Vakavinavinakataka na Vakasokomuni

Keimami domovata kei ira na Wekaqu ena Mataveiliutaki Taumada kei na Kuoramu ni Apositolo Le Tinikarua, ka kacivaka kina: “Na Lotu oqo e sa vakaiyaqataki tu ena bula uasivi sara ni kena vatu ni tutu levu, o Jisu Karisito, kei na Nona Veisorovaki tawayalani kei na Tucaketale dina. Sa sureti keda kece meda lako mai Vua kei na Nona Lotu, ka ciqoma na Yalo Tabu, na cakacaka vakalotu ni veivakabulai, ka rawata na reki tawamudu.”

Baleta ni sa toso tiko ki liu na Veivakalesui mai ena tomani tiko ni ivakatakila , “ena sega tale ni tautauvata ko vuravura, me vaka ena ‘soqona vata na Kalou na ka kecega vei Karisito’ (Efeso 1:10).”

“Na ka kecega” e oka kina na Nona sipi. Sa kacivi keda tiko na iVakabula meda biuta tu mai na caka ca ni vuravura ka soqoni vata yani Vua. E vinakata o Koya na Nona sipi me dua na rarama serau, ka tura e dua na ivakarau ki vuravura taucoko ena kena vakacilavi yani na nodra ivakarau ni bula na tisaipeli dina, oka kina na sala era sotava kina na reki dina ni vakanamata na nodra bula vua na iVakabula.

Eda soqoni vata vua na iVakabula nida lako mai Vua (raica na Maciu 11:28) ena noda cakacakataka na vakabauta kina veivutuni, ciqomi ni papitaiso kina Nona Lotu, kei na ciqomi ni isolisoli ni Yalo Tabu.

Eda soqoni vata vua na iVakabula nida sotava na veivakabulai vakayalo e yaco mai nida vakaivotavota ena sakaramede, vakadinadinataka nida sa tu vakarau meda taura na Yacana, dau nanumi Koya tikoga, ka muria na Nona ivakaro (raica na Vunau kei na Veiyalayalati 20:77, 79).

Eda soqoni vata vua na iVakabula ni da vakasinaita na noda bula ena veisiga ena Nona vosa kei na dina, oka kina na nodra ivakavuvuli na Nona parofita, daurairai, kei na dauvakatakila.

Eda soqoni vata vua na iVakabula ni da sa vakasavasavataki keda me rawa ni da rogoci Koya, ka bula kilikili kaya na vakasolokakana ni Yalo Tabu.

Eda soqoni vata vua na iVakabula nida vaqaqacotaka na noda saumaki mai, vakalevutaka na noda vakabauta, vakatitobutaka na noda bula vakatisaipeli, vakatotomuria na Nona ivakaraitaki, ka segata meda vinaka cake vakalailai ena veisiga yadua.

Eda soqoni vata vua na iVakabula nida cakava na veiyalayalati tabu ka ciqoma na cakacaka vakalotu tabu ena valetabu.

Eda soqoni vata yani vua na iVakabula nida vakamalumalumutaki keda ena vosota kei na yaloqaqa “kina veika kecega sa raica na Turaga ni ganiti [keda]” (Mosaia 3:19).

Kena itinitini, eda na soqoni vata vua na iVakabula ni da veivakavulici ka vakadinadinataki Koya, sureti ira na noda matavuvale, itokani, kei ira na wekada mera soqoni vata kei keda kina “rarama, na bula, kei na inuinui kei vuravura.”

Nida lako vata mai ka duavata nida lewe ni Lotu i Jisu Karisito ni Yalododonu Edaidai, eda na curu kina veimaliwai kei na veitokani vakai keda. Eda veitokoni, veivakavulici, ka veivakatataki cake vakai keda. Eda sasagataka, ena vosa ni iVakabula, meda “duavata” (Joni 17:21; raica talega na Vunau kei na Veiyalayalati 38:27) ka “veilomani” (Joni 13:34).

E vakavulica vei keda o Peresitedi Dallin H. Oaks, na iMatai ni Daunivakasala ena Mataveiliutaki Taumada, “na lako i Lotu e vaqaqacotaki keda ka vakavinakataka na vakabauta ena noda veimaliwai kei ira na tamata vakabauta tale eso kei na sokalou vata kei ira era segata tale tikoga mera tudei ena salatu ni veiyalayalati ka mera tisaipeli vinaka cake i Karisito.”

Eda dau kunea ena Lotu na vakacegu vakayalo kei na veivakavoui. Eda kunea na cakacaka vakalotu kei na lewa ni matabete me qaravi ira. Eda kunea na dina vakalesui mai, ivunau savasava, kei na ivakatakila yadua. Eda na kunea na liga ni veikidavaki, veivakacegui, kei na domo ni veivakayaloqaqataki. Eda na kunea na madigi meda bulataka kina na ivakaro cecere e rua (raica na Marika 12:30–31).

Sa vakasalataki keda na Turaga ni “sa cokovata na meca” (Vunau kei na Veiyalayalati 38:12). Me taqomaki na noda matavuvale ka vakamalumalumutaki na veivakayarayarataki nei Setani, sa yaco me yaga vakalevu cake sara na noda sokalou vata ni da Yalododonu.

“Na duavata,” e vakavulica na Parofita o Josefa Simici, “sa i koya na kaukauwa.”

E kaya talega na Parofita o Josefa, “Sa roro totolo mai na siga ena vakayacori kina na vakalesui mai ni veika kecega, era parofisaitaka kece na parofita tabu, me yacova na nodra vakasoqoni vata na mataqali i Isireli.” E dua vei ira era a parofisai vakaoqo o Jeremaia ena Veiyalayalati Makawa:

“Ia sa kaya vakaoqo ko Jiova, raica ena yaco na gauna, ena sega ni kainaki tale kina, sa bula ko Jiova, ko koya ka kauti ira cake na Isireli mai na vanua ko Ijipita;

“Ia, sa bula na Turaga, o koya sa kauti ira cake mai na Isireli mai na vanua ena vualiku, kei na veivanua kecega sa vakasavi ira kina” (Jeremaia 16:14–15).

A tomana na Parofita o Josefa, “Oi keda na tamata taleitaki sa digitaka na Kalou meda vakayacora na lagilagi ni iOtioti ni Gauna Oqo nira na vakasoqoni vata na Yalododonu ni Kalou mera duabau ga mai na veimatanitu, veimataqali, kei ira na tamata, kei na duivosavosa.”

Me rawati na cakacaka oqori, “Au na talai ira yani na gonedau e vuqa, sa kaya na Turaga, ka ra na qolivi ira; ia au na talai ira yani e vuqa na dauvakasasa, era na vakasasataki ira mai na veiulunivanua kecega, kei na veidelana kecega, kei na qara ni vatu” (Jeremaia 16:16).

Kemuni na taciqu kei na ganequ, nida Isireli ni veiyalayalati ni gauna oqo—lewe ni Lotu vakalesui mai i Jisu Karisito—oi keda na dauqoli ka dauvakasasa ni Turaga. Eda sa kacivi meda vakasoqoni ira vata na digitaki ni Turaga mai na veiulunivanua, delana, kei na veitauni. Eda sa kacivi meda solia vei ira na luve ni Kalou na madigi mera yaco me itaukei taucoko ni veika kece sa yalataka o Koya vei ira na Luvena yalodina Oqori na veiqaravi cecere duadua eda rawa ni cakava.

Eda vakayacora na idusidusi vakalou oya ena noda vakasoqoni Isireli vata ena yasa ruarua ni ilati—wasea na itukutuku vinaka ni Veivakalesui mai vei ira tale eso, vakasaqarai ira na tubuda era sa mate, ka vakayacora na cakacaka vakalotu vakaveisosomitaki ena vukudra ena valetabu. Eda na vakayacora talega na idusidusi oqori nida wasea na loloma ni iVakabula ena noda veiqaravi, ivakaraitaki, ivakadinadina, kei na veisureti vei ira tale eso me ra tomani keda.

“Sa liutaka tiko na Turaga na Vakalesui mai ni Nona kosipeli kei na Nona Lotu,” e kaya o Peresitedi Henry B. Eyring, na iKarua ni Daunivakasala ena Mataveiliutaki Taumada. “Ena liu vei keda ko Koya. E kila vinaka sara o Koya na vunilagi. E sureti iko kina cakacaka. E tomani iko kina.”

Na cava a yaco kina kaloko ni taga nei Tutu Nelson? Ena vica na yabaki sa oti, au a solia vua na luvequ tagane. Me vaka ga e yaco vei au, na kaloko oya ena gauna oqo e semati koya vei ira na nona qase ka vakananuma vua na nona itavi vei ira na nona kawa.

E yaco vakakina. Na itabatamata yadua ni veiyalayalati era vakayacora na cakacaka ni Turaga, ka vakayacora na kena itavi ena kena vakarautaki na vuravura me baleta na iKarua ni Lako Mai i Jisu Karisito.

Meda vakavinavinakataka na madigi kei na veivakabauti e solia vei keda na Turaga nida vakasokomuni vua na iVakabula, vakasokomuni kei ira na Yalododonu, ka vakasokomuni ena veiqaravi e Vukuna.