E Cala Beka na Noqu Veikacivi ni Kaulotu?

Ni oti e rua na yabaki mai na noqu diqiri ni fika vakacakacaka kei na fika vakailavo, au a vakauqeti vakaukauwa meu lai kaulotu. Au digitaka meu veiqaravi, dina ga niu na calata eso na maka ni koliji e dodonu me caka veitaravi.

Ni oti ga vakalailai, niu wilika na noqu veikacivi ni kaulotu kina Tabana ni Kaulotu na Utah Salt Lake City Central, a vaka na tadra. Au sega ni kila e dua ka a veiqaravi mai Salt Lake City. Au nanuma de dua au a dolava cala na veikacivi ni kaulotu. Niu yaco yani i Salt Lake City, au vakila ni veika kece au kila ni sa kau tani. Au kunei au ena dua na basikeli ena uca cevata ka sega ni kila na sala meu daukaulotu kina. Ena duidui ni kena itovo kei na draki, e vaka ni sa rui yawa sara mai Sauca Aferika o Salt Lake City me vaka au rawa ni lakova.

Ena imatai ni noqu vanua, keirau a sikova kei noqu itokani e dua na lewenilotu na yacana o Chris Ruppel me laki vakayakavi. A taroga ke dua vei keirau e kila na ivakatagi. A tukuna na noqu itokani niu dau vakatagitaka na piano ka lagasere, au mani lagata e dua na sere vei iratou na matavuvale. Qai yaco e dua na ka veivakurabuitaki. A raici au mai o Baraca Ruppel ka kaya, “Elder Vizzini, kevaka o lagasere tikoga vaqori, o na dua na daukaulotu gugumatua.” Au nanuma ni sa sa dua na ka talei mai vua oqori ia au sega ni vakasamataka vakalevu.

Ni oti e vica na vula, au veivuke ena kena tauyavutaki e dua na soqoni yasanibuka ni daukaulotu ni ivakatagi vata kei Brother Ruppel. Ena veivanua kece au a veiqaravi kina ni oti oya, keirau vakayagataka na iwalewale vata ga oqo. E vuqa na tamata era a vakaitavi vata kei keitou, mai vei ira na lewe ni iteki ki vei ira na daulagasere kilai levu ni vanua kei ira na lewe ni veimatalotu tale eso. Keitou vakavulica na veika me baleta na iVakabula ena ivakatagi kivei ira na tamata era na sega ni vinakata me ra dabe ena dua na lesoni. Au vulica ni ivakatagi e rawa ni tarai ira ruarua na dravudravua kei ira na vutuniyau, o ira na vuli kei ira na sega ni vuli.

E vakavulica vei au na noqu kaulotu niu rawa ni cakava na veika dredre. Niu veiqaravi tiko ena dua na vanua vakayawa sara ka duidui mai na noqu vanua, au vulica nio keda kece eda luve ni Kalou. Au sa raica na cakamana ena nodra bula na tamata ena yasa kadua kei vuravura mai Utah, kau sa raici ira eke ena Ceva kei Aferika. Au kila ni kevaka e tu ga vei keda na vakabauta, ena rawa ni yaco na cakamana ena noda bula yadua (raica na Momani 9:15–21).