Lako Mai, Mo Muri Au

Vakamatatataki ni iTukutuku Eso ni iMatai ni Raivotunei JosefaSimici

Mai vei Matthew C. Godfrey

Tabacakacaka ni Tukutuku Makawa ni Lotu

Na cava na duidui e tiko ena va na itukutuku ni iMatai ni Raivotu nei Josefa Simici? Cava na vuna eratou duidui kina? Kei na cava e rawa niratou vakavulica vei keda?

O sa bau tovolea mo tukuna vua edua me baleta na veika vakayalo? Na veika matailalai cava o a okata kina? Na veika matailalai cava o a biuta tani? O nanuma beka nio na tukuna na italanoa ena duatani na kena itukutukuni kevaka o tukuna tiko vua edua na itokani, ena soqoni ni sakaramede, se vua edua e sega ni lewe ni Lotu i Jisu Karisito ni Yalododonu Edaidai?

Na veitaro oqo e bibi ena vakasamataki ni sala a vakamacalataka kina o Josefa Simici na raivotu baleti Tamada Vakalomalagi kei Jisu Karisito a yaco vua mai Niu Ioka ena 1820. A wasea vakavica o Josefa na veika a sotava oqo. Nikua sa tiko e va na itukutuku taumada nei Josefa:

E dua na itukutuku ni nona bula a vola o Josefa ena vulaikatakata ni 1832. A vakamacalataka o Josefa ni a lako ki na veikau me masu baleta ni a sega ni matata vua na veika vakayalo. A vinakata talega o koya me vosoti nona ivalavala ca.
iVolaniveisiga nei Josefa ena 1835. A lako mai ki Ketiladi, Oaio edua na dauvunau na yacana o Robert Mathews. E a vinakata me vosa vei Josefa me baleta na veika vakalotu, ka mani tukuna vua o Josefa na nona raivotu. O Warren Parrish, o koya ka a maroroya tiko na ivolaniveisiga nei Josefa, a vola na veika a kaya o Josefa.
E dua na itukutuku makawa vakadonui ni Lotu a tekivuna o Josefa ena 1838. A talanoataka na iMatai ni Raivotu me tiki ni sala a vakalesui tale mai kina na Lotu. Na itukutuku oqo e tabaki tiko ena Mataniciva Talei.
E dua na ivola a vola o Josefa ena 1842. A kerei Josefa e dua na dau volaitukutuku na yacana o John Wentworth me vakamacalataka na sala a tauyavutaki kina na Lotu i Jisu Karisito ni Yalododonu Edaidai. A sauma o Josefa ena dua na ivola ka okata kina na itukutuku me baleta na iMatai ni Raivotu.

Na itukutuku yadua e a volai ena veigauna duidui me baleti ira edua na ivavakoso duidui. E a duidui na inaki ni vakasama nei Josefa me baleti ira yadua. Ia ni da wilika vata, eda na rawata e dua na iyaloyalo vutuniyau ka matata cake me baleta na veika a sotava o Josefa ena Veikau Tabu.

Na Cava e Duidui?

Na veiitukutuku oqo e vaka mera duidui. Ena itukutuku ni 1832, e a vakanamata o Josefa ena nona gagadre me vosoti na nona ivalavala ca. E a sega ni cavuta kina o koya nona vinakata me kila se lotu cava e dina. A talanoataka kina o koya na sala a rairai kina vua na “Turaga”—e a sega ni vakatakilai Rau vata na Tamada Vakalomalagi kei Jisu Karisito.

E tukuni ena itukutuku ni 1835 kei na 1838 ni dua na kaukauwa ca a tovolea me tarovi Josefa me masu. E tukuni ena itukutuku nei Josefa ena 1835 nirau a sikovi koya erua na ka bula, ka vakakina eso na agilosi. E cavuti tale ga ena itukutuku ni 1838 kei na 1842 e rua na ka bula, e dua vei rau a kilai vakatabakidua me o Jisu Karisito. Na rua na itukutuku oqo e vakabibitaka na nona vakasaqara o Josefa na lotu dina.

Na Cava e Tiko Kina Na Duidui?

Era tiko e vica na vuna era duidui kina na itukutuku.

Na iVakarau ni Nanumi Ka

Ena so na gauna eda dau nanuma ni sega ni veisau na ivakarau ni noda dau nanuma na ka. Ia e sega ni vaka oya na noda dau vakananuma na ka. E dau duidui na ivakarau ni noda nanuma na ka nida qase cake tiko. Ena dua na ka a yaco taumada ena vaka me duatani na kena ibalebale baleta na vakuri tiko ni veika e sotavi ena bula. Ena tiko ga na uto ni veika e nanumi, ia eso na kena matailalai ena rawa ni veisau. E sega ni kena ibalebale oqori ni sega ni dina se dodonu na veika eda nanuma, ia baleta ga ni so na tikina ena kilai tani vakalevu cake ena veigauna duidui eso.

Duidui ni iNaki

E a tiko vei Josefa e vica vata na vuna me talanoataka kina na nona italanoa. Ena 1832, e a vola tiko kina edua na italanoa baleti koya, a mani vakanamata vakalevu kina se cava na ibalebale ni iMatai ni Raivotu vua. Ena 1838 kei na 1842, a tukuna kina na iMatai ni Raivotu me tiki ni sala a yaco mai kina na Lotu. A mani vakabibitaka kina na nona gagadre me kila se lotu cava e dina.

Duidui na Vakarorogo

O Robert Mathews kei John Wentworth erau a sega ni lewe ni Lotu. E a gadrevi me duidui na ka e vakamacalataka vei rau o Josefa. E a vagolea vakalevu cake na itukutuku ni 1838 vei ira na lewe ni Lotu. E a nanuma beka ni na wiliki walega na nona itukutuku ni 1832 mai vei ira na itokani voleka kei ira na lewe ni matavuvale.

Na Cava E Tautauvata?

Ena itukutuku kece e va, na veika bibi era tautauvata. A veilecayaki o Josefa me baleta na nona vakabulai kei na vakabulai ni vuravura. A wilika ena Jemesa 1:5–6 ni rawa ni ciqoma na isau ni nona masu. A gole yani ki na veikau ka laki masu. Erau a rairai vua na veikabula vakalomalagi. Erau a kacivi koya ena yacana. Erau a kaya nio ira na veimatalotu ena gauna oya era a sega ni vakavulica tiko na ivunau dodonu.

Na Cava era Vakavulica Vei Au na iTukutuku

Au taleitaka na wilika na itukutuku duidui baleta nira vukei au me matata kina vei au na iMatai ni Raivotu. Au raica vakamatata cake kina na vuna a veilecayaki kina o Josefa ka vinakata kina me masu. Au rawa ni vakila vakaukauwa cake na Yalotabu niu wilika se cava na ibalebale ni iMatai ni Raivotu vei Josefa ena veigauna duidui eso ena nona bula. Ni cokotivata, era vukei au na itukutuku meu kila ni a tukuna tiko o Josefa na ka dina. A raica na Kalou na Tamada kei Jisu Karisito ena Veikau Tabu. Oqo e vakalevutaka na noqu vakanuinui meu na rawata talega na isau ni masu.

iTukutuku	Na vuna a kaya kina o Josefa ni masu	O cei a kaya o Josefa ni rairai mai
1832	Me vosoti kina na nona ivalavala ca	Na Turaga
1835	Me kilai se o cei e dina kei cei e cala ena veika vakalotu	Rua na ka bula—imatai, tarava e dua tale—kei ira na agilosi
1838	Me kila se na lotu cava e Lotu dina i Karisito	Na Tamana kei na Luvena o Jisu Karisito
1842	Me kila se na lotu cava e Lotu dina i Karisito	“Rua na ka bula lagilagi”