Taroga na Taro, Kunei ni iSaunitaro: Na iVakarau a Tuvanaka o Josefa Simici

A vakasaqara tiko o Josefa na veivosoti ena nona ivalavala ca kei na isau ni nona taro. E vinakata me kila se lotu cava me lewena. E duidui na lotu a lako kina qai gole ki na iVolatabu me saumi mai kina. Jemesa 1:5 e vakauqeti koya me kerea vua na Kalou, na ivurevure ni dina kecega. (Raica na Josefa Simici—Ai Tukutuku 1:10–13.)

Ni vakarau masu o Josefa, a raica e dua na vanua e vakanomodi ka vakadigagalu. Dina ga ni a sotava na veisaqasaqa ena itekivu ni nona masu, a vakayagataka o Josefa “na kaukauwa taucoko me masuta na Kalou me vakabulai [koya]” (Josefa Simici—Ai Tukutuku 1:16) ka ciqoma e dua na isau ni nona taro (raica na tikina e 18–19).

Mai na veika a sotava o Josefa, e levu sara na ka eda rawa ni vulica me baleta na vakabauta, masu, kei na ciqomi ni isaunitaro. Sa ka bibi me kilai ni gauna a ciqoma kina o Josefa na isau ni nona taro taumada ena nona raivotu me baleta na Tamana kei na Luvena, a tomana tikoga ena nona bula taucoko na nona vakasaqara na isau ni taro mai vua na Kalou ena masu. A yaco mai na isaunitaro oqo ena vuqa na yabaki ena nona vakasaqara tikoga, talairawarawa, ka vakabauta ni na sauma vua na Kalou.

E vakavuvulitaka o Peresitedi Russell M Nelson, “Na Parofita o Josefa Simici e sa laiva na ituvatuva me da muria me saumi kina noda taro.

• Gole ki na ivolanikalou kei na ivurevure nuitaki tale eso.

• Vakasaqara ena yalodina ka tadola tu.

• Mo tu vakarau ka cakacakataka na isau ni taro o ciqoma.

• Kila ni isau ni taro e yaco mai ena gauna ni Turaga.

Na iMatai ni Raivotu e vakatakilakilataka na itekivu ni Vakalesui mai ni kosipeli i Jisu Karisito ka tomani tiko me yacova mai nikua. Ena siga ni vulaitubutubu oya ena 1820, a veivosaki kei Josefa na Kalou, sauma na Nona masu, ka solia na veidusimaki ka vakavuna na kena tauyavutaki tale na Lotu i Jisu Karisito e vuravura.

Kevaka eda vakabauta ni a vosa vei Josefa na Turaga, eda na rawa ni vakabauta ni vosa vei keda o Koya. Kevaka eda nuitaka ni a tauyavutaka tale na Nona Lotu mai vua na Parofita o Josefa, sa rawa meda nuitaka ni sa tomana tikoga o Koya na nona tuberi keda mai vua na noda parofita ena gauna oqo, o Peresitedi Russell M. Nelson.

Me vakataki Josefa Simici, era ciqoma na parofita bula na ivakatakila me dusimaka na Lotu. E kaya o Peresitedi Russell M. Nelson, “kevaka me vakatavulici keda na ka uasivi e a sotava o Josefa Simici ena Veikau Tabu, sa ikoya ni sa tadola tu ko lomalagi ka sa vosa tiko vei ira na luvena na Kalou.”

Ni dua na ivakadinadina ni iMatai ni Raivotu, sa vaqaqacotaki kina na noda vakabauta na Turaga, Na Nona Lotu, kei na tomani tiko ni ivakatakila e solia o Koya vei ira na noda parofita kei na iapositolo nikua.

E dina ni na duidui na sala era muria na tamata yadua mera saumaki mai kina, ia ena yaco me ra gadreva na tamata kecega na veivakadeitaki ni Yalo Tabu me rawa nira rawata kina e dua na ivakadinadina ni iMatai ni Raivotu kei na dina tale eso ni kosipeli.

E vakavulica o Peresitedi Jeffrey R. Holland, na Peresitedi Vakatawa ni Kuoramu ni iApositolo Le Tinikarua, “Vakadinadinataka vakaidina na nomu taro kei na nomu kauwai, ia taumada ka tawamudu mo irivaka na yameyame ni nomu vakabauta, baleta ni sa rawa na ka kecega vei ira era vakabauta.”

Na masu sa idola ni kena dolavi na katuba ni ivakatakila yadua me baleta na iMatai ni Raivotu—kei na taro kece tale eso. Kerea vua na Kalou. Tarogi Koya kevaka a raica dina o Josefa na Tamana kei na Luvena. Vakasaqara na Yalo, vakararavi vua na Turaga, ka tovolea tikoga. E rawa ni o lako mai mo kaya me vakataki Josefa: “Au [kila], kau [kila] ni sa [kila] na Kalou, kau [sega ni rawa] ni cakitaka” (Josefa Simici—Ai Tukutuku 1:25).