“E Sega ni Rawa ni Voli na Marau ena iLavo, ia na Karisito e Solia Wale ena Galala,” Liaona, Janu. 2025.
iTabagone Qase Cake
Sega ni Rawa ni Voli na Marau ena iLavo, ia na Karisito e Solia Wale na Reki ena Galala
Niu dau vakaliuca na ilavo, au qai kila niu sa digitaka tiko na veika ni vuravura mai vua na Tamada Vakalomalagi.
iTaba ni dauvolaivola mai vei Stephen Neilsen
Niu tubu cake tiko, e levu sara na noqu tatadra. Au raici ira na tamata keimami yabaki vata ni ra rawata na ilavo ka rawa-ka ena sala ni vakauitukutuku raraba. Au vinakata meu vakataki ira.
Niu tiko ena univesiti ka vuli meu rawa ni bula vakataki au, sa yaco meu vakaliuca na ilavo. Na ka ga au dau kauwaitaka oya na noqu rawata na sikolasivi, maroroi ilavo, kei na vakavakarau kina noqu cakacaka ena veisiga ni mataka me vakatautauvatataki.
Na noqu itukutuku ena sala ni vakauitukutuku raraba era sinai sara mada ga ena itukutuku ni rawa ka, vakavureilavo, kei na veivoli e taudaku meu rawata eso tale na ilavo. Au leqataka ni kevaka meu na sega ni taura na madigi kece meu maqosataka na noqu ilavo, au na sega ni taqomaki vinaka vakailavo.
Au ciqoma na itovo tudei oqo, au nanuma ni na vakamarautaki au ka meu gugumatua. Au dau vakadonuya na noqu vakanamata kina ilavo ena noqu tukuna vei au ni dua na siga, ni sa levu na noqu ilavo, au rawa ni solia e levu cake kina veisoqosoqo ni yalololoma ka yaco me dua na tamata vinaka cake ena sala o ya.
Au sega ni raica rawa ena gauna o ya, ia niu sa vakaliuca na ilavo, sa tekivu me yali na reki ena noqu bula. Sa qai levu cake na noqu vuvu, vakabibi o ira era sa sivia na nodra ilavo.
Au sa tekivu vinakata meu rawaka vakalevu ena itukutuku raraba, ena noqu cakacaka, kei na nodra kilai au na tamata. Ia e vaka me levu ga ni noqu ciciva na rawaka, na lailai ni noqu gugumatua au vakila—kau sa yawa vakalevu cake mai vua na Tamada Vakalomalagi.
Kilai ni Vakabauta na iYau
Ni oti e dua na yabaki ni yalo vakaoqo, au a vakarorogo tiko kina dua na vosa nei Peresitedi Dallin H. Oaks, na iMatai ni Daunivakasala ena Mataveiliutaki Taumada. Au vakila ni sa lutudromu na yaloqu niu rogoci koya ni vakamacalataka sara tiko ga na mataqali tamata vakacava au sa vuki tiko me vaka:
“Ena gauna mada ga oqo eso era tukuna nira lotu-Vakarisito era sa rawai vakalevu ena veika ni vuravura—na veika e tokona na bula ena vuravura oqo ia e sega ni solia na kakana kina bula tawamudu.”
Au nanuma ni rawa niu vakaliuca ruarua na Kalou kei na ilavo ena dua vata ga na gauna, ia na vosa nei Peresitedi Oaks kei na rai oqo ena Maciu 6:24 e vakadinadinataka na dina: “Sa sega ni dua na tamata sa qarava rawa e rua na turaga: ni na cata e dua, ka lomana na kena ikarua; kevaka e sega ena taura matua e dua, ka beca na kena ikarua. Dou sa sega ni qarava rawa na Kalou kei na iyau.”
Ni vakanamata na noqu vakasama kina veika vakayago, au raica ni dredre meu raica na vinaka ni kosipeli. Au sega ni kila na sala e rawa ni vukei au kina ena noqu sasaga na lako i lotu kei na wilika na ivolanikalou.
Niu tosoya tiko na vuli kei na rawati ni ilavo e tudei sa sasaga kilikili, sa rui sivia na noqu vakabibitaka. Au vakasamataka vakasivia. Au qai kila niu na rarawa me yacova niu sa vulica meu veisautaka na noqu vakasama.
Vakanamata kina Veika e Bibi Duadua
Au masu vua na Tamada Vakalomalagi ka kerea Vua kevaka e rawa ni vukei au o Koya meu tekivu vakanamata kina veika e bibi duadua. Au tekivu ena noqu wilika na ivolanikalou. Niu vulica tiko na veitikina au nanuma niu sa wilika oti vakavicasagavulu, sa tekivu me toboka na noqu vakasama na italanoa kilai levu oqo. Au vakila ni sa veitaratara tiko kei au na Yalo Tabu!
E dua na italanoa au rogoca tiko oya na cauravou vutuniyau. A kaya o Jisu, “Kevaka ko sa vinakata mo vinaka sara, mo lako, mo volitaka na nomu iyau. Ka solia vei ira na dravudravua, ko na qai vakaiyau mai lomalagi: ia mo lako mai mo muri au.”(Maciu 19:21).
Niu wilika na italanoa ni ivolanikalou oqo, au vakila ni vakauqeti meu cegu ka vakasamataka na kena yaga vei au. Taumada, e sega ni vaka me dua na ka au tautauvata kina kei na iliuliu gone vutuniyau—sa tu oti vua na nona iyau ka sega ni tu vakarau me wasea. Ena yasana kadua, au se bera ni vutuniyau, kau nanuma ni noqu sasaga meu rawata e levu cake na ilavo e ivalavala dodonu.
Ia au qai kila niu na dredre meu solia na noqu ilavo, me vaka ga na iliuliu gone vutuniyau. Vakabibi niu vakasamataka niu sa sasagataka tiko meu biuta laivi na noqu sasaga me levu cake na ilavo.
Au vinakata meu vakaliuca tale na Tamada Vakalomalagi ena noqu bula. Au sa mani nanuma meu dolava na noqu ivolaniveisiga, vola na veika au vakila tiko, ka raica lesu na veika au sa vola oti meu kila vakavinaka cake kina na ka e tekivutaka na noqu gagadre.
Niu cakava oqo, au sa qai kila vinaka na kena sa suka sara ga i muri na veika au vakaliuca. Me vaka au raica ena dua na itukutuku au vakacuruma, “Au dau vakasamataka tikoga na sala meu na tubu kina mai na veika kecega ka sega ni vakasamataka na sala meu na vinaka cake kina se vukei ira na tani.”
Sa qai yaco, ena noqu vulica na ivolanikalou, vakarorogo kina Yalotabu, ka vakalewena noqu ivolaniveisiga, au sa tekivu veisau.
Vakanuinui Vua na Kalou ka sega ena iLavo
Sa ka veivakurabuitaki dina na noqu vakila na dina ni yalayala ena Vosa Vakaibalebale 3:5–6 ena noqu bula:
“Mo vakararavi vei Jiova ena vu ni yalomu; ka mo kua ni vakararavi kina nomu yalomatua.
“Mo vakarogotaka vua na nomu sala kecega, Ia ena vakadodonutaka na nomu ilakolako ko koya.”
Au se saga tikoga meu vakatorocaketaka na noqu taledi ka cakacaka vakaukauwa ena noqu vuli kei na cakacaka ni liga. Na vakasaqarai ni veitaqomaki vakailavo meda vakarautaka kina na veika me baleti keda kei na noda matavuvale sa gagadre dodonu. Ia, e dodonu meda qarauna me kua ni bibi cake na noda vakasaqara na rawaka kei na ilavo mai na veika tale eso.
Ena gauna oqo, au sega ni kauwaitaka se rogolevu beka se rawa ilavo ena maqosa ni ligaqu. Au sa qai kila ni bulataka e dua na bula ni loloma—ka vakila na loloma mai vei—Tamada Vakalomalagi kei Jisu Karisito, noqu matavuvale, kei na cakacaka ni liga sa rauti au. Au sa sega tale ni rawarawa ena vakayagataki ilavo sega ni namaki se na nodra rawaka eso tale na tamata. Ia, au sa yalodina vakalevu cake kina kosipeli i Jisu Karisito baleta ni tomana tikoga na kena vakabulai au mai na bula ni kocokoco, vakatauvatani, kei na yalolailai. Niu tekivu guilecava, era dau vakananuma tu ga vei au na ivolanikalou kei na parofita na veika e bibi duadua ena bula oqo.
A vakatavulica o Peresitedi Russell M. Nelson:
“Ni vakatututaka ko vuravura ni kaukauwa, iyau, na irogorogo kei na gagadre ni itovo vakayago ena kauta mai na marau, e sega sara! Era sega ni rawa!
“Na ka dina sai koya ni sa ka ni oca cake na vaqara na marau ena vanua o na sega vakadua ni kunea kina! Ia ke o vauci iko vei Jisu Karisito ka cakava na cakacaka vakayalo e gadrevi me vakamalumalumutaki kina na vuravura, o Koya duadua ga e tiko vua na kaukauwa me laveti iko tani mai na idre ni vuravura oqo.”
Vakadrukai Vuravura
Na veisau sa vukei au kina na iVakabula meu cakava e yaloqu sa mana sara. Au sa kila oqo ni rawaka e sega ni baleta na noqu vakadinadinataka na veika au rawa ni cakava se na levu ni ilavo au rawata; e baleta na noqu vakavinavinakataka na madigi meu mai bula eke ka raica na veivakalougatataki veivakurabuitaki sa dau vakarautaka tu ga vei au na Tamada Vakalomalagi. Au kila kevaka au vakaliuci Koya, ena yaco na veika kece tale eso.
Au vakayaloqaqataki kemuni moni vakasamataka na veika oni vakaliuca ena bula oqo. O sa vakanamata tiko beka kina veika vakayago kei na veika e sega ni tu vei iko? Se o vakanamata ena veika e bibi duadua? Mo dina kina. Raica kevaka o gadreva mo veisautaka na nomu sala lesu vua na iVakabula.
Nio digitaka oya, o na kunea e levu cake na reki mai na kena o nanuma ni rawa.