“Vakataki Josefa Ga,” iTokani, Janueri 2025, 4–5.
Dauwiliwili Rawarawa
Me vakataki Josefa ga
A raica dina beka o Josefa Simici na Tamada Vakalomalagi kei Jisu Karisito?
E dua na italanoa dina mai Filipaini.
A lade o Lhensay ena nona idabedabe tikivi tinana ni cici tiko na nodrau jeepney e loma ni tauni. Na Sigatabu sa siga taleitaki duadua nei Lhensay ena dua na macawa! E dau taleitaka na lako kina Lalai ka vulica na veika baleti Jisu Karisito.
A kele na jeepney ena nodratou ikelekele ni lori. A taura tu na ligai Lhensay o tinana ni rau taubale yani ki lotu.
Ni oti na soqoni ni sakaramede, a taubale o Lhensay ki na Lalai vata kei nona itokani o Maria. E tiko ena papa e dua na iyaloyalo ni dua na cauravou ni masu tiko ena veikau.
“Yadra vinaka!” Na nodrau qasenivuli, o Sisita Cruz, a dusia na iyaloyalo. “E dua beka e kila o cei oqo?”
“Oqori o Josefa Simici!” E kaya o Lhensay.
A dredre sara o Sister Cruz. “Io, e dina o ya. Na cava a cakava o Josefa Simici?”
A raica lesu o Lhensay na iyaloyalo. E kila o koya ni o Josefa Simici e parofita, ia e sega soti ni kila e levu tale na ka.
“O koya na imatai ni parofita ni neitou lotu,” e kaya o Maria.
“Dina tale!” e kaya o Sisita Cruz. “Ni se gone o Josefa, a sega ni kila o koya na lotu me lewena. A lako kina veikau ka masuta na Kalou me kila se o cei e dina. A kerea talega me vosoti na nona ivalavala ca. Ni masu tiko, a basika mai e dua na rarama ramase sara. O kila beka o cei a tu ena rarama oya?”
Era wawa o Lhensay kei ira na vo ni nona kalasi.
A biuta tale o Sisita Cruz e dua tale na iyaloyalo ena papa. Na kena oqo e vakaraitaka e rua na turaga ni rau tucake tu e dela i Josefa Simici e maliwalala. Erau daramaka na icurucuru vulavula ka serau sara.
“Erau a vakaraitaki rau na Tamada Vakalomalagi kei Jisu Karisito vei Josefa, e kaya o Sisita Cruz. “Erau tukuna vua ni na vakalesuya mai na Lotu i Jisu. Eda vakatoka me iMatai ni Raivotu.”
A laveta cake na ligana o Lhensay, ka widri na matana. “E dina beka?” a taroga.
A deguvacu o Sisita Cruz. “Io, e vakakina!”
A loma vinaka kina o Lhensay. E kila o koya ni dina na ka a tukuna o Sisita Cruz.
Ena bogi o ya, a vakasamataki Josefa Simici tikoga o Lhensay. “Nau, au na raici Tamada Vakalomalagi kei Jisu vakacava, me vakataki Josefa Simici?” a taroga.
A mokoti Lhensay o Nana. “E vuqa vei keda eda na sega ni raica na Tamada Vakalomalagi kei Jisu me vakataki Josefa Simici. Ia e se rawa tikoga ni rau vosa vei keda ena vakasama kei na vakanananu mai vua na Yalo Tabu. Oti sa na qai rawa nio kila ni rau sa dau tiko vata kei iko ena veigauna kecega.”
A vakasamataka o Lhensay na ivakarau ni kena raragi na yalona ena nona tukuna vei ira o Sisita Cruz na iMatai ni Raivotu. Oqori na Yalo Tabu, ka vakauta vua e dua na itukutuku mai vua na Tamada Vakalomalagi kei Jisu Karisito! A dredre ka mokoti Na lesu tale. Erau a vosa vua, me vaka ga a yaco vei Josefa Simici!
Droini mai vei Shawna J. C. Tenney