Na Parofita kei na Nona iVakabula

Na cauravou o Josefa Simici e a veilecayaki me baleta na lotu. Ka a vakila ni a vakauqeti mai na dua tale na ka me lai masu ena veikau oya ka a raica kina o koya na iMatai ni Nona Raivotu: “Ka luvuci au na rarawa ena vuku ni noqu ivalavala ca vakai au.”

Ni vosa vei Josefa na iVakabula, a kaya, “ I Josefa na luvequ, sa bokoci na nomu ivalavala ca.”

A vulica sara ga e kea o Josefa ni bula tiko o Jisu Karisito. E a vulica tale ga o koya nio Jisu Karisito e dau yalololoma ka dau vosota na ivalavala ca. Na kilaka vakatamata yadua oqo e a bibi vei Josefa. “Na vakabulai ni yaloqu sa ka bibi dina duadua vei au [baleta] niu sa kila vakaidina ni sa ka tawamudu,” a kaya o koya ena dua na gauna.

Na kilaka oqo me baleti Jisu Karisito a bibi talega ena cakacaka a kacivi kina o Josefa me cakava vaka dua na parofita. A wasea na ivakadinadina kaukauwa ni loloma soliwale kei na loloma veivueti i Jisu Karisito ena nona bula taucoko. Me kena ivakaraitaki, a vakavulica ena dua na gauna, “E dodonu me veivutuni ka vakasavasavataki na loma ni tamata taucoko, ena qai kauwaitaki ira ka vakalougatataki ira na Kalou ena dua na sala era na sega ni vakalougatataki vakakina ena dua tale na sala.”

Na cakacaka a kacivi kina o Josefa Simici me cakava e a ka bibi dina. Ka a vulica o Josefa me taura vakabibi na ivakaro kei na ivakasala ni Turaga, ka vakavu vakatikina mai na caka cala eso a cakava.

Me ivakaraitaki, ni a yali eso na draunipepa ni iVola i Momani, a kauta tani na Turaga mai vei Josefa na isolisoli ni vakavakadewa ka qai kaya vua e muri: “Ia raica, sa wasoma beka na nomu dau talaidredre ki na ivakaro kei na lawa ni Kalou. … Ia, raica, a sega ni dodonu mo rerevaka vakalevu na tamata mai vua na Kalou” (Vunau kei na Veiyalayalati 3:6–7).

Ia a tu talega vua na Turaga na itukutuku oqo vei Josefa: “Ia mo nanuma, na Kalou sa rui yalololoma; o koya, mo veivutuni kina” (Vunau kei na Veiyalayalati 3:10).

A qai veivutuni o Josefa ka soli tale vei koya na isolisoli ni vakavakadewa. Na veika kece e sotavi a rairai mosimosi vua, ia a vulica eso na lesoni bibi—oka kina ni rawa nida veivutuni ka vakalougatataki baleta ni sa rui yalololoma na Turaga.

E a raica o Josefa Simici e vica vata na raivotu, veisiko, kei na ivakatakila ka a raica se rogoca kina na Turaga o Jisu Karisito se vulica kina na Nona ituvaki, ivakarau, kei na ilesilesi (raica, me kena ivakaraitaki na, Vunau kei na Veiyalayalati 19; 76; 93; 110).

Edua na dina a vulica o koya sai koya ni cakacaka ni veisereki ni iVakabula sa baleti ira kece na tamata era bula ena vuravura oqo—kei na vuravura kece era tiko kina na luvena tagane kei na yalewa na Kalou (raica na Vunau kei na Veiyalayalati 76:24).

Ena gauna vata oqori a vulica kina o koya na vakaitamera ni nona cakacaka na iVakabula, a vulica talega o Josefa nirau kilai keda ka lomani keda vakayadudua sara na Tamada Vakalomalagi kei Jisu Karisito. Erau vinakata me veiwekani vakavoleka sara kei keda vakayadudua. Erau vinakata meda caka veiyalayalati, maroroi ira, ka vosota ena yalodina me yacova na ivakataotioti. Na veimaliwai vakatitobu oqo ena kauta mai vei keda na reki kei na nuidei.

A yaco me titobu sara na nodratou veiwekani o Josefa kei na Tamada Vakalomalagi kei Jisu Karisito ka ena dua na gauna dredre duadua ni nona bula, ni lokataki tu ena Valeniveivesu e Liberty, a rawa vua me kaya:

“Au na tovolea meu na marautaka ga na veika sa tu vei au, niu kila ni sa noqu itokani na Kalou. Vei Koya ga au na kune vakacegu kina. Au sa solia na noqu bula ki ligana. Au sa vakarau tu meu lako ena nona veikacivi. Au sa gadreva meu tiko vata kei Karisito.”

Nio vulica na bula kei na ivakavuvuli nei Josefa Simici, sa rawa mo muria na nona ivakaraitaki. Veivutuni, cakava ka maroroya na veiyalayalati, ka tomana tikoga mo yalodina. Ka oti o iko talega ona qai kila ni iVakabula e nomu iTokani.