“Lako i Lotu Vata kei Ghuka,” iTokani, Janueri 2025, 30–31.
iVuvu ena Veivanua Kecega
Lako i Lotu Vata kei Ghuka
E se bera mada ni bau raica o Kelvin e dua na lotu vakaoqo.
E dua na italanoa dina mai Kenya.
A binia vakavinaka o Kelvin na tavaya sucu iloilo ena vatavata. Se qai toki wale ga oqo me laki vakaitikotiko vata kei rau na tubuna ena dua na koro ena taudaku ni siti. Erau taukena e dua na sitoa ni sucu, ka taleitaka o Kelvin me veivuke.
“Ena bogi nikua eda na lako ki na dua na itaviqaravi ena neirau lotu,” e kaya o Ghuka (Tukaqu). “Vinakata mo lako vata kei keitou? Eda na lasa.
E taleitaka o Kelvin na lasa. “Io” au a kaya. “Au na lako vata kei kemudrau!”
Ni ratou sogota na sitoa, ratou sa taubale yani o Kelvin kei rau na tubuna. Eratou lako sivita na sitoa tale eso ni volitaki isulu, vuanikau, kei na kau tawa i vokete. Ni oti vakalailai, ratou sa yaco yani i valenilotu.
A tucake tu o Kelvin ena widri ni mata ni raica na vale totoka oqo. E se bera mada ni bau raica e dua na valenilotu vakaoqo. E vuqa na valenilotu e tiko na kauveilatai e cake, ia oqo e sega.
E loma, o rau na tubui Kelvin erau vakaveikilaitaki koya vei ira e vuqa na tamata vinaka. Era kania na kakana totoka ka qito.
Ia a lomatarotaro o Kelvin. A mani lako voli ena olo ni valenilotu. “A raica na droini kei Jisu Karisito” A qai curu yani kina dua na rumu ni kalasi ka raica eso na itaba ena lalaga.
O cei o ira na tamata oqo? A vakataroga o Kelvin.
Ni sa biuta na rumu, a raica e rua na cauravou ena olo. Erau vakasote vulavula kei na neketai. “Bula,” e kaya e dua vei rau. Keirau na daukaulotu: O cei na yacamu?”
A vakatakilai koya o Kelvin. Qai taroga, “O cei na tamata ena iyaloyalo o ya?” A dusia lesu e dua na itaba ena rumu.
“Oqori na parofita,” a kaya na daukaulotu kadua. O kila beka se cava na parofita?
A dredre o Kelvin ka kuretaka na uluna sega.
“Na parofita e italai mai vua na Kalou,” e kaya na daukaulotu. E vakavulica vei keda o koya na ka e vinakata na Kalou meda kila.
Ni taubale yani ki vale o Kelvin kei rau na tubuna ena bogi o ya, a taura tiko e dua na ivola ni iVola i Momani ka rau a solia vua na daukaulotu. A marautaka o koya me vulica e levu tale na ka me baleti ira na parofita kei na lotu vou oqo.
“O na wilika beka vei keirau?” A taroga o Ghuka ni rau yaco i vale. Erau sega ni kila na tubui Kelvin na wilivola.
“Io!” E kaya o Kelvin. A dolava na iVola i Momani ka wilika vakadomoilevu. E sega ni kila na vosa kece, ia a vakila e dua na ka talei.
Ena Sigatabu, a taubale o Kelvin kei rau na tubuna lesu ki lotu. A lako kina dua na kalasi me baleti ira kece na gone. E vakatokai me Lalai. A levu sara na nona itokani! A vulica e levu tale na ka me baleti ira na parofita kei Jisu.
Erau a lako mai na daukaulotu me rau vakavulici Kelvin vakalevu cake. Dua na siga rau a tarogi koya ena dua na taro. “O na muria beka na ivakaraitaki nei Jisu ka papitaiso?”
A matadredredre sara vakalevu o Kelvin. “Io!”
Ena siga a papitaiso kina, a butu yani ki wai o Kelvin. E batabata. Ia ni rai wavoliti koya o Kelvin, a raici rau na tubuna, na daukaulotu, kei ira kece na nona itokani vou mai valenilotu. E vakila ni lomani vakalevu!
Ena nona digitaka me muri Jisu Karisito, sa yaco o Kelvin me painia ena nona matavuvale. A sega ni waraka me muri Koya tikoga—ka vukei ira talega na tani me ra muri Koya!
Droinitaka o Kristin Sorra