Na Lotu i Jisu Karisito Vakalesuimai

Na vulici ni Vunau kei na Veiyalayalati ena Lako Mai, Mo Muri Au ni yabaki oqo ena vakamatatataka na sala a vakalesuya mai kina na Turaga na Nona Lotu kei na kosipeli mai vei ira na parofita ni gauna oqo. E vuqa na itukutuku ena ilavelave ni vula oqo e vakamatatataka na veivakalougatataki ni Veivakalesui mai.

Vuli mai na iLavelave Oqo

Vakaitavi ena Veivakasokumuni.

Ena tabana e 2, e wasea kina o Peresitedi Russell M. Nelson na sala e rawa ni da sokumuna kina vua na iVakabula, sokumuna vata kei ira na Yalododonu, ka sokumuna vata ena veiqaravi vua na Kalou. Vakasamataka mo tuvanaka e dua na takete ena vula oqo mo cau kina ki na dua vei iratou na tolu na mataqali soqoni oqori.

Veiqaravi ena Lotu.

E tukuna o Elder Patrick Kearon ena Kuoramu ni iApositolo Le Tinikarua na madigi e tu vei keda ena Lotu vakalesui mai i Jisu Karisito me da “qaravi ira na tani ena loloma” (raica na tabana e 8). Era tiko beka eso na tamata ena nomu tabanalevu se tabana era sotava tiko na dredre? E rawa ni o masulaki ira na tamata oqo ka kerea na veivakauqeti ena sala mo qaravi ira kina.

Vuli mai na iVakaro ni Veivakalesui Mai

Ena 2020, eratou a vakarautaka kina na Mataveiliutaki Taumada kei na Kuoramu ni iApositolo Le Tinikarua “Na Vakalesui Mai ni Taucoko ni Kosipeli i Jisu Karisito: Ai Vakaro i Vuravura Raraba ni Ruanadrau na Yabaki” (raica na tabana e 40). Ni ko railesuva na ivakaro ni Veivakalesui mai, sa rawa mo vakasamataka na taro oqo: Na veika bibi cava e tukuna tiko, kei na sala cava a dusimaka kina na Turaga na veika a yaco oqori?

Lako Mai, Mo Muri Au Veimarautaki Vakamatavuvale

Vunau kei na Veiyalayalati 1:30

Ena tikina oqo, e vakamacalataka kina na Turaga na Nona Lotu me “lotu dina duadua ga ka bula e delai vuravura taucoko.” Na vakasama ni veivakavulici oqo ena rawa ni vukei ira na luvemu me ra kila na ibalebale ni “dina” kei na “bula”:

Ena Liaonani June 2024, a vosa kina o Elder J. Devn Cornish, e dua na Vitusagavulu ni Vakaitutu Raraba emeritus, “Na cava na kena ibalebale ni da kaya ni dina na Lotu?” E rawa ni o wasea vei ira na luvemu eso na tikina bibi ena ulutaga oya. Na veika vakayalo cava soti o sa sotava me vukei iko mo kila ni dina na Lotu—ni liutaki mai vei Jisu Karisito, ni sa tu kina na lewa ni matabete, ka ra liutaka na parofita, ni wasea na kosipeli i Jisu Karisito?
Ke rawa, mera vukei iko na luvemu ena nomu digitaka e dua na draunikau se tabana lailai mai na dua na vunikau se veikau voleka. Veivosakitaka na cava ena yaco kina ena gauna oqo ni sega ni semati ki na vunikau. Na cava ena mate kina na draunikau se tabanikau? Wilika na Joni 15:4, ka vakatauvatani Koya kina na iVakabula ki na dua na vaini kei ira na Nona ivakamumuri ki na veitabana. Na sala cava tale ena rawa me okati kina me lotu bula na Lotu i Jisu Karisito?