Eda Gadrevi Kece ena Yago i Karisito

Mai vei Sister J. Anette Dennis

Matai ni Daunivakasala ena Mataveiliutaki Raraba ni Soqosoqo ni Veivukei

E rawa nida veivuke ena kena tarai cake e dua na veitacini e vuravura raraba ka bulabula vinaka cake, dei, ka semati vakalevu cake ena vuku ni noda veiwekani ni veiyalayalati kei na Kalou.

Eda vinakatakece meda vakila ni tiko na noda tikina ka da sa lewena ka gadrevi ena Lotu vakalesui mai i Jisu Karisito. E rawa nida vukei ira yadua na tacida kei na ganeda, se cava ga na yabaki se ituvaki ni bula, me vakila ni tiko na nodra vanua ka ra lewena ka gadrevi talega vakakina. Eda luvena kece na itubutubu vakalomalagi ka da veitacini vakayalo kina. E bibi sara na veimaliwai oqori.

Ni da curu kina dua na isema ni veiyalayalati kei na Kalou, ena sega walega ni vakatitobutaka ka vakavinakataka cake na noda veimaliwai kei Koya ia ena tara talega na noda veimaliwai kei ira na Luvena tale eso—o ira na tacida vakayalo. E tiko ena veiyalayalati eda cakava vata kei na Kalou, tekivu ena papitaiso, na noda itavi meda veilomani ka veivukei.

Na Leqa ni Galili

A wasea na itukutuku oqo na vuniwai raraba ni vuniwai e Amerika, na iliuliu ni qasenivuli ni bula e Amerika, me baleta na bibi ni veimaliwai: “Sa dua na leqa ni bula raraba ka sa vakaleqai tu mai na bula ni tamata yadua kei na veimaliwai ni noda galili kei na tiko tani. Na keda isema ni veiwekani sa ivurevure ni veivakabulai kei na tiko vinaka ka vunitaki sara tu ga e matanalevu. … Nida raica na revurevu ca bibi ni galili kei na tu duadua, sa dodonu meda vakaliuca na tarai cake ni isema veiwekani ni bula veimaliwai ena sala vata ga eda vakaliuca kina eso tale na leqa bibi ni tiko bulabula raraba. … Eda na tara vata e dua na [itikotiko] e bulabula cake, kaukauwa cake, sega soti ni galili, ka semati vakalevu cake.“

E rawa nida veivuke vata ena kena tarai cake e dua na veitacini marama e vuravura raraba ena veitabayabaki kecega ka bulabula vinaka cake, tudei, sega soti ni galili, ka semati vakalevu cake ena vuku ni noda veimaliwai ni veiyalayalati kei na Kalou kei na noda itavi vakai keda vakatisaipeli i Jisu Karisito.

E vakavuvulitaka na noda iVakabula, “A ka oqo era na kila kina na tamata kecega ni dou sa noqu tisaipeli, kevaka dou sa veilomani” (Joni 13:35).

Noda Veisemati Vakai Keda

E rawa nida vukea na kena vakaberaberataki na mate ni galili ena noda tauyavutaka na vanua ni veikidavaki kei na veitaqomaki ena loma ni noda ivavakoso vakauasivi ena loma ni noda iSoqosoqo ni Veivukei, ka rawa nira vakila kece na loloma ni Turaga baleta ni ra sa vakavolivoliti tu ena noda loloma.

Na veika eda sotava ena lotu sa kena inaki me vakarautaki kina na isema bibi oqori vua na Turaga kei keda vakai keda ka sa gadrevi vakalevu sara kina noda tiko vinaka vakayago, vakasama, ka vakayalo. E tiko na kaukauwa levu ena duavata kei na totoka ni duidui; era sa gadrevi kece ena yago i Karisito (raica na 1 Korinica 12:12–27). Me vaka ga na vunikau lelevu damudamu era veiwakitaka na wakadra ka rawa ni vorata na kaukauwa ni veika bula baleta nira tu vata, e dodonu meda veitauri liga, tu vata, ka veivaqaqacotaki vakai keda ena cava ni bula.

Nida sa mai kilai ira eda nanuma ni ra duidui mai vei keda, eda kila ni levu cake na ka eda tautauvata kina mai na ka eda nanuma. Na tamata yadua e levu sara na ka me cau kina, e vuqa sara na veika totoka ka duidui ni bula ka rawa ni vakalougatataka na noda bula. Na vakarorogo kina nodra italanoa eso tale ka vakasaqara meda kila vakavinaka ena veisautaka na yaloda, kei na lelewa kei na rere a tu beka ena vukudra eso ena rawa ni vakaisosomitaki ena yalo ni vakavinavinaka ni ra tu ena noda bula.

E rawa ni vukei keda na Turaga meda raici ira na tamata tale eso me vaka e raici ira, ka rawa Vua me vakasinaita na yaloda ena loloma, ka rawa kina vei keda me da laveta, vakacegu, dredre vata, tagi vata, ka susuga na duavata kei ira era tu wavoliti keda. Ena vukei keda o Koya meda kila na veika e gadrevi kei na sala me da veivakalougatataki kina vei ira na tani ena nodra ilakolako.

E dina sara, e Dua ga e rawa ni kila vakavinaka ka qai kauwai vakavinaka sara. Me tiki ni Nona isoro ni veivakaduavatataki, a sotava kina o Koya na “mosi kei na veivakararawataki kei na veitemaki ena kena veimataqali kecega; … [taura] vua na nodra rarawa kei na nodra tauvimate na nona tamata” (Alama 7:11) me rawa ni da vakadeitaka ni da na sega ni tiko duadua vakaidina.

Eda sa kacivi yadua meda lomani ira ka qaravi ira na luvena na Tamada Vakalomalagi me vaka ena cakava na iVakabula. Eda sa veitokani vata kei Koya ena noda vakalougatataki ira na tani me rawa ni da vakila vakavinaka cake kina na loloma ni noda iVakabula. Meda veitauri liga ka taubale vata yani ena marau ki vale. Au vakadinadinataka ni oqo e dua na cakacaka tabu eda sa kacivi kece meda cakava.