Na Veivakalougatataki ni Veivakalesui Mai

Ena vica na yabaki sa oti, au vakila niu vakataka na gonetagane ko Josefa. Au a veilecayaki ena “ivalu vosa kei na duidui ni vakasama” (Josefa Simici—Ai Tukutuku 1:10) ka lako mai na vuqa na veimatalotu duidui e Viti. Ena imatai ni gauna au sotavi rau kina na daukaulotu, e levu sara na noqu taro. Eso era vakasesei au ni berabera noqu vuli baleta niu vakadikeva tiko na Lotu rauta ni walu na yabaki. Na noqu saumaki e tekivu ena noqu kila na yaca ni Lotu.

Ena Nona veiqaravi vakalotu ena bula oqo, a tauyavutaka o Jisu Karisito na Nona Lotu. Ni toso na gauna, sa yali na ivunau kei na lewa ni matabete ni Nona Lotu. Ena noda gauna, a vakalesuya mai o Jisu Karisito mai vua na Parofita o Josefa Simici na lotu vata ga a tauyavutaka o Koya ena Nona bula e vuravura (raica na Yavu ni Vakabauta 1:6). Sa vakarota talega o Koya ena ivakatakila, “Ni sai koya oqo na yaca ena kacivi kina na noqu lotu ena veisiga mai muri, io Na Lotu i Jisu Karisito ni Yalododonu Edaidai” (Vunau kei na Veiyalayalati 115:4)

Na Lotu e vakatokai ena yaca i Jisu Karisito baleta ni oqo na Nona Lotu! Ni oti e walu na yabaki, a voqa kina noqu vakasama kei na yaloqu na ka dina oqo. Au papitaiso niu yabaki 27 ka sega ni dede au sa kacivi meu daunivakasala ena mataveiliutaki ni Cauravou ena tabanalevu ka qasenivuli ni semineri ena mataka lailai. Ena noqu ilakolako, sa tubu tikoga na noqu ivakadinadina.

A veisau na noqu bula niu vakavulica na semineri, tiko ena soqoni ni sakaramede, ka vakarorogo kina koniferedi raraba. Au vakila talega na veivakacegui, logavinaka, kei na veivakauqeti ni Yalotabu niu wilika na iVola i Momani—e dua na ivakadinadina rawa ni tarai ka ivakaraitaki ni Veivakalesui mai kei na veikacivi vakaparofita nei Josefa Simici.

Ena gauna a kacivi Josefa kina na Turaga “ka vosa vua mai lomalagi, ka solia vua na ivakaro” (Vunau kei na Veiyalayalati 1:17), a vakaraitaka o Koya nio Koya “sa vakauqeti ira na tamata, ka kacivi ira kina nona cakacaka tabu ena itabagauna kei na itabatamata oqo, ka vakakina ena veitabatamata e liu” ka ni “sai koya vata ga na Kalou e nanoa, edaidai, ka sega ni mudu” (Vunau kei na Veiyalayalati 20:11–12).

E tomani tiko nikua na Veivakalesui mai ka a tekivu vei Josefa. Nida Yalododonu Edaidai, eda sa kacivi meda vosa ena yaca ni iVakabula me “rawa ni tubu cake e vuravura na vakabauta,” “me vakataudeitaki na Nona veiyalayalati tawavakaiyalayala,” kei na “taucoko ni [Nona] kosipeli me ra vunautaka oira sa malumalumu kei ira sa rawarawa nodra bula kina iyalayala kei vuravura” (Vunau kei na Veiyalayalati 1:21–23). Eda kalougata ni rawa nida veivuke ena tarai cake ni Lotu ka vakarautaka na vuravura kina siga o ya ni sa lesu mai o Jisu Karisito.

Vakavinavinakataka na Parofita o Josefa

Ni oti e dua na yabaki mai na noqu papitaiso, keirau a gole kei watiqu, o Anita, kina Valetabu e Nukualofa Toga me keirau vauci me baleta na gauna oqo kei na veigauna tawamudu. Na noqu ivakadinadina me baleta na Veivakalesui mai a vakaibalebale vakalevu kina na lako kina valetabu. Na kosipeli vakalesui mai i Jisu Karisito e vakaibalebale dina! E vakasinaiti na yaloqu ena vakavinavinaka ena vuku ni veivakalougatataki e kauta mai vei au kei na noqu matavuvale.

E yaco mai i vuravura na veivakalougatataki vakasakiti oqori ena vukui: “Josefa Simici na Parofita ka Daurairai ni Turaga, [o koya] sa cakava e levu cake na ka mai vei ira kecega na tamata era sa bula oti e vuravura, ka vakavo ga kina ko Jisu, me baleta na nodra vakabulai na tamata e vuravura.” (Vunau kei na Veiyalayalati 135:3) E dodonu meda dau vakavinavinakataka tikoga—ka kakua ni guilecava—na veika sa soli vei keda mai vua na parofita ni iotioti ni itabagauna oqo.

Mai vei Josefa, eda kila kina na noda isema ni veiyalayalati kei na Tamada Vakalomalagi kei Jisu Karisito. Sa tu vei keda na matabete vakalesui mai kei na cakacaka vakalotu kei na veiyalayalati. Ena veika a sotava o Josefa ena Veikau Tabu, eda vulica kina ni bera mada ga ni vakatakilai Luvena, o Jisu Karisito na Tamana, a kacivi Josefa ena yacana (raica na Josefa Simici—Ai Tukutuku 1:17). E kilai keda tale ga o Koya ena yacada. Me vaka ga na Nona dolava na lomalagi ka sauma na masu rawarawa, mai vu ni yalona e dua na gonetagane yabaki 14, ena sauma talega o Koya na noda masu ena Nona lewa, sala, kei na gauna, veitalia na noda yabaki. Na dina oqo e voqa vakatitobu tu e yaloqu. Au vakadinadinataka nira dina.

Au nuitaka niu sa dua ka sa caka vinaka tiko e vuravura. Kevaka au vakakina, sa levu sara na ka e cakava o Josefa Simici me cau kina. Ena sega ni vaka tu nikua na noqu bula, au na sega ni tagane vakawati ka tama me vaka oqo, kau na sega ni marau me vaka oqo ke sega na kosipeli vakalesuimai a cabora kina na Parofita o Josefa na nona bula me kauta mai ki vuravura. Na kosipeli e solia vei au na rarama kei na inuinui. Ena vuku ni ka oqo, au na vakavinavinakataka tawamudu na Parofita o Josefa.

Au kauta voli e dua na iVola i Momani ena vanua cava ga au lako kina, ka nuitaka niu na rawa ni solia vua e dua ka vakaveikilaitaki ira ki na kosipeli vakalesui mai i Jisu Karisito. Au solia oti e drau na ilavelave e vuravura raraba. Au taleitaka meu wasea na itukutuku ni Veivakalesui mai—ena gauna cava ga, ena vanua cava ga.

E dina sara oqo niu veivakavulici ka vakadinadinataka vei ira na luvequ kei Anita ena loma ni lalaga ni neitou itikotiko. Sa kaulotu tiko oqo na luvei keirau yalewa e New York City, Amerika. Keirau sa tukuna vua, “Lako ka vakadinadinataka na iVakabula ena yasa ni nomu vuravura. Erau na cakava vakakina o Tinamu kei Ta ena neirau yasa ni vuravura.” Keitou dau taleitaka na vakavoui ni neitou veiqaravi. Ia oqo, sa dua na makubui keirau yalewa yabaki va. Na inuinui kei na gagadre ni yaloqu oya ni na dau rogoca ka dau nanuma tikoga na Tukana ni vakadinadinataka tiko na iVakabula kei na Nona kosipeli.

Eda rawa ni vakadinadinataka kece na veivakalougatataki ni kosipeli vakalesuimai—ena gauna cava ga, ena vanua cava ga—nida bulataka e dua na bula ivakaraitaki vinaka ni tisaipeli i Jisu Karisito. Eda rawa ni wasea na iVola iMomani: E Dua Tale na iVakadinadina kei Jisu Karisito. Ka rawa nida vakadinadinataka ni sa vakalesuya mai o Jisu Karisito na taucoko ni Nona kosipeli ka liutaka na Lotu nikua. E vakavulica o Peresitedi Russell M. Nelson ni “ivakatakila e tomana tikoga na kena drodro mai vua na Turaga ena gauna [ni] iwalewale tomani tiko ni veivakalesui mai.” Au vakadinadinataka ni oqo e tomani tiko ena dua na laini sega ni cavuka rawa ni idola ni matabete era taura tu na parofita, daurairai, kei na dauvakatakila ka ra veivakauqeti, veidusimaki, ka vukei keda meda vauci keda vua na iVakabula o Jisu Karisito.

Oqo na noqu ivakadinadina bula ka noqu ivakadinadina. Au na marautaka meu wasea ena veigauna kece ka sega ni vakatitiqataka.