“Siga ni Keba Ucauca,” iTokani, Janueri 2025, 16–17.
Siga ni Keba Uca
Na cava e sega ni sauma kina na Tamada Vakalomalagi na nona masu?
E dua na italanoa dina mai Amerika.
“Au sa na qito ni mataka, se vakaevei?” A taroga o Lucy ni sa tutuvitaki koya o Na ena imocemoce.
A deguvacu o Na. “Io! Bogi ni mataka ena 6:00.”
E sega ni rawa ni wawa o Lucy. A vakanamata tu o koya ki na imatai ni qito tavipolo ni nona timi me vica vata na macawa. Ena yabaki oqo sa piqi na nodra siqeleti! E marautaka vakalevu sa dredre ni moce.
Ia ena mataka ka tarava, a rai yani ki tautuba o Lucy ka veveku na matana. Era tu e lomalagi na o loaloa, ka tu ena veivanua kecega na tobu ni wai. A tau toka na uca ena bogi taucoko.
A tekiduru me masu ena mataka. “Tamaqu Vakalomalagi, yalovinaka vukea na draki me vinaka kina na noqu qito tavipolo ena bogi nikua.”
Ena siga taucoko e koronivuli, a vakasamataka o Lucy na qito. E raitayaloyalotaka ni daramaka tiko na nona siqeleti piqi vou, ka dolele yani me ciqoma e dua na itavi ni qaqa. Ia e tautuba, e se tau tiko ga na uca ka suasua.
A masu vakatotolo o Lucy ena nona vakasama. Tamaqu Vakalomalagi, yalovinaka vukea na matanisiga me lako mai ena dua na gauna lekaleka me rawa ni keitou qito ena bogi nikua.
Ni qiri na lali ni koronivuli, a taura na nona katodreketi o Lucy ka cici yani ki tuba. E raica rawa na matanisiga ni sa tekivu me rairai mai ena daku ni o!
Ia ni lako mai o Na me mai kauti koya, a rogoca na itukutuku ca. “Sa sega na qito ena bogi nikua,” a kaya. “Vosoti au.”
A raica na lomalagi o Lucy. “Sa basika mai na matanisiga. De sa na mudu beka na tau ni uca.”
“Au kila,” a kaya o Na. “Ia na rara ni tavipolo a luvuci mai na wai taucoko. Kevaka mada ga sa mudu na tau ni uca, sa rui suasua ka soso me caka na qito. Ena qai tuvai vou tale e dua na gauna ni qito.”
E a tonawanawa na wainimata i Lucy. A rarawa sara vakalevu. E vinakata dina me qito ena bogi nikua. Na cava e sega ni sauma kina na Tamada Vakalomalagi na nona masu?
E vale, e vaka me loaloa qai cudrucudru o Lucy me vaka na oni uca. E sega ni via wilika na nona ivola taleitaki. E dina ga ni a bulia o Na na kena pasta taleitaki me vakayakavi, a sega ni vinaka na kena ikanakana.
Ni oti na vakayakavi, a qasi yani me tene vei Lucy na tacina lailai duadua, o Ellie. “Qito vata kei au?” a kerea.
A cegu o Lucy. “Io,” a kaya o koya. Sa qai yaco mai vua e dua na vakasama. “Eda gadreva e dua na ka ni lasa me da cakava.”
A taura e dua na sasa ka vesuka e dua na sikavu e muanai me dua na kuila. Sa qai vakasoqoni ira kece na ganena. A taura cake na kuila ka kaya, “Kidavaki mai ki na Keba ni Siga Ucauca! Oqo na vanua mo lako kina mo marau nio sega ni rawa ni qito e tautuba.”
Eratou marau na ganena.
“Taumada,” e kaya o Lucy, “eda na lagata na noda sere ni keba.”
Erau dredre na goneyalewa ni rau bulia e dua na sere lialia kei na vosa me salamuria. Eratou qai wavokita na rumu kei na nodratou kuila, ka lagasere vakadomoilevu ena kena levu duadua e rawa.
“Oqo e dodonu me da vakaduria na nodatou valelaca!” A vukei iratou na ganena o Lucy me ratou kumuna vata na itutuvi kei na ilokoloko me dua na bai. A bale vakavica. Ia ni ratou sa vakavinakataka, eratou veibinibini kece e loma ni bai me ra qito.
Sega ni dede sa gauna ni moce. “Au nuitaka ni na tau tale na uca ni mataka,” e kaya na taci Lucy o Liza. “Au vinakata meu qito tale ena Keba ni Siga Ucauca!”
“Vinaka vakalevu na qito vata kei ira na ganemu,” e kaya o Na ni mokoti Lucy vinaka. “O a bulia na nomu rarama mai na dua na ituvaki o. Au dokai iko saraga.”
E marau o Lucy ni kaba yani ena nona imocemoce. A sega ni saumi na nona masu ena sala e vinakata. Ia e se vukei koya tikoga na Tamada Vakalomalagi me kunea e dua na ka marautaki me cakava vata kei na nona matavuvale—ka sa vaka ga na lasa oqori me vaka ga na nona daramaka na piqi ena imatai ni nona qito tavipolo.
Droini eso mai vei Apryl Stott