Rai vei Karisito

O Kailey yabaki tinikavitu a lewena tiko edua na timi ni veivakamarautaki me yacova na yaco ni dua na vakacalaka ka mavoa kina na nona mona. Na nona vakabulabula tiko a vakavuna na nona sega ni vuli, ka sa tekivu me vakila na galili kei na tuduadua. E a vakaleqai na lomana ka sega ni kila na vanua me vaqara veivuke kina. E vakatura edua na itokani me vakarorogo vei rau na daukaulotu. Erau a vakavulici koya me baleta na Veisorovaki i Jisu Karisito. Na vulici vakalevu cake ni veika me baleti Karisito a solia vua na inuinui, ka vakila ni vaka me dodoliga tiko yani vua na Kalou Vakaikoya.

A kaya o Kailey vei tinana, “Au se bera vakadua ni vakila ni lomani au na Kalou. Ia oqo au kila ni o Koya e lomani au.”

A kurabui vakalailai o Michelle, na tinana. O koya kei watina, o Brock, erau a biuta na Lotu i Jisu Karisito ni Yalododonu Edaidai ni se qai yabaki vitu o Kailey ena vuku ni lomatarotaro, vakatitiqa, kei na veikauwai tale eso. Erau a nanuma ni na marau vakalevu cake na luvedrau yalewa ke sega na soqoni kei na veiivakaro eso. Erau a sega ni nanuma ni nodrau digidigi ena tarovi Kailey mai na dua na isema voleka vua na Kalou. Ni rau sarava tiko o Michelle kei Brock na veisau nei Kailey, erau qai kila ni sa oti edua na gauna balavu mai na nodrau a vakila nodrau voleka vua na Kalou, ka rau vinakata merau vakila tale mada.

Erau a veitalanoa kei nodrau bisopi, ka sega ni dede erau sa lesu tale ki lotu ka oka kina o Braeden na ganei Kailey. Nodrau vakila nirau voleka vua na Kalou ka semati tale Vua—vakabibi ena masu—a vakalesuya tale mai na nodrau vakabauta. Na lesu tale i lotu a sega ni walia kece na nodrau lomatarotaro se kauwai, ia erau a qai kila ni bibi cake na nodra semati vakaukauwa vua na Kalou mai na nodrau vakatitiqa.

Na veika kece oqo a tekivu ni dua na itokani—e dua na itabagone vakataki iko—a sureti Kailey me rai vei Karisito. A qai cakava vakakina!

O Jisu Karisito e kaya, “Drau vakararavi tiko mai vei au ena vakasama kece, kakua ni vakatitiqa, ka kakua ni rere” (Vunau kei na Veiyalayalati 6:36). Oqo na veivakayarayarataki mai na iToko ni iTabagone ni 2025. Vakatara me keitou wasea na sala ona rawa ni digitaka kina na vakararavi mai na vakatitiqa kei na vakabauta mai na rere nio rai vei Karisito:

Tamara W. Runia

Niu sotava tiko na dredre, e dau vukei au meu raitayaloyalotaki Jisu Karisito ni dodoka tu na ligana. Niu rai Vua, au dau nanuma na qaqa ni sere, “Au na Lako Vata kei Jisu”; “Ena sega sara ni biuti au ko Koya, keu lutu mada ga.”

Emily Belle Freeman

Niu wilika na ivolanikalou ni ulutaga oqo, au vakananumi baleti Pita ena Wasawasa o Kalili. Na vakanamata ki na cava e a vakalevutaka na nona rere kei na vakatitiqa, ka a vakavuna me luvu kina ena ua ni cava. Ia ni vakanamata vua na iVakabula a rawa kina vua me cakava edua na ka a se bera ni bau cakava vakadua: a taubale e dela ni wai! E veivakurabuitaki, dina. Na cava ona rawa ni rawata nio rai Vua?

Andrea Muñoz Spannaus

Niu tekivu vakila na rere, veitalia na vanua au tiko kina se ituvaki cava au sotava tiko, au dau nakita meu vakasamataka na noqu veiwekani kei na Tamada Vakalomalagi kei Jisu Karisito. Au cavuta vakavica vata ena noqu vakanananu: O AU EDUA NA LUVENA YALEWA NA KALOU. Au na tomana tiko oqo me yacova niu sa tekivu vakila meu vinaka cake mai. E dau mana sara ga!

Bradley R. Wilcox

Tarogi iko se o cei e kauwaitaki iko ka lomani iko vakalevu duadua. O rau beka na nomu itubutubu kei ira na iliuliu ni Lotu? O ira beka na tamata ena sala ni vakauitukutuku raraba ka ona rairai dua beka ga na matanifika vei ira? Rai vua na Tamada Vakalomalagi kei Karisito. Erau kauwai dina!

Steven J. Lund

Nanuma na veika o vakananumi kina nio cavuqaqataka na itoko ni Kuoramu ni Matabete i Eroni kei na Goneyalewa: O iko edua na luvena tagane se yalewa lomani na Kalou. Vakabauta ni tiko na ituvatuva nei Tamada me baleti iko. Na rai vei Karisito e kena ibalebale ni Nona Veisorovaki e uto sara ga ni ituvatuva oya.

Michael T. Nelson

Na wiliki ni ivolanikalou sai koya na rai tiko vei Karisito! Na vakatitiqa kei na rere ena seyavu yani vakamalua nida vakananumi ena cakacaka mana kei na ivakavuvuli i Jisu. Eda sa kalougata ni tu vakarawarawa vei keda na Nona vosa. Era vakayagataki ena ituvaki kece eda sotava ena noda bula.