Nanuma na Vuna Au Bulataka Kina na Kosipeli

Mai vei Isabelle Justice

Mekasini ni Lotu

Niu vakananuma tiko na noqu “cava na vuna” e vakauqeti au meu toro voleka yani vua na iVakabula ka muria na noqu takete vakayalo.

E dau veilecayaki na noqu bula ena so na gauna, ia au taleitaka na vakacegu au vakila niu curu kina dua na valenilotu. Oqo e dua na vuna au taleitaka kina na lako i lotu!

Niu nanuma na veika au taleitaka me baleta na kosipeli—me vaka na vakilai ni Yalo Tabu, me kena ivakaraitaki—au sa vakauqeti vakalevu cake meu muria na noqu itovo vakayalo, me vaka na lako kina valetabu, wilika na noqu ivolanikalou, kei na masu vua na Tamada Vakalomalagi.

Baleta ni rawa ni osooso na bula, ena rawarawa sara meda guilecava na veika rawarawa oqo eda lomana. Ia niu dau vakananumi au wasoma ena vuna au bulataka ka lomana kina na kosipeli i Jisu Karisito ena vukei au meu vakavouya na noqu takete vakayalo ena kauti au vaka voleka Yani Vua kei na Tamada Vakalomalagi.

Tuvanaki ni iNakinaki Vou Vakayalo

Ena itekivu ni veiyabaki, au dau taleitaka meu dikeva tale na noqu takete vakayalo ena noqu vola na yalayala ni yabaki vou. Kevaka o sa vakasamataki iko tiko ka vakasamataka na sala o vinakata mo vakatorocaketaka kina na nomu veimaliwai kei Karisito ena yabaki vou oqo, tarogi iko mada ena taro oqo:

“Cava na Vuna Au Taleitaka Kina na kosipeli i Jisu Karisito?”

E vakamacalataka o Sisita Ann M. Dibb, na iKarua ni Daunivakasala e liu ena Mataveiliutaki Raraba ni Goneyalewa, ni “na tubu na noda lomana na kosipeli ni da sotava na loloma nei Tamada Mai Lomalagi kei na vakacegu e yalataka na iVakabula nida vakaraitaka Vua ni da sa tu vakarau me da talairawarawa ka muri Koya.”

Nio kila na vuna o lomana kina na kosipeli ena vukei iko mo vakila ka kila na loloma e tu vua na Tamada Vakalomalagi kei Jisu Karisito me baleti iko. Na vakasama oqo ena vukei iko talega mo vakila ni o sega ni vakadrukai nio sasagataka tiko mo tuvanaka ka rawata na nomu takete vakayalo.

Na noqu “cava na vuna” au bulataka ka lomana kina na kosipeli i Jisu Karisito e oka kina na kila ka ni rawa nira tiko vata na matavuvale me tawamudu kei na vakacegu au vakila ni oti e dua na masu malumalumu vua na Tamada Vakalomalagi.

Se cava ga na nomu “cava na vuna”, taura matua—ena solia vei iko na toso vakayalo o gadreva mo yaco mo dua na tisaipeli vinaka cake i Jisu Karisito.

Nomu Bulataka na Nomu “Cava na Vuna”

Niu sa kila na vuna au bulataka tiko kina na kosipeli, sa veisau na sala au a tuvanaka kina na noqu takete vakayalo. Au sa sega ni vakasamataka na ka au sega ni cakava rawa, au sa qai vakanamata vakalevu cake ena ka au rawa ni cakava. Au nanuma niu bulataka na kosipeli baleta niu lomana na noqu iVakabula.

E kaya o Elder Dieter F. Uchtdorf ena Kuoramu ni iApositolo Le Tinikarua: “E dodonu meda ciqoma ni ivakaro ni Kalou e sega walega ni dua na lisi balavu ni vakasama vinaka. Era ivakasala vakalou, ka yavutaki ena dina tawamudu ka soli me kauta mai na “vakacegu ena bula oqo ka rawata na bula tawamudu ena bula sa bera mai’ [Vunau kei na Veiyalayalati 59:23].”

Niu muria na noqu takete vakayalo e vakananuma vei au se o cei o au: e dua na luvedrau vakalou na itubutubu vakalomalagi. Na ivakavuvuli oqori e solia vei au na yaloqaqa meu sotava na noqu lomaocaoca kei na malumalumu ena vukui Jisu Karisito (raica na Ica 12:27).

E vakavuvulitaka o Peresitedi Russell M. Nelson: “e sega ni namaka na Turaga meda sa uasivi sara ena gauna oqo ena noda itosotoso kina bula tawamudu. Ia sa namaka tu o Koya meda na bula savasava cake tikoga.” Au sa tovolea tiko ena noqu vinaka taucoko ena veisiga meu volekati Jisu Karisito ka nanuma na vuna au digitaka kina meu muri Koya.