Digitaka na Valetabu

Na valetabu voleka duadua vei au e tiko ena dua tale na yanuyanu. Meda yaco ki kea, eda na vuka me 45 na miniti se vodo waqa me 12 na auwa. Au se bera mada ni bau lako ki na valetabu, ia ena iotioti ni noqu yabaki ni vuli, a navuca o tinaqu me keitou lako. A maroroi ilavo tu me dua na yabaki me rawa ni keitou lako kina vakamatavuvale.

E kena leqa, ni keitou na lesu ki vale ni oti na itekivu ni vuli, kau a lomaleqa kina. E dau bibi sara vei au meu rawata edua na itagede ni maka veirauti (GPA) e koronivuli me rawa niu ciqoma e dua na sikolasivi me baleta na koliji. Au a nanuma meu kua ni lako ki na valetabu, baleta keu na lako ena rawa ni vakacacana na iotioti ni kequ maka ni GPA. A qai kaya o tinaqu, “Vacava mo masu ka kerea na veivuke ni Turaga?”

Au a tuvakasuka vakalailai baleta niu a rere, ia au a mani nanuma meu masu. A dusimaki au na Tamada Vakalomalagi, kau digitaka meu lako ki na valetabu. Ena loma taucoko ni macawa keitou a tiko kina e kea, keitou dau lako ki na valetabu ena veisiga. E a vakasakiti dina! Na veipapitaisotaki e a vakasakiti dina; a rawa meu vakila vakaukauwa sara na Yalotabu.

E muri, au a qai vakacavara na vuli ena dua na maka vinaka ni GPA. Na noqu maroroya tiko edua na veiwekani voleka kei na iVakabula a solia vei au na inuinui ena gauna oya. Au kila ni a tiko vata kei au o Koya, ka solia vei au na kaukauwa. Sa kila tu na Turaga na noda sasaga, kei na noda solia ki Ligana na veika kece, eda rawa ni nuitaka ni na vinaka na veika kece.

Au vakavinavinaka ni a yaloqaqa o ganequ me sureti rau na daukaulotu ki na neitou itikotiko. Keirau a imatai ni tamata ena neitou matavuvale me papitaiso—au a sa yabaki 13 ka yabaki 15 o koya. Au kila niu luvena lomani na Tamada Vakalomalagi. A sega vakadua ni tiko na tamaqu vaka vuravura ena noqu bula, ia e vukei au meu kila ni tiko e dua na Tamada Vakalomalagi ka niu a buli me ucui Koya. Au vakila na Nona loloma vei au; Au kila ni ena veigauna dredre duadua, e dau tiko e yasaqu o Koya.