“Oqo na Nomu iSolisoli,” Liaona, Janueri 2025.
Domodra na Yalododonu Edaidai
Oqo na Nomu iSolisoli
“Tamada Vakalomalagi,” au masuta, “na isolisoli cava au rawa ni vakatorocaketaka ka na vakalougatataki ira na Luvemu?”
Ni se goneyalewa, a vakauqeti o Yanina me kila ni lagasere e dua na iloloma e rawa ni vakayagataka me vakalougatataki ira kina na tani. E muri, a digitaki me dua vei ira na lewe ni veimatanitu tani me lagasere vata kei na Matasere ni Tabernacle ena gauna ni koniferedi raraba (tabaki ena Salt Lake Tabernacle).
Ni sikovi Ecuador o Peresitedi Gordon B. Hinckley (1910–2008), ena 1999, au rogoci koya ni kaya, “Se cava ga o nanuma mo cakava, cakava ena kena vinaka duadua o rawata.”
Niu se gone, au vulica ni Kalou e solia vei keda na isolisoli ka rawa kina vei keda meda vakalougatataki ira na tani (raica na Moronai 10:8–18). Au masuta, “Tamaqu Vakalomalagi, na isolisoli cava au rawa ni vakatorocaketaka me na vakalougatataki ira na Luvemuni?”
Niu se qai yabaki 16, au sa tekivu vulica na lagasere ena nona veivakayaloqaqataki na dairekita ni koronivuli ni sere. “E totoka na domomu,” a kaya vei au.
Nira vakasausau na vakarorogo ni oti na imatai ni noqu vakatasuasua, a basika vakamatata mai kina noqu vakasama e dua na malanivosa: “Oqo na nomu isolisoli.” Au tagi baleta ni sa saumi mai na noqu masu. Ena noqu vanua, e rawa ni dredre meu rawata na noqu bula vakadauvakatagi. Ia au kila ni sa vakarautaka na Turaga e dua na sala. Au tomana tiko ga na noqu vulica na lagasere, meu saga meu vinaka duadua.
Niu se qai yabaki 19, a soli vei au e dua na sikolasivi meu laki vuli ki vanua tani. Ia, na madigi oqori kei na madigi tale eso vaqori a sega ni vakavotukanataki. Niu raica lesu, au raica ni vinakata na Turaga meu tiko ga e Ecuador.
Era kaya na tamata ni sega na noqu veisiga ni mataka ena ivakatagi baleta niu sega ni vuli mai vanua tani, sega na iyau, se me kilai na yacaqu. Ia au kila ni tiko na ituvatuva ni Kalou me baleti au, kau mani biuta kina na noqu taledi kina veiqaravi ena Lotu, au tauyavutaka kina na veimatasere, bulia na ivakatagi, ka tovolea meu vakauqeti ira na tani mera vakatorocaketaka na nodra isolisoli kei na taledi.
E muri, niu lai cakacaka ena dua na siteseni ni retioyaloyalo, au lomaleqataka na veitemaki e salavata kei na iyaya ni veivakamarautaki. Ia na isau ni noqu masu o ya, “Ciqoma na cakacaka ka vakaraitaka nio rawa ni dauvakatagi ka sega ni vakaleqa na nomu ivakatagedegede.”
Au cakacaka vaka-ivukevuke ni cakacakaliga ena retioyaloyalo, me ivukevuke ni dairekita ni matasere ni Symphonic Choir of Guayaquil, kei na matabose ni Vale ni iTovo ni Ecuadoran me baleta na yasana o Guayas.
Au vakadinadinataka ni rawa nida vakayacora na noda tatadra ka sega ni lako tani mai na noda ivakavuvuli. Nikua sa kilai na yacaqu ena noqu vanua kei na noqu cakacaka—au vakavinavinaka kina noqu yalodina meu bulataka na kosipeli ka vakatorocaketaka na isolisoli sa solia vei au na Tamada Vakalomalagi.
Nida talairawarawa kina lomai Tamada, ena rawa ni yaco na ka e sega ni rawa (raica na Maciu 19:26). Au kila ni lomani keda o Koya ka vinakata me vukei keda meda vakatorocaketaka na noda isolisoli meda vakalougatataki ira kina na tani.