i te ’ohipa, ’ua fa’aau ’o Maria ’e tōna mau metua i te tahi atu hora fārereira’a. I te 6 nō ’Ēperēra 2024, ’ua ho’i fa’ahou rātou i te hiero ma te ineine maita’i. ’O Maria ’e tōna metua tāne nā ti’a nō tōna nā metua tupuna, ’ua ’ite rā ’oia ē tei reira rāua i te taera’a i’ō.

I te taime ’a pi’i ai te ta’ata tā’ati i te i’oa o tōna metua vahine, ’ua tae mai te hō’ē mana’o hau hōhonu i ni’a ia rātou. Tē ha’amana’o ra ’o Maria i te roimata i te tahera’a ’a fa’aoti ai rātou i te ’ōro’a.

Maoti te tāra’ehara a Iesu Mesia ’e te ’ohipa mo’a o te hiero, ’ua fa’ari’i Afele Schwenke ’e tāna vahine ’o Soala i te mau ha’amaita’ira’a nō te ora mure ’ore.

’Ei fa’aora i ni’a i te mou’a o Ziona, e nehenehe tātou e pūpū i tō tātou mau tupuna i te hō’ē ā hōro’a nō te fa’ateiteira’a tā te Mesia i pūpū mai ia tātou. ’A feruri ai ’oia i ni’a i te tā’atira’a o tōna nā metua tupuna, ’ua parau Maria : « Tē fa’a’ite pāpū nei au ē e hōpoi mai te ’oa’oa nō te ravera’a i te ’ā’amu ’utuāfare i te ’oa’oa mure ’ore. »

« ’Ua ’ite au ia rātou i te tahi atu pae o te pāruru nā roto i teie ’ohipa rahi ’e te māere. ’E ’ua ’ite au ē tē tauahi nei rāua i te tahi ’e te tahi ma te ’ana’anatae ’a fa’ari’i ai i teie mau ’ōro’a mo’a, mai tā’u e tauahi nei ma te ’oa’oa i teie pae o te pāruru i te tāhō’ēra’a i tō’u ’utuāfare mure ’ore. »

Nā te mana tā’ati i fa’aha’amana’o iāna e tae te mau ha’amaita’ira’a o te Tāra’ehara i’ō mai i te pāruru. Mai tā Te Ha’api’ira’a Tumu ’e te mau Fafaura’a 128:22 e a’o mai nei : « E ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? » I teie Noera, e fa’ahanahana na tātou i te fānaura’a o te Fa’aora, ’eiaha noa nā roto i te fa’ari’ira’a i tāna hōro’a nō te fa’aorara’a, nā roto ato’a rā i te pūpūra’a i te reira i te feiā tei pohe, nō te tauturu ia rātou ’ia fa’ari’i i te mau ha’amaita’ira’a mure ’ore o te ’evanelia. »