iTukutuku Vinaka vei Kemuni kei Vuravura
E rawa nio ciqoma na itukutuku marautaki ni loloma kei na reki baleta ni sa vakalesuya tale mai o Jisu Karisito na Nona Lotu me vakalougatataki ira kece na luve ni Kalou.
Veikau Tabu, mai vei Al Rounds
Na noda itukutuku ni inuinui kei na vakacegu ki na tamata kece sai koya ni bula tiko o Jisu Karisito ka sa vakalesuya tale mai na Nona kosipeli kei na Lotu ena iotioti ni gauna oqo. “E dredre me vakamacalataki na lagilagi ni veika oqo ki na kawatamata!”a kaya na Parofita o Josefa Simici. Era sa “itukutuku marautaki vei ira na tamata kecega ka sa dodonu me vakasinaiti vuravura ka vakamarautaka na yalodra na tamata kecega nira rogoca e daligadra.”
Na veiitukutuku marautaki oqo sa ivakaraitaki bibi ni loloma tawacava nei Tamada Vakalomalagi kei na noda iVakabula. Era na vakalougatataki kina na tamata kecega ka vakarautaka na vuravura ki na siga ena lesu tale mai kina o Jisu Karisito. Au reki niu rawa ni vakayagataka na noqu bula me vunautaki na veidina oqo ki vuravura taucoko.
Mataka ni Tucaketale, mai vei Sarah Hatch
Sega ni Namaki ka Vakasakiti
Ena dua na veikau, erau a rairai mai kina na Kalou na Tamada kei na Luvena, o Jisu Karisito, ka vosa vei Josefa Simici me isau ni masu nei Josefa me baleta na lotu cava me lewena (raica na Josefa Simici—Ai Tukutuku 1:16–20). A tukuna o Jisu vei Josefa me kakua ni lewena edua na lotu. A yalataka o Koya ni na vakatakilai vei Josefa na taucoko ni Nona kosipeli ena dua na gauna mai muri.
Vei ira e vuqa, era a sega ni namaka mena rawa ni kacivi o Josefa ki na dua na cakacaka bibi vaka oya. E matadra, o koya e a dua ga na gonetagane sega ni vuli mai na dua na itikotiko lailai. Ia mai vei Josefa, erau na cakava na Tamada Vakalomalagi kei Jisu Karisito edua na ka vakasakiti dina. Ena soli vei Josefa na ivakaro, ivakatakila talei, kei na ivunau bibi me baleta na ituvatuva loloma nei Tamada Vakalomalagi kei na loloma veisereki kei na Veisorovaki i Jisu Karisito me vakalougatataki keda ka vukei keda meda kila na sala eda rawa ni lesu tale kina ki vale.
E Dua na iVakadinadina Kaukauwa ni Loloma ni Kalou
A rairai vei Josefa Simici na agilosi o Moronai ka tukuna vei Josefa edua na itukutuku, ka volai tu ena peleti koula, ka bulu voleka toka ga (raica na Josefa Simici—Ai Tukutuku 1:33–34). E muri, a vakadewataka o Josefa na itukutuku oya ka qai yaco me iVola i Momani, ka tautauvata kei na iVolatabu me dua tale na ivakadinadina kei Jisu Karisito.
Ena loma ni iVola i Momani, o ira na tamata, ena drau na yabaki ni bera na Karisito, era a kila ka parofisaitaka ka gadreva tu na Nona lako mai. Eda wilika talega na Nona rairai mai na iVakabula ka veiqaravi vei ira na Nifai. E a sureti ira kecega mera lako mai vei Koya. A vakabulai ira na tauvimate, lokiloki, mataboko, kei ira kece era vakararawataki. Sa qai vakalougatataki ira na gonelalai o Koya ka masulaki ira (raica na 3 Nifai 11:14–15; 3 Nifai 17:7–9; 3 Nifai 17:21).
E vakavulica vei keda na iVola i Momani e vuqa sara na ka me baleta na loloma kei na yalololoma ni iVakabula. E vakadinadinataka vakaidina nio “Jisu na Karisito.” E tiko kina na totoka ni Nona kosipeli tawacava. Na iVola i Momani e vakarautaka e dua na iyaloyalo matata ni nona lomani keda na Tamada Vakalomalagi kei na noda iVakabula ka uasivita na veika eda rawa ni vakasamataka.
Peleti Koula, mai vei Robert Theodore Barrett
Na Veivakalougatataki ni Matabete kei na Lotu
Era a talevi Josefa Simici eso tale na italai vakalomalagi. A lako mai o Joni na Dauveipapitaisotaki me vakalesuya mai na lewa ni veipapitaisotaki. Eratou a vakalesuya mai o Pita, Jemesa, kei Joni na itutu vakaiapositolo kei na idola ni lewa ni matabete. “Era a lako talega mai eso tale, oka kina o Ilaija, ka vakalesuya mai na lewa me semati vata na matavuvale me tawamudu ena veiwekani tawamudu ka uabaleta yani na mate.”
Sa qai tauyavutaka o Jisu Karisito mai vua na Parofita o Josefa edua na Lotu ka vaka na kena a tauyavutaka o Koya ena gauna ni Veiyalayalati Vou (raica na Yavu ni Vakabauta 1:6). Mai vei Jisu Karisito kei ira Nona iapositolo kei na parofita, Na Lotu i Jisu Karisito ni Yalododonu Edaidai e vakarautaka tu na veivakalougatataki ni kaukauwa vakalesui mai ni matabete vei ira kece na luve ni Kalou.
Au rawa ni kaya ni kevaka o rarawa ka vakila nio se sega ni vinaka sara se o sega ni okati, lomani iko vakalevu cake ka mo kila nio lomani vakalevu cake mai vua na Tamada Vakalomalagi kei na Luvena, na noda iVakabula, mai na ka o rawa ni vakasamataka. Eda sa sureti kece meda lako mai vei Karisito kei na Nona Lotu. Na Lotu e sega ni baleti ira era sa taucoko tu. E vaka edua na valenibula eda kunea kina na veivakabulai. Ena lotu eda rai ki tautuba, qaravi ira na tani ena loloma, ka wasea na kosipeli. E rawa nida “nanumi ka vakani ena vosa vinaka ni Kalou” (Moronai 6:4). Sa rawa meda kunea kina na vakacegu kei na veivakabulai. Sa dua na veivakalougatataki vakaitamera!
Na Vu ni Reki Levu
Na Tamada Vakalomalagi kei na Luvena lomani, o Jisu Karisito, erau lomani iko ka gadreva—vakalevu sara—me kauti iko ki vale ka tiko tawamudu ena bula Erau bula tiko kina. Na Veivakalesui mai e vakatakila ni Rau sa cakava na veika kece mo rawata kina na veika lagilagi oqo vei iko. Ena so na gauna, ona sotava beka na veivakatovolei kei na dredre, ia o iko “[mo] rawata na marau” (2 Nifai 2:25) ena bula oqo kei na bula ka tarava. E kila vakalevu cake na Parofita o Josefa na ka oqo mai vei ira tale eso. Ko na raica ni rawa nio marau nio veivutuni tikoga ka gole vua na Tamamu mai Lomalagi kei na nomu iVakabula.
A sotava wasoma o Josefa na veisaqasaqa kei na veivakacacani, ia a dau “mamarau” tu ga (Josefa Simici—Ai Tukutuku 1:28). A reki tikoga, kaukauwa, ka loma qaqaco, ka rawata na cakacaka a soli vua me cakava. E a dina tale ga oqori vei ira kece era a taravi koya mai.
E a voravora na gauna taumada ni Lotu, ka rawa ni voravora talega nikua, ia a tomani tiko ga na Veivakalesui mai—ka tomani tiko nikua. E liutaka tiko o Jisu Karisito na Nona Lotu. Era tomana tiko na parofita bula na noda tuberi. Ena tomani tikoga na tara ni Veivale ni Turaga. Na loloma ni Kalou kei Jisu Karisito ena vakatetei ki vuravura taucoko nida muria na ivakaro ni iVakabula meda vakani ira na Nona sipi ka wasea na Nona kosipeli. Na veidina eso ni Veivakalesui mai ena lako yani ena veisala kei na veivanua ka a sega ni vakasamataki rawa beka ena gauna nei Josefa. Eda na saga meda cakava meda veilomani cake ka vakalailaitaki na duiyaloyalo e vuravura.
Nio vulica wasoma na kosipeli, masu vakawasoma, ka qaravi ira na tani, na itukutuku ni Veivakalesui mai ena tara na yalomu ka veisautaka na nomu bula. Ena sega beka ni yaco vakatotolo, ia ena kauta mai vei iko na reki—me vaka a yaco vua na Parofita o Josefa.
Me qai vakalougatataka ka dusimaka na nomu bula na itukutuku marautaki ni loloma kei na reki ni Veivakalesui mai—ena gauna oqo kei na veigauna kecega.