“Sa Vakavotui Mai na Cakacaka ni Kalou,” Liaona, Janu. 2025.
iYaloyalo ni Vakabauta
Sa Vakavotui Mai na Cakacaka ni Kalou
Au sega ni kila kevaka au na vakabulai seu na mataboko tu ga. Au kila ga ni na vakayacori na loma ni Kalou ka na roqoti au o Koya ena noqu veivakatovolei.
Veitaba mai vei Christina Smith
Ena 7 Janueri, 2023, au yadra mai ni sa boko tu vakadua na mataqu imatau, ka rauta ga ni 10 na pasede na rai ena mataqu imawi. Sa kataboko vakasauri na vuravura me dravudravu tu—vakaidina. Sa yali na roka kei na rarama. Au mai tu yani ena butobuto, rere, kei na vakatitiqa.
Me vaka niu daudroini, na ka ga au vinakata meu cakava oya meu vakuria na totoka ni vuravura ena cakacaka ni liga—na gagadre a tu vei au voleka sara ni noqu bula taucoko. Na cava meu na cakava kevaka au sa sega tale ni raica rawa, vakaitavi, se vakavinavinakataka na totoka e vuravura?
Ena vica na siga yani ki liu, sa dau kidakida sara na mataqu kina rarama, ka tekivu me dau caudre mai ena noqu rai na meme ni rarama. Au lomaleqataka, au lai raica e dua na dauvakadidike. Ni dikevi au oti, a kaya ni vakavuna tiko na wakiki ni noqu qavokavoka na to ni wai mai na sui ni mona, ka vakatubura na veika e rawa ni tutubu kina na mona, ka dau vakaleqa talega na rai ni mata.
E tukuna vei au ni na lutu vakamalua na noqu rai ena vica na vula ka tarava ke sega ni qaravi. Ia, e vakadeitaka vei au ni levu na gauna meu kunea kina e dua na daunimona, e rawa ni walia na tubu ni wai.
Ena lomaleqa, au kerea na veivakalougatataki ni bula kei na vakacegu mai vei tamaqu, ka veiqaravi tiko vakabisopi. Ni rau vakalougatataki au kei na dua na nona daunivakasala, a basika mai noqu vakasama na noqu italanoa taleitaki ena iVolatabu:
“Eratou a tarogi koya na nona tisaipeli, “Vakavuvuli, ko cei sai valavala ca, a tamata oqo, se na tamana kei tinana, sa sucu mataboko kina ko koya?
“Sa kaya ko Jisu, Sa sega ni valavala ca ko koya oqo, se na tamana kei tinana: me vakatakilai ga kina na cakacaka ni Kalou ena vukuna” (Joni 9:2–3).
Au nanuma vakawasoma ena noqu vakasama, “Ena vakatakilai mai na kaukauwa ni Kalou ena ka oqo.” Au sega ni kila kevaka e kena ibalebale oqori niu na vakabulai se mataboko tikoga. Au kila ga ni na vakayacori na Nona lewa ka na roqoti au o Koya ena noqu veivakatovolei.
“E vica na iQaqalo ni Liga o Rawa ni Raica?”
A qai loku na noqu sota kei na dua na vuniwai ni mona ena vica na siga ki muri, ia ena mataka ni Janueri oya a vakauqeti na tuakaqu yalewa, o Kylie, me ratou kauti au na noqu matavuvale kina rumu ni leqa tubukoso ena dua na valenibula voleka. Era otataka vakatotolo na vuniwai e dua na veiqaravi vakompiuta me ilovi ka lautavi na sui me tarovi na drodro ni wai ki na mona. Ena siga ka tarava, a rua na noqu MRIs (na kena coqai na magnetic). A qai vakadikevi au e dua na vuniwai ni mata.
“E vica na iqaqalo ni liga o rawa ni raica?” a taroga, ka vakaduria cake e vica na iqaqalo ni ligana e mataqu. Au sega ni raica rawa e dua na ka.
Ni oti na nona vakadikeva, a vakadeitaka ni tiko vei au na ivakatakilakila ni pseudotumor cerebri kei na neuritis ni mata. E sega ni dua vei rau na mate oqori e vakavuna vakatabakidua. E vakamacalataka o koya ni sa rui bibi na kena sa boko na mataqu, sa rawa me taura e dua na yabaki na noqu bula cake mai kina ka rawa talega ni sega ni taucoko sara na kena vakabulai. E vakatura me dua na ivakarau levu ni intravenous steroids kei na wainimate tale eso.
Ni sa gole, au sa tekivu tagi. A vakadeitaka vei au o tinaqu, “Kevaka o sega ni rawa ni taura matua na nomu vakabauta ena gauna oqo, sa rawa mo vakararavi kina neitou.”
“Yalovinaka Vakacegui Au”
Ena ikatolu ni siga ni noqu tiko e valenibula, a kerea na noqu vuniwai me dua na MRV (na magnetic veisotari venography) ni noqu suitu kei na mona, me vaqarai e dua na tumo se tao. Ena 4:00 ena mataka ni oti e rua na siga na noqu yadra mataboko, au a tekivuna e lima na auwa ni MRV. Niu vakavakarau tiko, eratou sa navuca na noqu matavuvale me ratou masulaki au ka lolo ena mataka o ya. O tamaqu, ka dau moce e yasaqu ena dua na idabedabe ena veibogi ena noqu rumu ni valenibula, a solia tale vei au e dua na veivakalougatataki—na ikarua ni vica na veivakalougatataki au ciqoma.
Ni taroga e dua na daunitekinolaji ni valenibula kevaka au vinakata meu vakarorogo kina ivakatagi ena noqu qaravi tiko, au kerea na sere mai vua na noqu daulagasere taleitaki. A biuta e daligaqu na daunimisini na iyaya rapa ni rogo ka vakabira sobu na uluqu ena dua na ivesu ni mataqu me tauri au. Ni cakava tiko, a voleka sara ni dreta laivi mai daligaqu na iyaya ni rogo. Au sega ni rogoca rawa e dua na ivakatagi ni tekivu na MRV.
Na balavu ga ni gauna e taura na veiqaravi, na levu ni katakata au vakila ena loma ni misini ni veiilovi. Ni oti e dua na gauna balavu, a tukuni vei au niu sa vinaka tiko ka me toso tiko vakabalavu. Ia au vakila niu rere ka lomaleqataka na katakata, rorogo levu, kei na itatarovi e tauri au tiko vakadua.
Ena masu lo, au a kailavaka: “Tamaqu Vakalomalagi, yalovinaka vakacegui au. Au sa galili dina. Au gadreva na Nomuni veivuke.” Au gadreva na noqu matavuvale.
Vakasauri, e rogoci e daligaqu e dua na ivakatagi malumu ni piano. Mai na dua na noqu sere taleitaki—e dau vakatagitaka ena piano na taciqu gone, o Morgan. Au na sega ni namaka meu rogoca rawa mai na iyaya ni rogo galala ena rorogo ni misini. E vaka me tiko vata kei au o Morgan, kau sega ni tiko duadua. Sa takali yani na rorogo. Sa takali na katakata. Sa takali yani na curuoso.
Au vakila niu sa sega ni tiko ena yagoqu, me vaka ga niu a ciri voli ena dua na wasawasa. Au vakila niu vakavolivoliti tu ena loloma ni Kalou kei na loloma ni noqu matavuvale. Me vaka ga oya, au a yalomalua. Sa 7:30 ena mataka, na gauna era tekivu lolovaki au kina na noqu matavuvale. Na vo ni lima na auwa a takali yani ena dua na gauna lekaleka, kau qai rogoca, “O sa oti.”
Na loloma au vakila mai na ka au sotava oya e vakavuna meu tagi ka vakamamadataka na oca au vakila ena vo ni noqu tiko e valenibula. Au sega ni kila ke na lesu tale mai na rai ni mataqu, ia au kila ni sa tiko e kea na Kalou ka rogoca na noqu masu. Ni oti e va na siga noqu tiko e valenibula, au sa suka.
“Oqo na Cakacaka Mana!”
Ena veisiga yadua ena rua na macawa ka tarava, au dau lesu tale ki valenibula me baleta na wainimate, kau dau vakasaqara ena veisiga yadua na veisau ena rai ni mataqu—sa mamare mai na katabuto, na iyaloyalo wavokita na iqaqalo ni ligaqu e mataqu, e dua na kabukabu seninawanawa ena TV sa vuki me senikau. Na torocake lalai kecega e qaqa.
Ni oti e rua na macawa na noqu vagalalataki, a vakaraitaka e dua na vakatovotovo ni sa toso na vinaka ni noqu rai mai na saiva me voleka yani ni sa vinaka sara na mataqu ruarua.
“Bronwyn, na cava sa yaco?” a taroga na noqu vuniwai ni mata.
“Io, keitou sa masu tiko, kau sa ciqoma na veivakalougatataki,” au sauma lesu.
“Oqo e dua na cakamana!” a kaya. “Au se bera vakadua ni raica me yaco na ka oqo. E sega ni dodonu me volekata mada ga yani na kena macala oqo me yacova ni oti e ono na vula.”
E muri a qai tukuna vei au nio ira na tauvimate sa yacova na saiva na kaukauwa ni matadra e tu yadua sara me vinaka tale na nodra rai. Ena loma ga ni vica na macawa, au sa toso mai na dua na nona kisi ca duadua kina nona kisi vinaka duadua.
“Muria na Rarama i Karisito”
Ni sa cava na 2022, era a digitaka na iliuliu ni tabanalevu nei tamaqu e dua na itoko ni tabanalevu me baleta na 2023. A vakauqeti ena ivakavuvuli nei Peresitedi Russell M. Nelson, e kaya ena itekivu ni yabaki oya, “Vakasaqara ka namaka na cakamana.”
Ena gauna o ya, a nanuma o tamaqu ni itoko ena vukei ira na lewe ni tabanalevu era vosota tiko na gauna dredre. E sega ni kila o koya ni na yaco me yaga sara ga kina neitou matavuvale.
“Muria na rarama i Karisito,” e kaya na itoko. “Namaka na cakamana! Namaka na reki!”
Ni oti e rua na yabaki, sa vinaka cake na noqu rai ena gauna oqo mai na kena e liu ni bera ni yali. Au vakavinavinaka vua na Tamada Vakalomalagi ena veisiga ena vuku ni noqu cakamana kei na vakabauta sega ni yavalati rawa ni noqu matavuvale. Ena veivakatovolei oqo, a vakavotui koya kina na cakacaka ni Kalou. Sa tubu cake e dua na ivakadinadina kaukauwa cake, na vakavinavinaka titobu me baleta na bula, kei na dua na loloma cecere cake Vua kei na matavuvale kei na itokani.
Nikua, au sa cakava tiko na veika kece au rawata, oka kina niu daudroini, meu vakayagataka vakavinaka kina na veivakalougatataki, isolisoli, kei na reki sa solia vei au na Kalou—meu vakalagilagi Koya ka vakalougatataki ira na tani.
Nikua, e vakayagataka o Bronwyn na nona droini, me vakataka na ivakaraitaki ni iVakabula oqo, me vakalagilagia kina na Kalou ka vakalougatataki ira na tani.